Read Sidama_Qullaawa _Maxaafa ISAYAASI 63 Bible Online

ISAYAASI 63 - Sidama_Qullaawa _Maxaafa bible

ISAYAASI 63

¹Kuni Edoomi gobbanni Bootsira Kataminni, duumo imaana uddi're daannohu ayeti? Wolqatenni wo'me, ayirrado imaana uddi're qa'naafanni noohu ayeti? Taalo yoo yeemmohu, gatisate wolqa nooehu ani Kaaliiqaati.

²Woyinete laalo huuncannohu gede, imaanikki mayira duumo ikki?

³Kaaliiqi, «Daga ani calli'ya woyinete laalo gede huuncoommo; togo asseemmo woyite, dagate giddonni ane ledo noohu dino. Insa hanqi'yanni kadanna, aari'yanni ceellaganna, mundeensa kaatte uddano'ya huntino.

⁴Rabbisi'reemmo barra wodani'yanni hedoommo; manna'ya gatiseemmo dirino dayino.

⁵Wirri yee laeemmo woyite kaa'lannoehu dino; ha'lannoehano lae hoogoommo. Kunnira ani wolqaataamu hanqi'yanni, qeelle angara adhoommo.

⁶Daga hanqi'yanni kade tugoommo; aari'ya dimbisannonsa gede assoommo; mundeensano baattote aana dunoommo» yii.

⁷Kaaliiqi assinonkerira baalaho, Israeelete manna mararino mararrora, bati'ru hegere baxillisinna shaqqillisi daafira, Kaaliiqiha dancha loososinna galatasi duduweemmo.

⁸Kaaliiqi, «Insa addinta ane mannaati; doggannoekki ooso'yaati» yii. Insarano gatisaanchonsa ikkino.

⁹Qarrinsa yanna baalantera ledonsa qarramino; sokkaasincho soye ikkikkinni, isi umisi daye baxillisinninna maarosinni gatisinonsa; bi're hundinni kayise isi duhinonsa.

¹⁰Insa kayinni Qullaawa Ayyaanasi dadillissino; kunnira isinni qole diina ikke gawajjinonsa.

¹¹Hakkunni gedensaanni albita Muse yanna qaaggu; saadansa ledo baaru giddoonni qole sayisinsahu hiikki? Qullaawa Ayyaanasi giddonsa wori Magani hiikki?

¹²Hegere geeshsha maccaha ikkasi egensiisara yee, ayirrado wolqasi Musera qiniiteenni worihu, albansaanni noo waa lamewa badihu hiikki?

¹³Xawoho ha'ranno farashshi gede asseennansa, diimete giddo hadhanni digufidhino.

¹⁴Lagichaho bobbahanno lali gede, Kaaliiqi Ayyaani fooliishsho uyinonsa. Su'mikki ayirranno gede kunni garinni haadhe ha'roottonsa.

¹⁵Kaaliiqa Magano! Qullaawunna ayirradu dargira gordoho heedhe kawa qolte lai. Laalakkinna wolqakki mama no? Shaqqillikkinna mararrokki ninkewiinni xeertidhino.

¹⁶Abirihaami afa hooginkerono, Israeeli egenna hooginkerono, ati annankeeti. Maganonke, bi're albinte gede ati annankeeti; bi're albinni kayisse gatisaanchonkeeti.

¹⁷Kaaliiqa, doogokkinni fulle ba'nanna mayira worte laittonke? Waajjineemmohekki gede wodananke mayira kaajjishitto? Soqqamaanokki ikkinoommoriwa mannikkiwa higinke.

¹⁸Shiima yanna geeshsha Qullaawu Minikki ninke anga hee'rino; xa kayinni konne mine diininke kakkadino.

¹⁹Ninke ati gashshoottonkekkirenna, ate su'minni woshshammeemmokkire ikkinummonkunni barru keeshshino.