Read Sidama_Qullaawa _Maxaafa LEEWAAWOOTA 27 Bible Online

LEEWAAWOOTA 27 - Sidama_Qullaawa _Maxaafa bible

LEEWAAWOOTA 27

¹Kaaliiqi Musera,

²«Israeelootaho, ‹Aye manchino anera manna aate xano xa'niro,

³lemuunni kayise leyawu diri geeshsha noohura labbaahura, Qullaawu Mini birri kinchunnihu[3] deerrinni 50 birra oona.

⁴Meyata ikkituro 30 kinchu birra oona.

⁵Ontunni kayise 20 diro ikkinosihura, labbaaha ikkiro 20, meyata ikkituro 10 kinchu birra oona.

⁶Dirisi 1 aganinni kayise 5 diri geeshsha ikkinohura, labbaaha ikkiro 5, meyata ikkituro 3 kinchu birra oona.

⁷Dirisi 60 woy hakkuyira aleenni ikkinosi manchira, labbaaha ikkiro 15, meyata ikkituro, 10 kinchu birra oona.

⁸Xa'ninohu buxicho ikkironna hendoonniha aate dandaa hoogiro kayinni, aara hedinoha haa're qeesichunniwa abbona; qeesichuno xa'nino manchi wolqasi geeshsha aanno gede assona.

⁹« ‹Manchu xa'ninoti anera kakkalote ikkitanno saada ikkituro, anera qullaawa ikkitanno ikkinnina woxxa didandiinanni.

¹⁰Mittu manchi wole saada oonke; balaxe uyinota soorrara hediro, lamenti saada anera qullaawa ikkitanno.

¹¹Kakkallannikki saada ikkituro, aanno manchi qeesichunniwa haa're shiqishona.

¹²Seekkurono woy seya hooggurono, qeesichu waaga hedeenna, isi yiino waagi garinni ikkona.

¹³Manchu saada woxxate hasi'riro kayinni, hendoonni waagi aana ontunni mitte anga leda hasiissannosi.

¹⁴« ‹Mittu manchi minesi anera ikkanno gede uyiro, dancha ikko ikka hoogo, qeesichu minu fushshanno waaga hedona; qeesichu hedino waagi disoorramanno.

¹⁵Manchu minesi galagalche qo'lara hasi'riro kayinni, hendoonni waagi aana ontunni mitte anga ledona.

¹⁶« ‹Mittu manchi iqqisi aaninni bade anera loosi'nanni uulla uyiro, waaga aanase winxanni wixi deerrinni hendona; hakkuno, 20 kiilo hayixira 50 kinchu birra aanno yaate.

¹⁷Manchu uullasi wolaphote ayyaani sa"anni hee'reennanni uyinoha ikkiro, hendoonni waaga gudise oona.

¹⁸Uullasi wolaphote ayyaani gedensaanni aannoha ikkiro kayinni, qeesichu waaga daanno ayyaani wolaphonnihu geeshsha noo diri bikkinni hedona; hendoonni waagano dirrosina.

¹⁹Uulla uyino manchi galagalche qo'lara hasi'riro, waagu aana ontunni mitte anga leda hasiissannosi; hakkunni gedensaanni uulla umisita ikkitanno.

²⁰Uullasi woxxa agure wolu manchira hiriro, hakkunni gedensaanni qo'lara didandaanno.

²¹Uullasi wolaphote ayyaanira qo'lannokkiha ikkiro, anera uyinoonni uulla gede kiirante qullaawanna qeesootunnita ikkitanno.

²²« ‹Mittu manchi iqqasi ikkitinokkita woxisinni hidhino baatto anera uyiro,

²³qeesichu uullate waaga wolaphote diri geeshsha noo yanna bikkinni hedona; manchuno hendoonni waaga anera qullaawa asse hakko barranni oona.

²⁴Wolaphote diro, uulla albihu iqqu annira woy oososira higganno.

²⁵Mittu mittunku waagi, worroonni keenaasinchi Qullaawu Minihu garinniiti.

²⁶« ‹Saadannihu umihu albanni aneha ikkinohura, banxe uyinanni afansha asse aate didandiinanni; umo qalaminohu siitono ikko wilii'lichu albanni aneho.

²⁷Kakkallannikki saada ikkituro kayinni, annu hendoonni waagi aana ontunni mitte anga lede woxxara dandaanno; qo'lannokkiha ikkiro, hendoonni waagira hirrona.

²⁸« ‹Anera yine langoonnire baala, mannano ikko saada woy raggete baattono ikkito dihirranni; diinowondanni. Anera yine langoonniri baalu horontanni qullaawaho.

²⁹ Anera yine langoonniha manna nafa diwondanni; shaa hasiissanno.

³⁰« ‹Loosi'ne afi'nannihano ikko haqqete laalo, baattotenni afi'nannihu tonnunni mitte anga gudisante anete; kunino anera qullaawaho.

³¹Tonnunni mitto woxxara hasi'rihu, waagu aana ontunni mitte anga leda hasiissannosi.

³²Lalu, ge'reewunna meu giddonni kiirranna wodambu kisannohu tonnunni mittu aneho; tonnikkihu anera qullaawaho.

³³Saadate annino danchanna busha badoonke; woy ko'onne ku'unninni soorroonke; togo assannoha ikkiro, lamenti saada qullaawootaho; wondara didandiinanni› yiino yite kulinsa» yiisi.

³⁴Kaaliiqi Siina Ilaalira Muse widoonni qole Israeelete mannira uyino hajajo tenneeti.