Read Sidama_Qullaawa _Maxaafa LEEWAAWOOTA 9 Bible Online

LEEWAAWOOTA 9 - Sidama_Qullaawa _Maxaafa bible

LEEWAAWOOTA 9

¹Buurate seera wonshinoonni lamala wo'mituhu gedensaanni layinki barra Muse Aarooninna oososi, hattono Israeelete geerra woshshe,

²Aaroonira, «Muso afi'rinokki middichanna ge'rechu goco haadhe, middicha cubbu kakkalora, goco kayinni shilqote kakkalora Kaaliiqira shiqishi.

³Israeelete mannirano, cubbu kakkalora mitto meichu goco, shilqote kakkalora muso afi'rinokkiha mittu diri bootonna mittu diriha ge'rechu goco,

⁴mittimmate kakkalora mitto woraamo, mitto ge'rechu goco, zayite worroonni fushshaati gidunnihu ledo, kakkalote ikkanno gede Kaaliiqi albira shiqishanno gede mannaho kuli. Konne assitinannihu techo Kaaliiqi leellanno'ne barra ikkinohuraati» yiisi.

⁵Insano Muse hajajinonsaha baala Xaadu Dukkani nafarira haadhe abbitu; mannu baalunku Kaaliiqa magansi'rara hakkiicho gamba yii.

⁶Museno, «Kaaliiqi ayirrinyisi baalunkunni leellanno'ne gede, konne assitinara hajajino'ne» yiinsa.

⁷Hakkunni gedensaanni Muse Aaroonira, «Kakkallanniwa marte umikkihanna mannu cubbo agursiisate cubbu kakkalonna shilqote kakkalo shiqishi. Tenne baalanta kakkalo mannu cubbo tirate Kaaliiqi hajajino garinni shiqishi» yiisi.

⁸Aaroonino kakkallanniwa mare, balaxe umisi cubbo tidhate middicha gorri.

⁹Oososino mundee haadhe uyiteennasi, qubbichunni kisanni kakkallanni darga shoolente maddera noo buuddara gani; gattino mundeeno kakkallanni dargira woroonni duni.

¹⁰Hakkunni gedensaanni cooma, mulenna qaccete afale cooma haa're, Kaaliiqi Muse hajajinonte gede, kakkallanni darga masse shilqishi;

¹¹maalanna goga kayinni, qachaho goobbaanni fushshe giiri.

¹²Hakkunni gedensaanni, Aarooni balaxe ge'rechu goco shilqote kakkalora gorri; oososi mundee haadhe uyiteennasi, kakkallanni darga shoolunku midaadira wixi.

¹³Oosono qolte, gocunniha addi addi maalanna umo haadhe uyitusi; isino hakkonne baala kakkallanni darga masse shilqishi.

¹⁴Hakkunni gedensaanni, godowirenna badhiidi dadubba hayishshe, kakkallanni darga masse wole shilqote kakkalo ledo shilqishi.

¹⁵Qoleno Aarooni umisi cubbira middicha gorrinte gede, mannu cubbi daafirano meichu goco gorri.

¹⁶Shilqote kakkalora shiqino goco, uyinoonni seeri garinni kakkali.

¹⁷Gidu fushshaateno abbe, barru barrunkunni shiqinshanni fushshaati aana lede, bullee mitto hoowo wo'ma haa're, kakkallanni darga masse shilqishi.

¹⁸Aaroonino, mannu mittimmate kakkalora shiqishino bootonna ge'rechu goco gorri; oososino mundee haadhe uyiteenna, kakkallanni darga shoolunku midaadira wixi.

¹⁹Bootu coomanna ge'rechu goci farro coomunkunni, godowiru cooma, hattono mulenna qaccete afale haa're,

²⁰rachuwate aana wori; Aaroonino cooma haa're, kakkallanni darga masse shilqishi.

²¹Rachuwanna qiniiticho bootunna ge'rechu haye haa're, Muse hajajinonte gede Kaaliiqira addi fushshaate asse shiqishi.

²²Aarooni tenne kakkalo baala shiqishe, angasi mannu aana diriirse maassi'rihu gedensaanni, kakkallanni darginni dirri.

²³Musenna Aarooni Xaadu Dukkana e'e fulte, manna maassidhu. Kaaliiqi ayirrinyino manna baalaho leelli.

²⁴Kaaliiqi hedeweelcho giira soyenna, kakkallanni darga nooha shilqote kakkalonna cooma baala ittu. Mannuno konne lae ilillisanni, umunni baatto kisanni Kaaliiqa ayirrisi.