Read Sidama_Qullaawa _Maxaafa LEEWAAWOOTA 20 Bible Online

LEEWAAWOOTA 20 - Sidama_Qullaawa _Maxaafa bible

LEEWAAWOOTA 20

¹Kaaliiqi Musera,

²«Israeelete mannira, ‹Oososi Molookira kakkalannoha, Israeelichano ikko manni gobba mancho mannu baalu kinnatenni gane shoona.

³Ilasi Molookira kakkalatenni Qullaawa Mine'ya batteessinona, qullaawa su'ma'yano shollishinona, hakko manchira diina ikkeemmosi. Manni'ya ledono dikiireemmosi.

⁴Gobbate manni mittu manchi ilasi Molookira kakkalanna afe shaannokkiha sammi yee lairo,

⁵hakko manchiranna maatesira ani umi'ya diina ikkeemmo. Molooki hoode ha'rino manna baala manni'ya ledo dikiireemmo.

⁶« ‹Ekera coyishshiishannoha woshshidhannoriranna qaallichunniwa hadhannorira, diina ikkeemmonsa; manni'ya ledono dikiireemmonsa.

⁷Ki'nenee anera uuyye"e; qullaawootano ikke. Ani Kaaliiqi Magano'neeti.

⁸Qullaawoota asseemmo'nehu ani Kaaliiqaatina, woga'ya agadhe; yoommoreno wonshe.

⁹« ‹Annasi woy amasi xonannohu reyo; annasi woy amasi xonino daafira, sao umisite.

¹⁰« ‹Mittu manchi wolu galte ledo fooriro lamenka shinona.

¹¹Mittu manchi annisi galte ledo siimu xaadooshshe assiro, annasi shollishinona lamenka shinona; sao uminsate.

¹²Mittu manchi beettisi galte ledo siimu xaadooshshe assiro lamenka shinona; makki'nanni coye assitinona lamenka shinona; sao uminsate.

¹³Mittu manchi meyate ledo siimu xaadooshshe assannonte gede, labbaahu ledono hattoore assiro, ani giweemmo coyetina lamenka shinona; sao uminsate.

¹⁴Mittu manchi amanna beetto adhiro, assootisi makki'nanniha ikkino daafira, mereero'ne hattoohu makki'nanni coyi hee'rannokki gede, hakko manchonna meento giirrona.

¹⁵Aye manchino saadate ledo siimu xaadooshshe assiro, isonna hattenne saada shiiyye.

¹⁶Mitte mancho saadanniwa shiqqe siimu xaadooshshe assituro, manchonna hattenne saada shiiyye; sao uminsate.

¹⁷« ‹Mittu manchi annisita woy amasi beetto ikkitinota rodoosi adhiro, assootisi saalsiisannoho; lamunku gosansa mereerinni badante ba'o. Rodoosi ledo siimu xaadooshshe assino daafira xa'mamanno.

¹⁸Mittu manchi godowu daye noo mancho ledo xaadiro, lamunku keeraa'minanni seera huntino daafira, gosansa ledo kiirantoonke.

¹⁹« ‹Adasi woy la'lamasi ledo siimu xaadooshshe assannohu, maalu fiixa shollishshino daafira, lamunku cubbinsara xa'mantanno.

²⁰Wosiilisi galte ledo siimu xaadooshshe assannohu, wosiilasi shollishinona, lamunku cubbinsara xa'mantanno; ilaweelte reyitanno.

²¹Rodiisi lubbotenni hee'reennanni galtesi adhannohu makki'nannire assino; rodoosi shollishinona, lamunku ilaweelte gattanno.

²²« ‹Heedhinara haa're masseemmo'ne baatto tuffanno'nekki gede, woga'yanna seera'ya agadhe; yoommoreno wonshe.

²³Albi'nenni shorreemmo daga woga ha'runsitinoonte; insa konne coye assitino daafira tiyyi'roommonsa.

²⁴Ki'ne kayinni baattonsa ragidhinanni; malawunna ado lolakkanno gobba iqqammo'nera hexxo oommo'ne. Dagatewiinni badoommo'nehu ani Kaaliiqi Magano'neeti.

²⁵Intanni saadanna intannikkita, intanni ceanna intannikkita baddine affe. Battete yoommo'ne saadanni, ceanninna baattote gamba yee ha'rannori baalunni umo'ne lageessitinoonte.

²⁶Ki'ne anera baxxitine qullaawoota ikkitinannie. Ani Kaaliiqi qullaawahona, anere ikkitinanni gede dagate mereerinni badoommo'ne.

²⁷« ‹Mereero'ne ekera coyishshiishannoha woy qaallicha, labbaahano ikko meyata kinnatenni shiiyye. Sao uminsate› yiino yite kulinsa» yii.