Read Sidama_Qullaawa _Maxaafa LEEWAAWOOTA 4 Bible Online

LEEWAAWOOTA 4 - Sidama_Qullaawa _Maxaafa bible

LEEWAAWOOTA 4

¹Kaaliiqi Muse,

²«Israeelete mannira togo yite kulinsa: Aye manchino afikkinni cubbo loosiro, ani Kaaliiqi assitinoonte yoommohu giddonni mitto coye nafa sairo,

³qeesootu qarino cubbo loose mannu aana sao abbiro, loosino cubbira mitto muso afi'rinokki middicha abbe cubbisi daafira, anera kakkalo asse shiqishona.

⁴Booto Dukkanu xullichira abbe, angasi bootu umi aana wore, alba'yaanni gorrona.

⁵Hakkunni gedensaanni, qeesootu qari shiima bootu mundee haa're, Dukkanu giddora eona.

⁶Qullaawa Holge uddanotenni dukkinoonni dukkora albaanni uurre, mundee qubbichisinni kisanni ane albaanni 7 hige wixona.

⁷Qoleno, shiima mundee haa're, Dukkanu giddo hixaana giirranni uduunnichira shoolente maddera nootera shoolente buudda aana coccossona. Gattino mundee Dukkanu xullichi hunda shilqinshanni kakkalo darga dunona.

⁸Cubbu daafira, kakkalote shiqanno booti cooma baala, godowiru cooma,

⁹mulenna aanasi noo cooma, hattono qaccete afale fushshona.

¹⁰Qeesootu roorrichi, mittimmate kakkalora shiqinshanni garinni shiqishe, shilqote kakkalo shiqinshanni dargira haa're massona.

¹¹Ikkollana kayinni, bootu goga, maala baala, umonna daduwe, godowire baala helleete ledo,

¹²kakkalote seeri garinni, qachaho gobbaanni langoonni darga buluulo tunganniwa masse gamba yiino buluuli aana haqqe wore giirona.

¹³«Israeelete songo baalanti affukkinni cubbo loossuha ikkiro, hajajo'ya giddonni mitte xeisse sao assituro,

¹⁴sao assansa buuxxanno yannara, cubbu kakkalora mitto middicha Xaadu Dukkani albira shiqishshona.

¹⁵Gosate geerri angansa middichu umi aana worte ka'e, ane albaanni gorritona.

¹⁶Qeesootu roorrichino middichunnita shiima mundee haa're, Xaadu Dukkani giddora e"e,

¹⁷uddanotenni dukkinoonni dukko albaanni uurre mundee qubbichunni kisanni 7 hige ane albaanni wixona.

¹⁸Qoleno, shiima mundee haa're Xaadu Dukkani giddo ane albaanni nootera hixaana giirranniwa shoolente maddera noo budda aana coccossona. Gattino mundee gudise Xaadu Dukkana e'nanniwa shilqote kakkalo shiqinshanni dargira woroonni dunona.

¹⁹Cooma baalanka haa're, shilqote kakkalo dargira shiqishona.

²⁰Konne middicha cubbu daafira shiqinshanni kakkalo garinni shiqinshona; gosate cubbi aguramanno gede, qeesootu qari kakkalo kunni garinni shiqishona.

²¹Hakkunni gedensaanni, middicha qachaho gobbaanni fushshe, umisi cubbira shilqishi middichi gede asse shilqishona. Tini gosate cubbo hoolate shiqinshanni kakkalooti.

²²«Mittu gosate sooreessi afikkinni cubbo loose hajajo'ya giddonni mitte hunatenni sao assiro,

²³cubbo loosasi buuxihu gedensaanni, muso afi'rinokkiha mitto meichu goco umisi kakkalo asse shiqishona.

²⁴Angasino gocu umi aana wore, kakkallannihura aliyyeenni shilqinshanni kakkalora gorrinanniwa masse gorrona. Tinino cubbo hoolate kakkalooti.

²⁵Qeesichuno kakkalote mundee qubbichunni haa're, shilqote kakkalo shiqinshanni darga shoolente maddera noo buudda baalate kisiisona. Gattino mundee kakkallanni dargira woroonni dunona.

²⁶Mittimmate kakkalora shiqinshinte gede, cooma baalanka kakkallanni darga shilqishona. Kunni garinni qeesichu kakkalino kakkalo gosate sooreessi cubbo hooltanno.

²⁷«Mereerimu manni giddonni mittu afikkinni cubbo loose, hajajo'ya giddonni mitte xeisatenni sao assiro,

²⁸sao assasi buuxihu gedensaanni, muso afidhinokki meicho loosino cubbira umisi kakkalo asse shiqishona.

²⁹Angasino shiqishino meicho umi aana wore, kakkallannihura aliyyeenni shilqote kakkalora gorrinanniwa masse gorrona.

³⁰Qeesichuno shiima mundee qubbichunni haa're, shilqote kakkalo shiqinshannitera shoolente maddera noo buudda baalate kisiisona. Gattino mundee kakkallanni dargira woroonni dunona.

³¹Mittimmate kakkalora shiqinshanni saada cooma baala assinanninte gede bade fushshe, anera tashshi yitanno kakkalo asse kakkallanni darga shilqishona. Qeesichu kunni garinni kakkaleenna manchoho cubbisi aguramannosi.

³²«Manchu afikkinni loosino cubbi daafira ge'recho shiqishannoha ikkiro, muso afidhinokkita ikkitona.

³³Angasi ge'rechote umi aana wore, shilqote kakkalo kakkallanni dargira aliyyeenni masse gorrona.

³⁴Qeesichuno shiima mundee qubbichunni haa're, shilqote kakkalo shiqinshanni darga madde baalate kisiisona. Gattino mundee kakkallanni dargira woroonni dunona.

³⁵Mittimmate kakkalora shiqinshanni garinni, ge'rechote cooma baala bade fushshe, kakkallanni darga anera uyinanni fushshaati sagalennihu ledo shilqishona. Qeesichu kunni garinni kakkaleenna manchoho cubbisi aguramannosi.