Read Sidama_Qullaawa _Maxaafa ISAYAASI 59 Bible Online

ISAYAASI 59 - Sidama_Qullaawa _Maxaafa bible

ISAYAASI 59

¹Kaaliiqi anga gatisate dihara'mitino; maccasino macciishsha digibbino.

²Ikkollana sao'ne ki'nenna Maganu mereero golo ikkitino; huuccatto'ne macciishshannokki gede, cubbi'ne albasi ki'newiinni shawwu assino.

³Anga'nenna qubbe'ne mundee callate; afii'nenna arrawi'ne kaphonna cubbo coyi'ranno.

⁴Yoote shiqqinannita ikkinnina halaalu difulanno'ne; gartinara yitine kapho coyidhinanni; woloota gawajjate ma'litinanni.

⁵Hamashshu quuphe hanqafidhinanni; qiissanete mine mi'nitinanni. Hakkonne quuphe itannohu baalu reyanno; hanqafidhinoonni quuphi giddonni buute fultanno.

⁶Ki'ne mintinoonnihunni qiissanete mininni ayeno uddano diga'nanno; ki'ne loossinanni loosi saote; anga'nera bunshe wo'mitino.

⁷Lekka'ne cubbo loosate doddanno; keeraancho manna shaate rakkanno. Wodani'nenni bunshe heddinanni; martiniwa baala diigginanninna huntinanni hadhinanni.

⁸Mannu ledo keere hee'nanni gara diegentinoonni; doogo'ne baalate halaalu dino. Hadhinanni doogo baala shokkashsho ikkitino daafira, hakkaanni hige ha'rannohu baalu keere diafi'ranno.

⁹Mannu qole, «Halaalu ninkewiinni xeerti'rino; keeraanchimmano ninkewa didagganno; xawaabba hasi'noommo. Ikkollana baalunkuri tunsinonke; kunnira beebbu tunsichi giddo hee'noommo. Kaaliiqi mayira gatisa giwinonkero xa anfoommo.

¹⁰Illetenni afannokki manni gede babbaattinanni ha'neemmo; tunsote noohu gede barra xawoho sarraaqammeemmo; ree jeennaateho noohu gede ikkinoommo.

¹¹Ninke baalunku halaalenna gato afi'rate, aaraambe dagunchu gede harqineemmo. Dadilline lembooli gede gurura'neemmo; ikkollana ninkewiinni faffino daafira diafi'neemmo.

¹²«Kaaliiqa, ate albaanni saonke batidhino; uminke assinoommo cubbi amadinonke. Ninkewiinni bunshe faffe diegentino; ninkeno saonke egenninoommo.

¹³Atera maahoyye gimbe badhe wodhinoommo; ate hoodeno ha'ra agurroommo. Woloota gadadinse ateno agurre ha'noommo; hendeemmorinna coyi'neemmori baalu kaphohonna so'rote.

¹⁴Ninkewiinni halaalu xeerti'rino; keeraanchimmano ninkewa shiqqi diyitanno. Halaalu gudumaaleho darga hooge xiiwamanno; ammanamano bayicho diafidhino.

¹⁵Halaalu baino daafira, bunshetewiinni xooqannohu gawajjinanniha ikkanno» yii. Kaaliiqino halaalu bainota afe dadilli.

¹⁶Gadadantinore kaa'lannohu mittuno nookkita afe maala'li; kunnira gadadantinore isi umisi wolqanni kaa'le, qeelle afidhanno gede assi.

¹⁷Isi keeraanchimma siwiilu uddano gede uddi're, gatissanno wolqano siwiilu gullee gede asse wodhi. Isi coye baala taashshate, manna shetissannore qorichishatenna rabbisate, lowo geeshsha halchi.

¹⁸Xeertote gobbara noori nafa gattukkinni, baarigaarrasi loosinsa garinni qorichishannonsa.

¹⁹Bubbimma jiganno lolahi gede ikke daanno daafira, galchiminna soojjaati gosa, Kaaliiqanna ayirrado wolqasi waajjitanno.

²⁰Kaaliiqi mannisira, «Gargarammo'neranna cubbo'ne aagintaabbinannire gatisate, ani Yerusaalame dayemmo.

²¹Manna'ya, ani ki'nera Ayyaana'yanna qaale'ya eemmo'ne; kunino ki'neranna maate'nera hegere iqqaati. Konne coye coyi'roommohu ani Kaaliiqaati» yii.