Read Sidama_Qullaawa _Maxaafa LEEWAAWOOTA 6 Bible Online

LEEWAAWOOTA 6 - Sidama_Qullaawa _Maxaafa bible

LEEWAAWOOTA 6

¹Kaaliiqi Musera,

²«Aye manchino maaxasira uyino jajja ho'latenni, woy mooratenninna hanaaqe adhatenni,

³woy bainoricho afe hee're, diafoommo yee xaaratenni sao assiro, kakkalo shiqishona.

⁴Aye manchino hattoo coye assiro, umisiha ikkinokkire baala qola hasiissannosi.

⁵Sao assinota afanno barra, adhinore baala ontunni mitte anga aanaho lede annaho qolona.

⁶Assino saora saadasi giddonni mitto muso afi'rinokkiha ge'rechu woy meichu goco abbona; woy fushshitanno waaga gobbate wodho garinni hendeenna woxe oona.

⁷Qeesichuno cubbisi daafira kakkalo shiqisheenna manchoho assino cubbi baalu aguramannosi» yii.

⁸Qoleno Kaaliiqi Musera,

⁹«Aarooniranna oososira kunnira woroonni nooha shilqote kakkalo seera kulinsa: Shilqote kakkalo hashsha wo'ma kakkallanni darga worreenna giirano bubbanni galtona.

¹⁰Layinki soodo qeesichu shaalado uddano, waajjo uddano giddoyidite ledo uddi're, shilqinshoonni kakkalo giira itte gudduhu gedensaanni, buluulo fee kakkallanni dargira woroonni dunona.

¹¹Hakkunni gedensaanni uddanosi soorri're, hakkonne buluulo haa're qachu gobbaanni lagote bayicho masse dunona.

¹²Kakkallanni darga noo giira horonta xoa dihasiissanno. Qeesichuno soodanno kiiro haqqe woranni, shilqote kakkalo qixxeesse mittimmate kakkalora cooma shilqishona.

¹³Giirano xo'ukkinni wo'manka woyite kakkallanni darga bubbona.

¹⁴«Gidu fushshaate shiqinshanni seeri kunninni aane nooho: Aarooni sircho ikkino qeesichi gidu fushshaate kakkallanni dargira albaanni albi'yara haa're shiqishona.

¹⁵Qeesichuno gidu fushshaatita hoowo liiqo bullee, zayitetenna hixaanu baalu ledo qaaggote fushshaate shilqote kakkalo dargira shiqishona. Tenne kakkalo foolino anera tashshi yaannoha ikkanno.

¹⁶Hakkiinni gatinoha qeesootu ittona; tima shiishikkinni ganneenna, Xaadu Dukkani qooxeessira ofolte ittona. Ani konne gidu fushshaati gede qeesootaho qeechansa asse oommo. Kunino lowo geeshsha qullaawaho.

¹⁸Dagganno ilamara, ayino Aarooni sircho ikkinohu labbaahu baalu konne tima ita dandaanno. Tini anera shilqinshanni kakkalooti; qeesoota agurranna konne kisannohu baalu lagaawanno» yii.

¹⁹Kaaliiqi Musera,

²⁰«Aarooni sirchi qeesimmate buuramanno barra, anera wo'manka woyite gidu fushshaatira shiqinshanni geeshshita mitte kiilo liiqo bullee, darate soodo, darate hawarro shiqishona.

²¹Zayite karsine mixashshote aana gannona; raihu gedensaanni, hiiqqaqqe gidu fushshaate asse anera shiqishona. Kunni fushshaati foolino anera tashshi yaannoha ikkanno.

²²Qeesimmate buuraminohu Aarooni sircho ikkinohu baalau, konne seera wonsha, kunni aaninni ayino itannokki gedenna fushshaatu baalunku shilqino gedeenni buuxa hasiissannosi» yii.

²⁴Qoleno Kaaliiqi Musera,

²⁵«Aarooni sirchira togo yite kulinsa: Kuni cubbu fushshaati daafira uyinoonni seeraati; cubbu fushshaatira gorrinanni saada, shilqinshanni kakkalora gorrinanni dargira aliyyeenni gorrinona. Kunino lowo geeshsha qullaawaho.

²⁶Kakkalo shiqishanno qeesichi intara fajjinoonniha Xaadu Dukkani gaangaawira tenne hajora bandoonni darga masse itona.

²⁷Hakkonne maala kisannohu baalu lagaawanno; tini mundee kissino uddano baalanta masse qullaawa darga hayishshi'rona.

²⁸Qeesichu maala ganfoonni midaancho hiiqqona; camotenni seekkinoonni uduunnicho ikkiro kayinni, seekke rige wayinni hayishshona.

²⁹Qeesootu sircho ikkinohu labbaahu baalu konne fushshaate itona. Kunino lowo geeshsha qullaawaho.

³⁰Cubbo agursiisate yine mundee Qullaawu Minira eessinoonniha ikkiro, maala ita dihasiissanno; tenne kakkalo gudinse shilqisha hasiissanno.