Read Sidama_Qullaawa _Maxaafa ISAYAASI 32 Bible Online

ISAYAASI 32 - Sidama_Qullaawa _Maxaafa bible

ISAYAASI 32

¹Taashshe gashshanno moote daannoti yanna iillitino; ledosi gashshaanono halaalu yoo yitanno.

²Mootenna ledosi gashshaano, mannu bubbetenna wishotenni go'lannowa ikkitanno. Halallitte gobbara lolahanno wayinna, molo baattora noohu lowo kinchi gede caale ikkitanno.

³Hatte yannara, la"anno manni ille fa'nantanno; macciishshanno manni macca macciishshitanno.

⁴Muddamaasine wodanaabbe heddanno; babbitannori xawisse coyidhanno.

⁵Hakkunni gedensaanni gowwoota, egennaammaho diyinanni; garimaloota diayirrinsanni.

⁶Hawanyootu haware coyidhanno; wodaninsa bunshe malanno. Kaaliiqi coye kaphoho soorrite so'ro halashshitanno; hudidhinorira sagale diuyitanno; goodhinorira waa dihayikkissanno.

⁷Garimalu manni busha looso loosanno; buxanete ku'lo haa'nannita ikkituro nafa, insa gudate gano gananno.

⁸Ayirradu manchi ayirrado coye assanno; halaalu coyira gaaramanno.

⁹Ki'ne qawaaxxidhine heedhinanni meenti, ka'ine ani yeemmore macciishshe! Ki'ne dese'e yitine heedhinanni meenti, macca'ne anewa qolle!

¹⁰Ki'ne hawaqidhine heedhinanni meento, mittu diri giddo, hexxo mursiisanno qarri daanno'ne. Woyine'ne giddonnino adhitinanniri dihee'ranno.

¹¹Ki'ne yaaddo nookkiha la'mitine heedhinanniri, xa kayinni waajjitine huxidhe! Imaana'ne fushshidhine, halloho xiddu uddano xaaxidhe!

¹²Danchanna shaqqado baatto, hattono woyine kaasidhinanni dargi baino daafira, gagaso ga'nitinanni wi'le!

¹³Manni'ya baattora utunna qu'muudo fultino daafira, alba hagiidhanni hee'rino minnaranna, hagiirru wo'meenna hee'rino katamira wi'le.

¹⁴Mootete mini nafa ona ikkanno; dannawu katamino mulla darga ikkanno. Minnanna agarranni shae diigantanno; harre gongo'mitannowanna saada hossannowa ikkitanno.

¹⁵Kaaliiqi Ayyaanasi ninke aana dunanno yannara, moola baatto shaqqado ikkitanno; iseno lowo jajja fushshitanno.

¹⁶Hakkiicho halaalunna taashsha, darga amaddanno.

¹⁷Keeraanchimmate loosi keere abbanno; keeraanchimmate gumino, hegerera hawaqi'ne hee'nanni gede assanno.

¹⁸Maganu manni yaaddonna qarru nookkiha hee'ranno; mininsa keerunnihanna hobbaatenniha ikkanno.

¹⁹Dubbo kaade cancante, katamano gante hunturo nafa,

²⁰gide, daadanno wayi gama wixidhanno daafiranna, lalinsanna harrensa hossannowa afidhannohura, hagiirraamma ikkite heedhanno.