Read Sidama_Qullaawa _Maxaafa ISAYAASI 61 Bible Online

ISAYAASI 61 - Sidama_Qullaawa _Maxaafa bible

ISAYAASI 61

¹ Mootichu Kaaliiqi Ayyaani ane aana no; gadadantinorira dancha duduwo duduwate, wodana hiiqqantinore dhaawatenna, qafadantinori agurantannota, usurantinori tidhantannota kulate, Kaaliiqi buure soyinoe.

²Kaaliiqiha maarote diro, Maganinkeha rabbate barra kuleemmo gede, wi'litannore baala jawaachisheemmo gede,

³Tsiyooni wi'litanni noorira, buluulu darga seesu ba'latto worammonsara, hindiiddote darga hagiirru zayite, umoho dunammonsara, dadillu darga galata tuulachishammora soyinoe. Kuri ayirrinyesi xawissanno gede Kaaliiqi kaasinoreeti; insa, Keeraanchimmate Haqqeeti yinanninsa.

⁴Kuri seedu dirira albaanni diigantino katamma, galagalchite mintanno.

⁵Wole gobba manni saadansa allaalanno; gatensano loosanno; woyinete kaashshonsano shuqunanno.

⁶Ki'ne kayinni, Kaaliiqi Qeeseetinna, Maganinke Soqqamaanooti yinanni'ne. Dagate jiro ittinanni; insa qiniitinni fenjeejjitinanni.

⁷Saali'nenna shollinyi'ne hakko gawa'leenna, umi'ne gobbara heedhinanni. Jiro'ne lame ero ikkitanno; hagiirri'neno hegereha ikkanno.

⁸Kaaliiqi, «Ani halaale baxeemmo; mulqi'ranna sao giweemmo. Ammanama'yanni manni'yara malino ba'raa'ra eemmo; insa ledono hegere gondooro e"eemmo.

⁹Oosonsa gosate mereero, oosonsa oosono dagate giddo egennantinore ikkitanno; la"annonsahu baalu ani Kaaliiqi maassi'roommonsa gosa ikkitinota afanno» yii.

¹⁰Anera Kaaliiqinni tashshi yaannoe; lubbo'ya Magani'yanni lowo geeshsha hagiidhitanno. Uddisiisinoeti gatote uddano, seenne adhanno beetti umoho wodhino ba'lattonna, adhantanno beetto wodhitino irri gede biiffinote; keeraanchimmate seemmano aanaho ledinoe.

¹¹Baatto jajja mu'rissannohu gedenna, gatu winxire laashshannohu gede, Mootichu Kaaliiqino mannu baalunku giddonni, keeraanchimmanna galatu burqanno gede assanno.