Read Sidama_Qullaawa _Maxaafa LEEWAAWOOTA 15 Bible Online

LEEWAAWOOTA 15 - Sidama_Qullaawa _Maxaafa bible

LEEWAAWOOTA 15

¹Kaaliiqi Museranna Aaroonira,

²«Israeelete mannira, aye manchirano siimisi giddonni mitturichi fuliha ikkiro lagaawinoho.

³Giddosinni fulannorichi uurrirono uurra hoogirono manchu lagaawinoho.

⁴Kuni manchi goxanno ma'nanna ofollanno dargi baalu lagaawinoho.

⁵Tenne ma'na kisannohu baalu imaanasi hayishshi'rona; bisosino hayishshi'rona; hawarra geeshshano lagaawinoha ikkona.

⁶Kuni manchi ofollinowa ofollannohu imaanasinna bisosi hayishshi'rona; isino hawarra geeshsha lagaawinoha ikko.

⁷Konne mancho kisannohu, imaanasinna bisosi hayishshi'rona; hawarra geeshshano lagaawinoha ikko.

⁸Kuni manchi wolu aana anja tufiro, tunfisi manchi imaanasinna bisosi hayishshi'rona; hawarra geeshshano lagaawinoha ikko.

⁹Kuni manchi ofollinohu farashshu koorinna woroonni karroonniri baalu lagaawanno.

¹⁰Isi ofollino uduunnicho kisannohu baalu, hawarra geeshsha lagaawinoha ikkanno; hakkonne uduunne haa'rannohuno imaanasinna bisosi hayishshi'rona; hawarra geeshshano lagaawinoha ikko.

¹¹Kuni manchi anga hayishshi'rikkinni wole mancho kisiro, kinsisi manchi imaanasinna bisosi hayishshi'rona; hawarra geeshshano lagaawinoha ikko.

¹²Kuni manchi kisinohu bushshu uduunni hee'riro, hiiqqine hunnona; haqqunni seekkinoonni uduunne ikkiro kayinni wayinni hayishshinona.

¹³«Kunni manchira fulannori uurrihu gedensaanni 7 barra keeshshe, hakkunni gedensaanni imaanasi hayishshi're, bisosino xalalu buete wayinni hayishshi're, seeru garinni keeraa'manno.

¹⁴Settikki barra 2 bukukkaamanna 2 lemboolcho haa're, Xaadu Dukkani nafara ane albira abbe qeesichaho oona.

¹⁵Qeesichuno mitto cubbu kakkalora, layinkiha shilqote kakkalora shiqishona. Kunni garinni keereensate seera wonshona.

¹⁶«Mittu manchi haaqeete shumaa'riro, bisosi raawe hayishshi'rona; hawarra geeshshano lagaawinoha ikko.

¹⁷Haaqeete shuma kissinoha gogu woy imaanu uduunnicho hayishshinona; hawarra geeshshano lagaawinoha ikko.

¹⁸Meyatinna labbaahu mitteenni goxe kairo, bisonsa hayishshi'rona; insano hawarra geeshsha lagaawinore ikko.

¹⁹«Godowu dayinose mancho 7 barra lagaabbanno; ise kisannohuno hawarra geeshsha lagaawinoha ikkanno.

²⁰Godowu daannose yannara, goxxannowinna ofoltannowi baalu lagaawinoha ikkanno.

²¹Ma'nase kisinohu imaanasinna bisosi hayishshi'rona; hawarra geeshshano lagaawinoha ikko.

²²Ise ofoltinowa kisinohu imaanasinna bisosi hayishshi'rona; hawarra geeshshano lagaawinoha ikkanno.

²³Goxxinowa woy ofoltinowa kisa, hawarra geeshsha lageessitanno.

²⁴Aye manchino godowu dayino mancho ledo goxiro, 7 barri geeshsha lagaawinoha ikkanno; goxanno ma'nano lagaabbinota ikkitanno.

²⁵«Mitte manchora godowu dayihu gedensaanni, mundee uurritannokkiha sammi yite du'nantannoha ikkiro, godowu daannose yanna gede lagaabbinota ikkitanno.

²⁶Tenne yanna giddo goxxanno ma'nanna ofoltanno dargi baalu lagaawinoha ikkanno.

²⁷Ise goxxinowa woy ofoltinowa kisanno manchi imaanasinna bisosi hayishshi'rona; hawarra geeshshano lagaawinoha ikko.

²⁸Mundee uurrituhu gedensaanni 7 barra keeshshite, seeru garinni keeraa'mitinota ikkitanno.

²⁹Settikki barra 2 lemboolcho woy 2 bukukkaama haadhe, Xaadu Dukkani nafara ane albira abbite qeesichaho uyitona.

³⁰Qeesichuno mitto cubbu kakkalo, layinkiha shilqote kakkalo asse shiqishona. Kunni garinni mancho lagotenni keeraa'mitanno seera wonshona.

³¹«Israeelete manni kunni garinni lagaawanno yannara, ani noommowa Qullaawu Minira shiqqi yaannokki gede hoollensa. Konne agadha hoogguro reyitanno» yiinsa.

³²Siimisi giddonni du'namannori noosihura, haaqeete shuma'ranno manchira, mundeete du'namanni lagaabbino manchoranna ledose goxino manchi lagaawa daafira uyinoonni seeri konneeti.