Read Sidama_Qullaawa _Maxaafa LEEWAAWOOTA 22 Bible Online

LEEWAAWOOTA 22 - Sidama_Qullaawa _Maxaafa bible

LEEWAAWOOTA 22

¹Kaaliiqi Musera,

²«Israeele anera badde qullaawa assitinota qullaawa kakkalo, ayirrinyunni amada hoogatenni qullaawa su'ma'ya batteessitannokki gede Aarooniranna oososira kulinsa. Ani Kaaliiqaati.

³Dagganno ilamara sirchikki giddonni seeru garinni keeraa'mikkinni Israeele Kaaliiqira badde shiqishshino kakkalo qullaawanniwa shiqannohu, layinkita disoqqamannoe. Ani Kaaliiqaati.

⁴«Aarooni sirchi giddonni taraawannoha gogu dhibba afi'rinohu, keeraa'ma geeshsha qullaawa kakkalo itoonke; reeshshanna reeshshu kisinore kisinohu woy haaqeete shumaa'rino qeesichi lagaawinoho;

⁵woy intannikki saada woy lagaawino mancho kisiro lagaawanno.

⁶Hattoore kisino qeesichi baalu, hawarra geeshsha lagaawinoho; biso hayishshi'rikkinni Kaaliiqita qullaawa sagale itoonke.

⁷Arrishsho e'anno woyite keeraa'manno; hakkunni gedensaanni sagalesi ikkitino daafira, qullaawa kakkalo itara dandaanno.

⁸Lagaawannona reyinohanna moyichu shiinoha itoonke. Ani Kaaliiqaati.

⁹«Qeesootu baalu oommonsa hajajo seekkite buuxxona; hajajo'ya mishatenni sarxaabbannokki gedenna reyitannokki gede agadhitona. Qullaawoota asseemmonsahu ani Kaaliiqaati.

¹⁰Qeesichu maate agurranna, qeesichu wosinchono ikko kiranyu qullaawa kakkalo itoonke.

¹¹Kayinnilla qeesichaho woxunni hidhinohu woy minesi ilamino borojjichi hee'risiro, isira iillanno qeechinni itara dandaanno.

¹²Qeesichu beetto qeesicha ikkinokkihura mine assidhuro, qullaawa kakkalo ita didandiitanno.

¹³Ikkollana ayiddaannise reyiro woy fulte hadhuro, ooso iltinokkiha ikkironna seennimmase yanna gede annise mine heedhara wirri yite higguro, annise qeechinni ita dandiitanno. Qullaawa kakkalo qeesichu maate calla ita dandiitanno.

¹⁴«‹Ayino so'rotenni qullaawa kakkalo itiro, itinohu aana ontikki anga lede qeesichaho riqiwona.

¹⁵Israeelootu Kaaliiqira shiqishshannota qullaawa kakkalo qeesootu lageessitoonke.

¹⁶Tenne qullaawa kakkalo keeraa'minokkihu ite sao assanno gedenna qorichishamanno gede assitoonke. Qullaawoota asseemmonsahu ani Kaaliiqaati› yiino yite kulinsa» yii.

¹⁷Kaaliiqi Muse,

¹⁸«Aaroonira, oososiranna Israeele baalantera, ‹Ki'ne giddonni aye Israeelichino ikko Israeelete giddo hee'rannohu manni gobba manchi xano woy baxe afansha anera shilqote kakkalora abbannoha ikkiro,

¹⁹kakkalo'ne adheemmota ikkitanno gede, muso afi'rinokki woraamo woy ge'rechu goco woy meichu goco shiqishona.

²⁰Muso afidhinota aye saadano shiqishshineenna diadheemmo.

²¹Ayino xano tidhara woy baxe lalu giddonni woy ge'reewu giddonni woy meu giddonni anera mittimmate kakkalora afansha aanno woyite adheemmosi gede, mucci yiinohanna muso afi'rinokkiha shiqishona.

²²Ballicha woy hiiqqancho woy dincho woy cine woy qadu woy maliitanno mada noo saada anera shiqishshinoonte. Kuri giddonni mitto nafa kakkallanni darga shilqote kakkalora anera shiqishshinoonte.

²³Saada'ne giddonni lekka taalinokki booto woy ge'recho baxxine afansha assitine aa dandiitinanni; ikkollana hattoohu xano tidhate di"ikkanno.

²⁴Tummoonnita woy kolaansoonnita mayi gari saadano anera shiqishshinoonte. Tenne baattora heedhinoonni geeshsha hattoore assitinoonte.

²⁵Hattoo saada wole gobba manniwiinni haadhine ane Magani'nera kakkalo assitine shiqishshinoonte. Muso afi'rinore ani diadheemmo› yiino yite kulinsa» yii.

²⁶Kaaliiqi Musera,

²⁷«Siitu woy ge'rechu woy meichu wilii'lichi qalamanno yannara, 7 barra amasi ledo keeshshona; settikki barri ka'a kayinni anera kakkalote shiqisha dandiinanni.

²⁸Saa siitise ledo, ge'recho woy meicho wilii'lichise ledo mitto barra gorritinoonte.

²⁹«Ane Kaaliiqira galatu kakkalo shiqishshinanni woyite, kakkalo'ne adheemmo gede assitine shiqishshe.

³⁰Kakkalo hakko barranni intona; layinki soodora gashshitinoonte. Ani Kaaliiqaati.

³¹«Hajajo'ya agadhe; yoommoreno wonshe. Ani Kaaliiqaati.

³²Qullaawa su'ma'ya batteessitinoonte; ani qullaawa ikka'ya Israeelete mereero egennanto. Qullaawoota asseemmo'nehu ani Kaaliiqaati.

³³Magano'ne ikkammora Gibitsete gobbanni fushshoommo'ne. Ani Kaaliiqaati» yii.