Read Sidama_Qullaawa _Maxaafa ISAYAASI 23 Bible Online

ISAYAASI 23 - Sidama_Qullaawa _Maxaafa bible

ISAYAASI 23

¹Xiroosi daafira kulloonni sokka aante noote: Xiroosi Katami diigamino daafira, minu woy malka nookkiha gatino daafira, ki'ne Terseesi markabba wi'le. Qophiroosinni higginanni woyite, macciishshitinanni duduwi konneeti.

²Ki'ne markaawete daddalaasine duroonsitino'neri, giddichote heedhinannirinna, Sidoona daddalaasine sammi yiiyye.

³Gibitsete gobbara loonsanni gide, Baaru aanaanni qolle abbinanna, Xiroosira lowo qiniite uyinosi; Xiroosino gobba baalate dikko uurritannowa ikkino.

⁴Sidoona Katama, ati jawaata baaru gama qiinshoonni qiishooti; ikkollana, labballonna seenne ilte, lossidhinokki mancho gede saalfatattoha ikkatto.

⁵Gibitse Xiroosi diigama macciishshitanno woyite, lowo geeshsha yaaddanno.

⁶Ki'ne baaru lawora heedhinanni gosa! Wuu yitine raartinanni Terseesi sa'e.

⁷Kuni bi're birqiiqinni kayise qawaaxxi're hee'ri katamaati? Manni gobba adhara mannasi xeerto gobba soyihu isooti?

⁸Xiroosira tenne hedihu ayeti? Daddalaasinesi gobba baalate egennantino mootoollaati; wole gobbarano iillitannoreeti.

⁹Tenne malinohu Olantote Mootichi Kaaliiqaati; isi konne coye assinohu boo'nansa agurtanno gede assatenna, ayirradda shollishara hedeeti.

¹⁰Terseesi gosa, kunni ka'a malka noo'nekki daafira, ki'neno hadhine Abbayi gama loosidhanno gosa gede assitine loosidhe.

¹¹Kaaliiqi angasi baaru aanaanni diriirse, gashshoote baala hembeelsino; Kana"aani qiishono hunate hajajo uyino.

¹²Kaaliiqi, «Sidoona Katama, hagiirrikki diri goofino; atino hiiqqamootto; darantine Qophiroosi hadhinirono difooliishshidhinanni» yii.

¹³Kune Baabiloonootu baatto ikkituta la'e; mannu mullare ikke gatino; Asoorootu, baatto moyichu galannota assitino; qiisho diigge baatto wonshite, uminsa qiisho seekkidhino.

¹⁴Ki'ne baaru aana hodhitinanniri Terseesi markaawaasine, hexxitinanni malka diigantinona wuu yitine raarre.

¹⁵Xiroosi Katami 70 diro wo'ma hambeenna hee'ranno; kunino mittu moote hee'ranno dirooti; 70 diro wo'mihu gedensaanni kayinni Xiroosira foora mancho gede,

¹⁶«Tee ati minsheenna hee'ratta foora! Qaangannihe gede, bagana gantanni lowo geeweno geebbanni, katamu giddo doyi» yine sirbinanni.

¹⁷Lamalawu diri gedensaanni Kaaliiqi Xiroosi towatanno; albi loosisira hige foora mancho gede baattote aana noo gashshaano baalate ledo qiniite gamba assi'ranno.

¹⁸Daddale afi'rannori baalu Kaaliiqira baxxinoha ikkanno; gamba assi'rinore dimiinji'rannona, Kaaliiqira soqqantannorira hasiissanno sagaleranna danchu imaanira ikkanno.