Read Sidama_Qullaawa _Maxaafa ISAYAASI 41 Bible Online

ISAYAASI 41 - Sidama_Qullaawa _Maxaafa bible

ISAYAASI 41

¹Kaaliiqi, «Ki'ne giddichuwate heedhinanni gosa, sammi yitine macciishshe! Daga wolqansa haaroonsidho; amme mitteenni gamba yine, marre yoote darga xaandona.

²«Gawajjannoha soojjaatinni woshshe abbe, mariwa baala qeelannoha assinohu ayeti? Gosanna mootoolla angasira sayise aanno; bisesinni quuxare buko assanno; maxxisinnino galawimma billaallisannonsa.

³Mittu qarri nookkiha alba qole shorranno; rankesinni kainohunni baatto dikadanno.

⁴Konne assinohu ayeti? Bi're hundinni kayise ikkito baala dhaawinohu ayeti? Ani Kaaliiqi bi're hundanni noommoho; kunni gedensihuno aneeti.

⁵«Giddichuwate heedhanno gosa, ani assoommore baala affe, lowo geeshsha masse huxidhino; mitteenni gamba yite anewa daggino.

⁶Misilla magansidhannori, ‹Yaaddooti› yitanni mimmito jawaachishshanno.

⁷Angate ogeessi culka daashshannoha jawaachishanno; misile boce meenchunni gane taashshannohu, ‹Dancha gede assite xaadisootto› yaanno. Misileno milli yitannokki gede misimaaretenni wiqqi assitanno.

⁸«Ati soqqamaancho'ya Israeele, doodhoommo manni kayinni, jaali'ya Abirihaami sirchooti.

⁹Gobbate qaccenni haa're abboommohe; shoolente maddenni woshshoommohe; ‹Soqqamaancho'yaati› yee dooroommohe ikkinnina, tuge diaguroommohe.

¹⁰Ani ledokki noommona waajjitooti; ani Maganokkiitina hexxo mudhitooti. Ani jawaachisheemmohe, kaa'leemmohe; wolqaataame anga'yanni gargare gatiseemmohe.

¹¹Ate aana ka'inori baalu irraabbanno; gawajjitahera heddannori baalu mulla darga ikkitanno.

¹²Diinakki hasse nafa diafatto; ate aana ola kayissinori baalu, co'o yite gooffanno.

¹³Qiniiticho angakki irkiseemmohe; ‹Kaa'leemmohena waajjitooti› yeemmohehu, Maganikki ani Kaaliiqaati.

¹⁴Ati da'muulchu gedee wolqiweeli, ani kaa'leemmohena waajjitooti. Wodeemmohehu ani Kaaliiqaati; ani Israeelete Qullaawaati.

¹⁵Hinko afi'rinohu haaru gide gannanni uduunnichi gedeeha asseemmohe; ilaalla hawuurte maniissatto; gaarrano daakke galawa assatto.

¹⁶Woowansiteenna bubbe adhite hadhannonsa; hombobolatteno billaallissannonsa. Ani Kaaliiqakki ikkoommo daafira, hatte yannara hagiidhatto; atino ane Israeelete Qullaawa ikkoommoha Magano galaxxatto.

¹⁷«Buxanenna gadadaammu waa hasidhe hoogganno; kokkensa goo'rotenni mooltanno woyite, ani Kaaliiqi huuccattonsa macciishsheemmo; ani Israeelete Magani horo diagureemmonsa.

¹⁸Moola gaarrara wayibba lolakkanno gede asseemmo; laggateno bu'a fultanno; halallitte gobbara wayi eelanno gede asseemmo; moola baattora xashshu lolahanno.

¹⁹Halallitte gobbara daguwanna waaccote haqqe, uddonna ejedhe fushsheemmo; moola gobbara waadde, hoommenna asita yinanni haqqe fushsheemmo.

²⁰Mannu konne coye la"anno woyite, ani assoommoha ikkinota buuxanno. Israeelete Qullaawa ikkoommohu, ani Kaaliiqi kalaqoommotano afanno» yii.

²¹Israeelete moote Kaaliiqi qole, «Ki'ne dagate maganna, hanni ku'lo'ne adhitine shiqqe! Hanni taje'neno abbidhe!

²²Hanni daggine albillittete ikkannorenna, ikkannohu mamooteetiro kullenke; kunni albaanni ikkinorino maatiro, hattino mayaatero buuxissenke.

²³Hanni ki'ne magannatero, kunni ka'a ikkara noore kullenke; maala'lineemmonna waajjineemmo gede, hanni mitto dancha woy busha coye asse.

²⁴Ki'neno mullareeti; loosi'neno haafaho; magansidhanno'nerino tiyyi'ne gimbannireeti.

²⁵«Ani Kaaliiqi aliyyeenni mitto roorricha woroommo; isino su'ma'ya ayirrisate soojjaatinni daanno; isi mootoolla sabbu gede kadanno; dora ganannohu gede asse cancananno.

²⁶Coye'ne garaho yineemmo gede, balaxe kullonkehu nooni? Ki'ne giddonni mittuno coyi'rinohu dino; coyidhinanna macciishshinohuno dino.

²⁷Balaxe Tsiyoonira konne coye hasaawoommohu aneeti; Yerusaalameteno dancha duduwo kuloommohu aneeti.

²⁸Laeemmo woyite ki'ne giddonni mala aannohu mittuno dino; xa'mineenna xa'mo qolannohuno dino.

²⁹Kune ki'ne baalunku haafaho; mittoreno assitine diaffinannireeti; ki'ne misilla mulla diilallooti» yii.