Read Sidama_Qullaawa _Maxaafa LEEWAAWOOTA 10 Bible Online

LEEWAAWOOTA 10 - Sidama_Qullaawa _Maxaafa bible

LEEWAAWOOTA 10

¹Aarooni ooso Naadaabinna Abihu yinanniri hixaana worranni baccicho haadhe aanaho giira worte, hixaana giirtu; isi hajajinokkita seerimale giira Kaaliiqi albira shiqishshu.

²Kunninni kainohunni, Kaaliiqiwiinni fultino giira itte shiteenna Kaaliiqi albaanni reyitu.

³Museno Aaroonira, « ‹Kaaliiqi soqqamannoehu baalu qullaawa ikka'ya ayirriso; anino manni'yara ayirrinye'ya leellisheemmo› yiino coyi konneeti» yiisi. Aarooni kayinni, mittoreno didawarino.

⁴Muse Aarooni wosiili Uzieeli ooso Mishaeelinna Eltsafa woshshe, «Amme kuri roduuwi'ne reeshsha qullaawu darginni hooltine qachu gobbaanni fushshe» yiinsa.

⁵Insano e'e, Muse hajajinonsa garinni roduuwinsa reeshsha qeesimmate uddano uddidhino gedeenni dukke qachu gobbaanni fushshitu.

⁶Muse Aarooniranna oososira Aliaazaariranna Itaamaarira, «Dadillitinoonnita leellishate, umo'ne meexxitinoonte; uddano'neno dartinoonte; hatto assitiniro, ki'neno reyitinanni; Kaaliiqino manna baalaho hanqanno. Kaaliiqiwiinni daggino giira itte shitinorira, fiixi'ne Israeele wi'la dandiitanno.

⁷Kaaliiqi zayite umi'ne aana noo daafira, reyitinannina kunni Xaadu Dukkani giddonni fultinoonte» yiinsa. Insano Muse yiinonsa gede ikkitu.

⁸Kaaliiqi Aaroonira,

⁹«Atinna oosokki woyinete xajje woy dimbisannore aggine Xaadu Dukkanira e'inoonte. Hatto ikkitiniro reyitinanni. Kuni seeri ki'neranna ooso'ne oosora hegerera aamaminoho.

¹⁰Maganoho baxxinoha baxxinokkihuwiinni, batte ikkinoha batte ikkinokkihuwiinni badde.

¹¹Kaaliiqi Muse widoonni qole uyino seera baala Israeelete mannira rosiisse» yii.

¹²Muse Aarooniranna noorira lamunku oososi Aliaazaarinna Itaamaarira, «Kaaliiqi kakkalo shilqonnitewiinni gatinoha gidu fushshaate haadhine, tima shiishikkinni gantine, lowo geeshsha qorombanniha ikkino daafira, kakkallanni dargi mule massitine itte.

¹³Kaaliiqi hajajinoe garinni, konne qullaawa darga massitine itte. Kuni Kaaliiqira giirre kakkalloonnihu ateranna oosokkira qeecha'neeti.

¹⁴Israeelete manni mitttimmate kakkalora shiqishinohu giddonni atenna oosokki qeechi, hayunna racho Kaaliiqira addi fushshaate assine uyineenna, qeesootaho ikkitanno. Konneno oosokki labballunna seennu keeraa'mino darga massite ittona.

¹⁵Coomu Kaaliiqira giirate kakkalora shiqanno yannara, hayenna racho Kaaliiqira shiqishshe. Kunino Kaaliiqi hajajinonte gede, atehanna oosokki qeecha ikkona» yiisi.

¹⁶Muse cubbu kakkalora shiqinshoonnihu meichu goci hiikkiro xa'me insa shilqishshinota afihu gedensaanni, Aliaazaariranna Itaamaarira hanqe,

¹⁷«Cubbo agursiisate shiqinshoonni kakkalo Dukkanaho gobbaanni qullaawa darga massitine mayira ita gibbini? Tini sagale lowo geeshsha qullaawate. Kaaliiqi Israeelete manni cubbo agurate uyino'nete.

¹⁸Mundeeno Qullaawu Dukkani giddora e'inokki daafira, hajajoommo'ne garinni, kawiicho qullaawa darga ita hasiissanno'ne» yiinsa.

¹⁹Aaroonino Musera, «Kuneeti techo mannu cubbinsatanna shilqote kakkalo Kaaliiqira shiqishino. Anera kayinni bushu coyi dayinoe. Tenne kakkalo itoommoha ikkoommero, Kaaliiqi hagiidhannoha lawannoheni?» yiisi.

²⁰Muse yiinota macciishshe, qolino dawaronni hagiidhi.