Read Sidama_Qullaawa _Maxaafa ISAYAASI 56 Bible Online

ISAYAASI 56 - Sidama_Qullaawa _Maxaafa bible

ISAYAASI 56

¹Kaaliiqi, «Gatiseemmo yanna rakke dagganno; keeraanchimma'ya leeltanno yanna gambissino. Kunnira taalo coye asse; halaalaancho looso loosse.

²Konne coye assannohunna seekke cu'mi'rannohu, mishikkinni Fooliishshote Barra ayirrisannohu, angasi bunshe loosatewiinni agadhannohu maassaminoho» yii.

³ Manni gobba manchi, «Kaaliiqi, mannisi ledo dikiirannoe» yee hedoonke; mureessuno ila hoogasira, «Ani moola haqqaati» yoonke.

⁴Kaaliiqi, «Fooliishshote Barra'ya ayirrissannorira, ani baxeemmo coye assitannorinna, gondooro'ya agadhitinanni mureeyyera,

⁵Qullaawu Mini'ya giddo su'ma'ne ooso'ne kayissannohunni roore, qaanganna hee'ranno gede asseemmo; ki'neno hambi'nekkinni heedhinanni» yii.

⁶Kaaliiqi manni gobbanni dagge, isiwa gamba yite baxxannosirenna soqqantannosire, mishshukkinni Fooliishshote Barrasi agadhitannore,

⁷«Qullaawu Ilaali'yawa Tsiyooni haa're masse, huuccattote mini'ya giddo hagiidhitanno gede asseemmonsa; kakkalo'ya darga shiqishidhanno kakkalono adheemmonsa. Hatto asseemmohuno mine'ya: Mannu baalunkura huuccattote mineeti yinanni daafiraati» yii.

⁸Billaallitino Israeele gamba assannohu Mootichu Kaaliiqi, «Insa aanano woloota lede gamba asseemmo» yii.

⁹Wole gosa, dubbu moyichi gede ikkite dagge, mannasi egemmitanno gede Kaaliiqi hajajino.

¹⁰Qoleno Kaaliiqi, «Israeelete gashshaano ballootaho; egennono diafidhinoreeti. Insa baalunku dutannokki woshshi gede, sammi yite goxxe haaqee calla haaqiidhanno; wo'manka woyite goxano calla baxxanno.

¹¹Insa ite duuwannokki woshshi gedeereeti; wodancha afidhinokki allaalaasineeti. Baalunku faro faronsa hadhanno; mittu mittunku uminsare calla shorritanno.

¹²Insa insanaa, ‹Amme woyinete xajje adhine, ange dimbinona! Ga'a barri techohu gedeenkalla ikkannona, woy isinni techohunni woyyinoha ikkanno› yitanno» yii.