Read Sidama_Qullaawa _Maxaafa ERMIYAASI 1 Bible Online

ERMIYAASI 1 - Sidama_Qullaawa _Maxaafa bible

ERMIYAASI 1

¹Kuni maxaafi, Biiniyaami ga're iqqi giddo Anatooti yinanni qachira heedhanno qeesooti giddonni mittu Hiliqiya beetti Ermiyaasi kulino sokka amadinoho.

²Amooni beetti Iyosiyaasi Yihudaho moohihunni tonaa sayikki diro Kaaliiqi qaali Ermiyaasiwa dayi.

³Qoleno Iyosiyaasi beetti Iyoaaqeemi moohi yannarano Ermiyaasira coyi'rino. Hakkunni gedensaannino Iyosiyaasi beetti Sedeqiyaasi moohe noo yannanni kayise tonaa mitikki diro, ontikki aganira Yerusaalamete manni qafadame ha'ri geeshsha noo yannare coyi'rino.

⁵«Ermiyaasi, amakki godowi giddo kalaqammohera albaanni afoommohe; amakki godowi giddonni fulittokkinni baxxoommohe; dagateno himanaancho asse doodhoommohe» yiie.

⁶Anino, «Mooticha Kaaliiqa'ya, kuneeti ani shiima beetto ikkoommo daafira coyi'nanni gara diegennoommo» yee dawaroommosi.

⁷Kaaliiqi kayinni, « ‹Ani shiimaho› yitooti. Ati ani soyemmohewalla ha'ratto; ani yuummohere baala mannaho kulatto.

⁸Ani ledokki hee're agareemmohe daafira, manna horontanni waajjitooti; coyi'ranni noommohu ani Kaaliiqaati» yiie.

⁹Hakkunni gedensaanni Kaaliiqi angasi diriirse suume'ya kise, «Kuneeti coyi'ratto qaale oommohe.

¹⁰Kune techo, buqqisattonna diigatto gede, hunattonna galchatto gede, minattonna kaasatto gede dagatenna gashshootu baalu aana roorre oommohe» yiie.

¹¹Kaaliiqino, «Ermiyaasi, maricho la'anni nootto?» yee xa'mie. Anino, «Kookete haqqicho sina la"anni noommo» yee dawaroommosi.

¹²Kaaliiqino, «Dancha laootto; anino hattonni qaali'ya wo'manno gara buuxe la"anni noommo»[1] yiino.

¹³Layinkimeeshshono Kaaliiqi, «Wolu la'anni noottori maati?» yee xa'mie. Anino, «Aliyye widoonni hufanni nooha mitto gambayicho la"anni noommo. Isino Yihudu widira hige haawee no» yee dawaroommosi.

¹⁴Kaaliiqino, «Aliyye raginni bao fulte tenne baattora hee'rannohu baalu aana dirritanno.

¹⁵Kune lai, ani aliyyeenni heedhanno daga baala kawa dagganno gede woshsheemmo. Konne coye coyi'roommohu ani Kaaliiqaati. «Insano Yerusaalamete qooxeessira heedhannota Yihudu katamma baala amadde gashshootensa halashshidhanno.

¹⁶Manna'ya bunshe loosino daafira qorichisheemmo. Insa ane agurte wole kaphu magannara hixaana giirtanno; misile angansanni seekkidhe insara kumbuultanno.

¹⁷Ati kayinni qixxaawi; marte ani hajajeemmohere baala kulinsa. Insa waajjitooti; waajjittoro kayinni roore waajjattonsa gede asseemmohe.

¹⁸Ermiyaasi, yeemmohere macciishshie! Tenne baattora heedhannori, Yihudu mootoolla, gashshaano, qeesootinsanna manninsa ate aana ola kayissanno. Ikkollana diqeeltannohe; insa qeelatto gede wolqa'ya qiinshoonni katami gede jawaata assitannohe. Siwiilu tuuqi gedenna camote huxxi gede asseemmohe. Ani atera gaarameemmohe daafira insa qeeltahera didandiitanno. Konne coye coyi'roommohu ani Kaaliiqaati» yii.