Read Sidama_Qullaawa _Maxaafa ISAYAASI 36 Bible Online

ISAYAASI 36 - Sidama_Qullaawa _Maxaafa bible

ISAYAASI 36

¹Moote Hiziqiyaasi moohihunni tonaa shoolki diro, Asoori moote Senaakireemi qiinshoonnita Yihudu katamma qase amadi.

²Moote Hiziqiyaasi anga aanno gede Asoori moote mitto gaadaanna lowo olanto ledo Lakiishinni Yerusaalame soyi. Gaadaannino, aliidi kofamenni wayi lolahanno farora imaana meeccanno manchi darga mare uurri.

³Mootete Mini gashshaanchi Hiliqiya beetti Eeliyaaqeemi, borreessaanchu Shebinanna ikkino coye tajete amadannohu Asaafi beetti Yoaahi isinni xaaddara martu.

⁴Asoori gaadaanni, «Hiziqiyaasira, ‹Asoori moote kageeshshi geeshsha wodanaa'moottohu aye hexxiteeti?

⁵Mulla haafa olu busullenna wolqa nooe yaatto? Afummona, ati aye hexxiteeti anera gara giwattohu?

⁶Kune Gibitse kaa'litannoe yite heddanni nootto. Gibitse hexxa fiinxaaraame shomboqqo siqqi'rate ledo mittete. Fiinxaaraame shomboqqo siqqi'niro anga qassanno. Gibitsete moote hexxannohano hattoo coyi agadhannosi.

⁷Asoori gaadaanni lede coyi'ranni, ati Kaaliiqa Maganokki hexxoottota kultanni nootto. Kayinnilla, Yihudunna Yerusaalamete manni mitto darga calla magansi'ranno gede Maganoho kakkallanniwanna magansi'nanni darga baala diigoottohu Hiziqiyaasi ate di"ikkootto?

⁸Ani kayinni Asoori moote su'minni woyyannohe coye kuleemmohe. Gulufa dandaanno manni hee'rihero 2,000 farado eemmohe.

⁹Gibitsennita faradi gaarenna faradaasine hexxittoro nafa, Asoori gaadaannuwa giddonni woriidiha nafa hoo'la didandaatto.

¹⁰Anino tenne gobba qasatenna horrate Kaaliiqi fajjikkinni dayommoha lawannoheni? Tenne gobba gaade daye gudeemmo gede hajajinoehu umisi Kaaliiqaati› yiino yitine kullesi» yii.

¹¹Hakkunni gedensaanni, Eeliyaaqeemi, Shebinanna Yoaahi Asoori gaadaannira, «Ninke qaale egenninoommo daafira Sooriyu qaalinni kulinke. Huxxu aana noo manni macciishshannona Ibiraawootu qaalinni kultootinke» yitusi.

¹²Asoori gaadaannino, «Mooticha'ya Asoori moote konne coye ki'neranna moote'ne callate kulammora soyinoeha lawi'ne? Kuni manni ki'ne sasunkunte gede uminsata lowo shuma itaranna wayi shumansa agara nooha ikkinota afanno gedeetiwe!» yiinsa.

¹³Hakkunni gedensaanni, Asoori gaadaanni kae uurre, qoonqosi naggi asse Ibiraawootu afiinni coyi'ranni, «Jawu Asoori moote yiino'nere macciishshe!

¹⁴Hiziqiyaasi dogoonke'ne; isi horonta gatisa'nera didandaanno.

¹⁵Isi, ‹Kaaliiqa addaxxe; isi gatisannonkena; kataminkeno Asoorootu angara eannokki gede hoolanno› yaannota macciishshitinoonte.

¹⁶Hiziqiyaasi yaannota macciishshitinoonte. Asoori moote, ‹Daggine anera anga uuyye! Hatto ikkitiniro woyinennitanna balasete laalo'ne ittinanni; waa'neno agginanni.

¹⁷Kuni ikkannohu Asoori moote ki'neta labbanno baattora masse wora'ne geeshshaati. Hatte baattono woyinete haqqenna sagalete ikkanno gidi fulannote.

¹⁸« ‹Kunnira Hiziqiyaasi, «Kaaliiqi gatisannonke» yaanni gowwisoonke'ne. Isi anfina, wole gosa maganna giddonni Asoori moote anganni mannasi gatise egennino magani nooni?

¹⁹Hatto ikkiro, Hamaatinna Arfaadi maganna mama nooyya? Sefariwayimi maganna hiikka higguyya? Insa giddonni Samaariya ane anganni gatisihu nooni?

²⁰Tenne gobba baalate maganna mannansa ane anganni gatisidhino yanna nooni? Ki'ne, «Kaaliiqi Yerusaalame Asoori moote anganni gatisanno» yitine heddinannihu mayiraatiyya?› » yii.

²¹Insa kayinni moote Hiziqiyaasi hajajinonsante gede mittoreno didawartino.

²²Hakkunni gedensaanni, Eeliyaaqeemi, Shebinanna Yoaahi dadillunni uddannansa darte Asoori gaadaanni yiinore baala dagge moote Hiziqiyaasira kultusi.