Read Sidama_Qullaawa _Maxaafa ISAYAASI 34 Bible Online

ISAYAASI 34 - Sidama_Qullaawa _Maxaafa bible

ISAYAASI 34

¹Ki'ne daga, amme macciishshe! Ki'ne manna, wodana asse! Baattonna aanase noori, uullanna uullate giddonni fulannori baalu macciishsho!

²Kaaliiqi daga baalate hanqino; olantonsarano lowo geeshsha aaramino; insano co'o asse gudanno; bagadunni gooffanno gedeno assanno.

³Reeshshinsa base baalate uwe, bowannota ikkinnina dimadaaramanno; ilaallano mundee calla ikkitanno.

⁴Arrishsho, aganunna beeddahe ba'anno; gordu gogu gede xaaxame ho'lanno; beeddaheno haqqu daro gede ikkite giggiltanno.

⁵Kaaliiqi bise gordoho qixxeessineenna dirrite, ba'ara hedinota Edoomi gosa guddanno.

⁶Bise kakkalote shiqinshoonni ge'reewinna, meu wilii'li mundeenna cooma guggu'litannonte gede, Kaaliiqi biseno Edoomi manni mundeenna cooma aanaho ga'nitanno. Kaaliiqi tenne kakkalo Bootsira Katamira, Edoomi baatto aanano tenne jawa gorro gorranno.

⁷Edoomi roorrooti manninsa ledo gorrante, gaarraanunna middootu gede ikkite ubbanno. Baattonsa mundee calla ikkitanno; coominsano baattote ha'rishsha ikkanno.

⁸Kaaliiqi Tsiyooni agarannohanna, isira rabbisannoha barra dinyino.

⁹Edoomi xashshuwa suwete gedeeta ikkitanno; bushshuno ruqanoho soorramanno; hakkunni gedensaanni baatto baala bubbanno.

¹⁰Hashshanna barra bubbanno; sammi yite wiliiltanni heedhanno. Baattono hegere geeshsha ona ikkitanno; layinkimeeshsho hakkaanni hige sa"annohu dihee'ranno.

¹¹Awulonna haraqeeyye baatto gudisse ragidhanno; Kaaliiqi Edoomi baatto suudiweelonna mullicho asse aguranno.

¹²Gobba gashshanno mooteno dihee'ranno; gashshaano baalano ba'anno.

¹³Mootete minenna qiinshoonni katamma baalate, utunna kokko'lu fulanno; Yeedaalanna awulo galtannowa ikkitanno.

¹⁴Daraaffisunna gotu mitteenni hee'ranno; durriisu mimmito woshshanno; toino minira reedaani galanno.

¹⁵Hakkiicho awulcho mine mi'nite quuphe qaltanno; quupheno dadhituhu gedensaanni hanqafidhe lossidhanno; doowiruno mitteenni hakkiichira gamba yaanno.

¹⁶Kalaqamu daafira Kaaliiqi maxaafira borreessinoonnire nabbabbe. Kunni kalaqami giddonni mittu nafa diba"anno; ledo hee'rannoha hoogge dicallattanno. Konne coye Kaaliiqi hajajino daafira, isi umisi mitteenni heedhanno gede assannonsa.

¹⁷Heedhanno darga Kaaliiqi hirqino; hakkiicho, sirchinsa siranna hegere geeshsha heedhanno.