Read Sidama_Qullaawa _Maxaafa ISAYAASI 25 Bible Online

ISAYAASI 25 - Sidama_Qullaawa _Maxaafa bible

ISAYAASI 25

¹Kaaliiqa, ati Magano'yaatina, ayirrisi'reemmohe; galatano uyi'reemmohe. Co'o yitino ammanamakkinni, bi're albanni hedoottoha, dhaggete looso loosootto.

²Katamma diigante mulla darga ikkitanno gede assootto; qiishonsano diigootto; diinnanke mi'nitinota mootete minna co'o assite hunootto; layinkimeeshsho minnannikki gede assootto.

³Wolqaataame gosa ayirrissannohe; kaajjado daga katammano waajjitannohe.

⁴Diinu foorari dambalu gede, kinchu huxxa xiiwanno daafira, buxanetenna qarraataammaho irkidhannowa, hombobolatte dagganno yannara golo, arrishshote fooggalira caale ikkoottonsa.

⁵Insa moola gobbara noo iibbilli gede, manna gawajjitanno; Magano, ati kayinni allaggu boollaqi'ra gabbi assootto. Gomichu fooggalo qiissannonte gede, kaajjaddu qeexaala sammi assootto.

⁶Olantote Mootichi konne Tsiyooni Ilaali aana, gosa baalate jila jilanno; jilahono xuma sagalenna fila woyinete xajje qixxeessanno.

⁷Kunni ilaali aana hee're, gosa baala guggushshe amadinoha, dadillu gomicho mulqe hoolanno.

⁸Mootichu Kaaliiqi reyo co'o asse hunanno; mannu baalunku albinni hindiiddo feyanno; mannisi kalqe baalate adhino shollinye aaninsanni hoolanno. Konne coyi'rinohu Kaaliiqaati.

⁹Kuni coyi ikkanno waro mannu, «Isi Maganonkeeti; hexxinoommosi daafira gatisinonke. Gatisinonkehu isootina, amme isinni hagiidhinona» yaanno.

¹⁰Kaaliiqi anga Tsiyooni Ilaala agartanno; Moaabi gosa kayinni sabbu giddo cide gede assine kakkandanni.

¹¹Waa daahannohu gede assite anga fantanno; ikkollana Kaaliiqi heeshshi assannonsa daafira, angansa shaqqite waa ikkitanno.

¹²Moaabi qiisho diigante gattanno; cancanante bushshu ledo karsantanno.