Read Sidama_Qullaawa _Maxaafa ISAYAASI 40 Bible Online

ISAYAASI 40 - Sidama_Qullaawa _Maxaafa bible

ISAYAASI 40

¹Maganinke, «Manna'ya jawaachishshe! Manna'ya jawaachishshe!

²Borojjimmate yannasi gooffeenna, assino cubbi baalaho Kaaliiqi ero qorichishe, cubbosi agurinosihura, Yerusaalamete Katamira shaqqadu qaalinni kullesi» yaanno.

³Mittu lallawanni, «Halalla Kaaliiqira doogo seekke! Moola gobbarano Maganinkera hala'lado doogo maxarre!

⁴Xeichu baalu wo'mo; ilaallanna gaarra diigante xawo ikkito; roggenna xeichu baalu taalo.

⁵Hatte yannara Kaaliiqi ayirrinyi leellanno; coyi'rinohu Kaaliiqa ikkino daafira, konne coye mannu baalunku illesinni la"anno.

⁶« ‹Raari› yaannohu qoonqo macciishshoommo; anino, ‹Mayee raaro?› yoommo; tini qoonqono, ‹Mannu baalunku hayissote gedeeho; ayirrinyisino xawu daraaro gedeeho.

⁷Kaaliiqi bubbe bubbissanno woyite, hayisso mooltanno; daraarono giggiltanno; mannuno hattooho.

⁸Hayisso mooltanno; daraarono giggiltanno; Maganinke qaali kayinni hegerera kaajje hee'ranno› » yitue.

⁹Tsiyoonira dancha duduwo kulattohu, jawu ilaali iimira fuli! Yerusaalamete dancha duduwo kulattohu, qoonqokki naggi assite lallawi! Qoonqokki naggi assi; waajjitooti! Yihudu katammara, «Magani'ne daanni no» yite kulinsa.

¹⁰Kune Wo'munkura Aliidihu Kaaliiqi, jawa wolqasinni gashshara daanno. Daanno woyite afanshanna, loonsoonnirira aannore haa're daanno.

¹¹Allaalaanchu gede hoshshasi towatanno; wilii'le isiwa gamba asse hanqafanno; amuuwansano wodaninni shiikkanno.

¹²Wayibba hoowisinni, gordo taakkosinni bikkinohu, baattote bushsha saffunni safarinohu ayeti? Ilaallanna gaarra, keenaasinchunni keeninohu ayeti?

¹³Kaaliiqi hedo afinohu nooni? Isira rosiisannosihunna mala aannosihu nooni?

¹⁴Kaaliiqira mala uyinohu ayeti? Halaalaancho coye kulinosihu nooni? Egenno uyinosihu, woy wodanchinanni gara kulinosihu ayeti?

¹⁵Daga Kaaliiqi albaanni gambayichu giddo cophi yiino wayi geeshshireeti; keenaasinchu aana noo buko geeshshireeti; giddichuwano albasiinni cu'minoonni buluuli geeshshite.

¹⁶Libaanoosi dubbi kakkalosi haqqera di"ikkanno; hakkiicho noo saadano shilqote kakkalora ajjanno.

¹⁷Daga baala Kaaliiqi albaanni mullareeti; mite yine nafa dikiirrannireeti.

¹⁸Magano aye ledo taashshitinanni? Isi ma lawanno yitine heddinanni?

¹⁹Isi haqqa bonce, culka xalline, birrunni seekkine uurrinsoonni misile gedeeha di"ikkino.

²⁰Woxe afi'rinokki buxichi, huqu qasannokki haqqicho doore, misile ubbannokki gede asse, seekke bocanno ogeessiwa massi'ranno.

²¹Konne coye diaffinoonni? Dimacciishshitinoonni? Bi're albanni dikulloonni'ne? Baatto kalaqantunkunni konne coye dibuuxxinoonni?

²²Kaaliiqi baattote iimaanni ayirrinyu barcimira ofolle noota, gordo dukkote gede bedeedinota, dukkanu gede diriirsinota, baattote aana noo manni cuuncichu geeshshiha ikkinota diaffinoonni?

²³Isi ayirradda shollishanno; tenne gobba gashshaanono co'o asse gudanno.

²⁴Insa xaalla mu're, rumushshono assi'rinokki haqqi gedeereeti. Kaaliiqi bubbe dagganno woyite, hakkawoyintenni mooshshitannonsa; galawu gedeno fiite huntannonsa.

²⁵Qullaawu, «Xa ane aye ledo taashshitinannie? Ane lawannohuno ayeti?» yaanno.

²⁶Iimira gordo higgine la'e! La'inanni beeddahe kalaqinohu ayeti? Olantote gaadaanni gede albaanni ha'rannonsa; kiironsano egennino; mitte mittenta su'misenni woshshanno. Wolqasi lowota ikkitino daafira, giddonsanni mitte nafa dixe'anno.

²⁷Yaiqoobi sircho! Israeelete gosa! «Kaaliiqi qarra'ya diafino; halaaleno difushshinonke» yitine mayira gunguntinanni?

²⁸Ki'ne diaffinoonni? Dimacciishshitinoonni? Kaaliiqi hegere Maganooti; baatto baala kalaqinohu isooti. Isi horo didaafuranno; dihooganno; isi hedinore afara dandaannohu dino.

²⁹Isi daafurtinorira jawaante aanno; dhukiweeltinorira wolqa ledanno.

³⁰Aju manni nafa daafure wolqa hooganno; wedelluno shaqqe uwanno.

³¹Kaaliiqi kayinni iso hexxitannorira, wolqansa haaroonsanno; allamurchu gede qoolunni buubbanno. Doddanno; didaafurtanno; hadhanno dihoogganno.