Read Sidama_Qullaawa _Maxaafa ISAYAASI 65 Bible Online

ISAYAASI 65 - Sidama_Qullaawa _Maxaafa bible

ISAYAASI 65

¹Kaaliiqi, «Huuccidhinoekkirira anenee xawisoommo; hasidhinoekkirira leelloommo; woshshidhinoekki gosara, ‹Yee› yoommonsa.

²Uminsa hedo shorritanni, busha doogo higge hadhannorira, haxawarra gosara barra wo'ma anga'ya diriirsoommo.

³Tini gosa gattate kakkalo kakkaltanninna, baccu aana hixaana giirtanni, wo'manka woyite ane hanqissannote.

⁴Ekerrate ledo hasaabbara yite, hashsha mooggatenna goddate giddo suuqante galtanno; manchaamete maala ittanno; battete maali waco agganno.

⁵Insa, ‹Ninke qullaawootahona gamba yitinoontenke!› yitanno; kuri, sano'yara wiliilete gedenna, barra wo'mano bubbanno giira gede ikke bushshannoe.

⁶Kuni coyi kune albaanni borreessineenna no; assitinorira baalaho qorichishummokkinni sammi yee diagureemmo.

⁷Ilaallate aana hixaana giirtinonna, su'ma'ya shollishshino daafira, ani Kaaliiqi insa uminsanna akaakkansa cubbi daafira qorichisheemmo» yii.

⁸Kaaliiqi, «Huuncinoonni woyine, woyinete laalo giddonni fultanno daafira, ‹Dancha coye amaddinotena huntinoonte› yinanninte gede, soqqamaano'ya daafira yee manna gudise dihuneemmo.

⁹Yaiqoobira ooso eemmosi; Yihudu ga'reno ilaalla ragidhanno gede asseemmo. Soqqamannoehu doodhoommo manni, hakkiicho hee'ranno.

¹⁰Saarooni Xawi ge'reewu hosannowa ikkanno; Akoori Lagichirano lalu hosanno.

¹¹Ane Kaaliiqanna Qullaawa Ilaala'ya agurtine, ‹Dancha Kaayyooti› yinanni maganira sagale qishshinanni; ‹Kaayyote› yinanni maganira karsiinsoonnita woyinete xajje shiqishshinanni.

¹²Woshsheenna, ‹Yee› yaa gibbine, coyi'reennano macciishsha gibbine, anera hajajama gibbine, bunshe assa doodhitinoonni daafira, jaddote reyo reyitinanni gede asseemmo'ne» yii.

¹³Kunnira Mootichu Kaaliiqi, «Soqqamaano'ya ittanna ki'ne hudidhinanni. Soqqamaano'ya agganna ki'ne goodhinanni; soqqamaano'ya hagiidhitanna ki'ne kayinni saalfattinanni.

¹⁴Soqqamaano'ya wodanunni hagiidhite faarsitanno woyite, ki'ne kayinni wodani'ne dadillinni kainohunni woo woo yitine wi'litinanni.

¹⁵Ani doodhoommo manni ki'ne su'ma rumonniha asse kiiranno; ani Mootichu Kaaliiqi ki'ne reyote sayise eemmo; soqqamaano'yara kayinni haaro su'ma fushsheemmonsa.

¹⁶Maasso hasi'rannohu baalu, halaalaanchu Magani ani Kaaliiqi maassi'reemmosi gede huucci'ranno; xaarannohuno ane halaalaanchu Magani Kaaliiqi su'minni xaaranno. Saino qarri baalu hawamanno; ille'yannino go'lanno» yii.

¹⁷Kaaliiqi, «Kune ani haaro gorduwanna haaro baatto kalaqeemmo; sainore baala hambanni; horonta diqaanganni.

¹⁸Ani kalaqeemmori baalunni, hegere geeshsha tashshi yoo'nena hagiidhe! Ani kalaqeemmoti haaro Yerusaalame hagiirru wo'minota ikkitanno; manniseno hagiirraamo ikkanno.

¹⁹Anino Yerusaalametenninna manni'yanni hagiidheemmo; hakkiicho wi'lanna raare diheedhanno.

²⁰Hakkunni gedensaanni qaaqquullu anje hee're direyanno; geerruno diro duuwikkinni direyanno. 100 dirinni hee're reyannoha, anje hee're reyinohu gede assine kiirranni; hakkuyi kawa reyannohu kayinni rumammohu gede kiiramanno.

²¹Manni'ya, mine mi'ne hee'ranno; woyineno kaasi're laalose itanno.

²²Insa mi'nitino minira wolu digalanno; loosidhino jajja allaggichu di"itanno. Manni'ya haqqu gede seeda diro hee'ranno; loosi'rinorinnino seeda diro hagiidhanni hee'ranno.

²³Assidhannori baalu qinaannonsa; oosonsa dano dikissanno; insatanna ilamansata geedonsa maassi'reemmo.

²⁴Woshshidhukkinni yee yeemmonsa; huuccidhe guddukkinni qoleemmonsa.

²⁵Hiyyeeyyenna ge'reewu wilii'li mitteenni hosanno; doobbiichuno handu gede galawa itanno. Hamashshu bukolla laaxanno; insa Qullaawu Ilaali'yara Tsiyooni, digawajjitanno; mittoreno dihuntanno» yii.