Read Sidama_Qullaawa _Maxaafa LEEWAAWOOTA 18 Bible Online

LEEWAAWOOTA 18 - Sidama_Qullaawa _Maxaafa bible

LEEWAAWOOTA 18

¹Kaaliiqi Musera,

²«Israeelootaho, ‹Ani Kaaliiqi Magano'neeti;

³heedhinoonni gobba manni Gibitsennihu assannore assitinoonte; haa're masseemmo'ne gobbahu Kana"aani manni assannoreno assitinoonte; wogansano ha'runsitinoonte.

⁴Seera'yanna woga'ya seekkitine agadhe. Ani Kaaliiqi Magano'neeti.

⁵Woga'yanna seera'ya agadhe; konne assitiniro, lubbotenni heedhinanni. Ani Kaaliiqi Magano'neeti.

⁶«‹Ayino fiixisi ledo siimu xaadooshshe assoonke. Ani Kaaliiqaati.

⁷Amakki ledo siimu xaadooshshe assite annakki shollishshooti; iltinoheta amakkino shollishshooti.

⁸Annikki galte ledo siimu xaadooshshe assitooti. Kuni coyi annakki shollishanno.

⁹Rodookki ledo siimu xaadooshshe assitooti; mine ilantinote ledono ikko gobba ilantino beetto amakkite woy annikkite ledo siimu xaadooshshe assitooti.

¹⁰Beettikki beetto woy beettokki beetto ledo siimu xaadooshshe assitooti; kuni coyi umokki shollishannoho.

¹¹Annikki galte annikkira iltino beetto rodookkiitina, ledose siimu xaadooshshe assitooti.

¹²Adakki ledo siimu xaadooshshe assitooti; annikkira maalu fiixaatina.

¹³La'lamakki ledo siimu xaadooshshe assitooti; amakkira maalu fiixaatina.

¹⁴Wosiilikki galte ledo siimu xaadooshshe assite, wosiilakki shollishshooti; iseno amakkiitina.

¹⁵Beettikki beetto ledo siimu xaadooshshe assitooti; ise atera beettikki galteeti.

¹⁶Rodiikki galte ledo siimu xaadooshshe assitooti; kuni coyi rodookki shollishannohona.

¹⁷Amate ledonna beettote ledo siimu xaadooshshe assitooti; beettise beetto ledonna beettose beetto ledono siimu xaadooshshe assitooti; insa maalu fiixakki ikkara dandaannona, kuni makki'nannireeti.

¹⁸Galtekki lubbotenni heedheenna, rodoose ginase assite adhitooti.

¹⁹«‹Godowu daye hee'reennase siimu xaadooshshe assate meyatenniwa martooti.

²⁰Manni galte ledo siimu xaadooshshe assite, umokki batteessitooti.

²¹Oosokki giddonni mittono Molooki yinanni maganira kakkallara uyitooti; togo assatenni ane Maganikki su'mano shollishshooti. Ani Kaaliiqaati.

²²Meyate ledo siimu xaadooshshe assinanninte gede, labbaahu ledono hattoo xaadooshshe assitooti. Kuni Maganu giwanno coyeti.

²³Labbaahano ikko meyati saadate ledo siimu xaadooshshe assitine umo'ne batteessitinoonte. Tini akkimalete.

²⁴«‹Kunni baalunkunni mitturinnino umo'ne batteessitinoonte; albi'nenni shorreemmo daga kunni coyi baalunkunni battaabbinote.

²⁵Baatto nafa gattukkinni battaabbino; anino cubbisera yee qorichishoommose. Kunnira, aanase hee'ranno manna tuffino.

²⁶Ki'ne kayinni, woga'yanna seera'ya agadhe; ki'ne gobbate ilantinoonnirinna giddo'ne heedhannori wole gobba mannino konne busha coye assitinoonte.

²⁷Ki'nera albaanni baattote aana hee'rino manni konne busha coye assino daafira, baatto battaabbino.

²⁸Ki'neno baatto batteessitiniro, albi manna tuffunte gede ki'neno tuffanno'ne.

²⁹Tenne batte assannohu baalu, manni'ya ledo kiiramoonke.

³⁰«‹Hajajo'ya agadhe; ki'nera albaanni baattote aana heedhannori assitino bunshe giddonni mitte bunsheno assitinoonte; kurinni umo'ne batteessitinoonte. Ani Kaaliiqi Magano'neeti› yiino yite kulinsa» yii.