Read Sidama_Qullaawa _Maxaafa ISAYAASI 21 Bible Online

ISAYAASI 21 - Sidama_Qullaawa _Maxaafa bible

ISAYAASI 21

¹Baaru gami halallitte daafira kulloonni sokka kunninni aante noote: Wodiidi halallittenni dagge, wo'mankare fiite haadhe hadhanno hombobolatte gede, mitte waajjishshanno gobbanni, wolqaataame bao fultanno.

²Waajjishshanno ajuuja leeltinoe: Ku'u ko'onne sayise hiranno; mulqi'rannohuno mulqi'ranno. Elaami Olanto! Fultine bala tugge! Medooni Olanto, Fultine katama doyisse! Kaaliiqi Baabilooninni kainohunni dayino qarra baala uurrisanno.

³Afoommonna macciishshoommo coyinni kainohunni dhiwamoommo; ilate game amaddino mancho gede ikkoommo.

⁴Wodanu shafaminoe; waajjillu amadeennae huxi'roommo; barruno rahe hashsha giwinoe.

⁵Jila qixxeessitanno; ofollinannire kartanno; ittanno; agganno. «Ki'ne olu hajajaano, ka'ine, wonqo'ne fiidhine qixxaabbe!» yine hajanjoonninsa.

⁶Kaaliiqi, «Hadhe ikkito baala qotannoha wori.

⁷Farado guluffinori lame lame ikkite dagganna laona; harrenna gaala guluffinorino dagganna seekke buuxona» yiie.

⁸Qotaanchuno, «Mooticha'ya! Ani hashshanna barra shaete aana hee're qotanni noommo.

⁹Qotanni hee'reenna hedeweelcho farado gulufino manni daanna afoommo» yii. Mittu manchi qoonqosi naggi asse, «Baabilooni uwi; magannansano ubbe cancanantu» yii.

¹⁰Manna'ya Israeele, ki'neno ayiddummete aana gannanni gidi gede assinoonni'ne. Xa kayinni Olantote Mootichi, Israeelete Maganiwiinni macciishshoommore kuloommo'ne.

¹¹Edoomi daafira kulloonni sokka aante noote: Mittu manchi Edoomi widoonni hee're, «Qotaancho! Hashshu soodara mageeshshi yanna gattu ikka? Soodara dirahino?» yee xa'manno.

¹²Qotaanchuno, «Soodara rahino; ikkollana hashshu galagale daanno; ledde buuxattora hasi'rittoro galagalte amo» yiisi.

¹³Arabete daafira kulloonni sokka kunninni aante noote: Hogowi gaali ledo Arabete halallira Dedaani yinanni gobbara baxxisidhine heedhinanni gosa,

¹⁴goo're ki'newa daanno mannira waa hayikkisse. Ki'ne Teema heedhinanniri, darame dayino mannira sagale itisse.

¹⁵Kuni manni bagadunna urdetewiinni xooqanni nooho.

¹⁶Mootichu, «Kiranyu loosara coyi'ramino barri goofannohu gede, Qeedaari gosa ayirrinyi mittu diri giddo goofanno.

¹⁷Qeedaari bareedda giddonni shiimu manni callu gatanno. Konne coye coyi'roommohu ani Kaaliiqi Israeelete Maganooti» yiie.