Read Sidama_Qullaawa _Maxaafa LEEWAAWOOTA 5 Bible Online

LEEWAAWOOTA 5 - Sidama_Qullaawa _Maxaafa bible

LEEWAAWOOTA 5

¹«Mittu manchi yoote minira woshshineenna mare, afinore woy lainore farci'ra giwiro, hakko coyira isi xa'mamanno.

²«Mittu manchi afikkinni seerunni hoolloonnire batte ikkinore woy reyitino saada kisiro, hakku manchi battaawinoho; saono assino.

³«Woy afikkinni mannimmate giddonni fulannore batte ikkinore kisiro, assino coyi sao ikkinota afanno yannara, cubboho kiiramannosi.

⁴Mittu manchi danchanna busha badikkinni mulla kae xano xa'niro, assinoti so'ro ikkitinota afanno yannara, cubboho kiiramannosi.

⁵«Aye manchino kuri giddonni mitte sao assiro, assino saora mannu albaanni ifaaxxa[1] hasiissannosi.

⁶Cubbisi qorichirano, mitte ge'recho woy meicho cubbu kakkalora anewa shiqishona; qeesichuno cubbisira kakkalona.

⁷«Manchu loosino cubbira ge'recho shiqishanno wolqa hoogiro, 2 lemboolcho woy 2 bukukkaama kakkalote anera shiqishona. Mitte cubbu kakkalora, layinkita shilqote kakkalora shiqishona.

⁸Insano qeesichunniwa abbeenna, qeesichuno mitte haa're cubbu kakkalora goowa murikkinni haxo micciirona.

⁹Mundee haa're kakkallanni darga mitte maddera wixona. Gattino mundee kakkallanni dargira woroonni coccossona. Tini cubbo agursiissanno kakkalooti.

¹⁰Qeesichu seeru garinni layinkita shilqote kakkalo asse shiqishona; qeesichu kunni garinni kakkaleenna manchoho cubbisi aguramannosi.

¹¹«Manchu 2 lemboolcho woy 2 bukukkaama shiqishate wolqa hoogiro, mitto safaraasincho liiqo bullee cubbu kakkalora haa're abbona. Tini kakkalo cubbo agursiinsannite ikkinnina gidu fushshaate ikkitinokki daafira, zayite woy hixaana aanaho worroonke.

¹²Hakkunni gedensaanni, manchu bullee haa're qeesichunniwa abbona; qeesichuno bulleete aaninni qaaggote fushshaate asse mitto hoowo haa're wole kakkalo ledo mitteenni shilqishona. Tinino cubbo agursiissanno kakkalooti.

¹³Qeesichu kunni garinni hakko manchi cubbira kakkalo shiqisheenna cubbisi aguramannosi. Kakkalotenni gattino bullee gidu fushshaati shiqanno garinni qeesichunnita ikkitanno» yii.

¹⁴Kaaliiqi Musera,

¹⁵«Mittu manchi ane Kaaliiqiha ikkinore baala afa hoogatenni shiqishikkinni gate sao assiro, mitto muso afi'rinokkiha ge'rechu woy meichu goco sao agursiisate kakkalo asse shiqishona; woy gocu fushshanno waaga Qullaawu Mini seeri garinni hendeenna woxe oona.

¹⁶Alba aate hedinori giddonni gatinori hee'riro, hakkunni aana lede mitteenni asse ontunni mitte anga lede abbe qeesichaho oona. Qeesichuno saada haa're hakko manchi cubbi daafira kakkalo asse shiqisheenna, sao assino manchira cubbisi aguramannosi.

¹⁷«Aye manchino afikkinni cubbo loose, hajajo'ya giddonni mitticho xeisiro, sao assasinni xa'mamanno.

¹⁸Saadasi giddonni mitto muso afi'rinokki ge'recho woy meicho saosira kakkalanno gede qeesichunniwa haa're abbona; woy gocu fushshanno waaga gobbate wodho garinni hendeenna woxe oona. Qeesichuno manchu cubbira kakkalo shiqisheenna, sao assino manchira cubbisi aguramannosi.

¹⁹Tinino manchu assino sao hoolate daafira anera shiqinshanni kakkalooti» yii.