Read Sidama_Qullaawa _Maxaafa ERMIYAASI 2 Bible Online

ERMIYAASI 2 - Sidama_Qullaawa _Maxaafa bible

ERMIYAASI 2

²«Yerusaalame marte mannaho, «Kaaliiqi yaannore macciishshe: Ati seemo nootta waro, mageeshshi geeshsha ammanamoottaro qaageemmo. Idayichimma nootta warono, mageeshshi geeshsha baxattaero seekke afoommo. Halallitte gobbara mitturi nafa mu'rannokkiwa, ane hoode ha'rootta.

³Israeele ati anera umi laalchooti; ati anera baxxootta qeechaati. Kunni daafira ate gawajjate hasi'rannohu baalu aana, qarranna mitiimma dirrisoommo. Konne coye coyi'roommohu ani Kaaliiqaati» yii.

⁴Ki'ne Yaiqoobi sirchi, Israeelete ilama baala, Kaaliiqi coyi'rannore baala macciishshe.

⁵Kaaliiqi, «Akaakka'ne anewiinni ma"asseennansa faffino? Kaphu maganna magansidhanni insanaa mullare assitino.

⁶Ani insa wode, Gibitsete gobbanni fushshoommonsa; halallitte baattorano massagoommonsa; boonna batidhino baatto, moollenna qarru bati'rino darga, ayino hee'rannokkiwanna, milli yaannorichi nookki widoonni qole sayisoommonsa. Insa kayinni, ‹Togo assinke Magani hiikki?› yite dihasidhinoe.

⁷Laalchosenna wole atoote baala ittanno gede, danchanna shaqqado gobba haa're abboommonsa. Insa kayinni baatto'ya batteessitu; iqqa asse oommonsata baatto'ya huntu.

⁸Qeesootuno, ‹Kaaliiqi hiikko no?› yite dihasidhinoe; aneno diegentinoe. Gashshaanonsano anera maahoyye gibbu; himanaanono Ba"aali su'minni himana coyidhu; kaa'litannokkita kaphu maganna magansidhu» yii.

⁹Qolleno Kaaliiqi, «Ani Kaaliiqi ki'ne xaano yoote dargira haa're masseemmo; ki'nenna ilama'ne yoote dargira haa're masse, bunshe'ne kuleemmo.

¹⁰Galchimi ragaanni higgine Qophiroosi Giddicho tayissine sa'iniro nafa, woy soojjaati ragaanni higgine Qeedaari baatto iillitinirono, kunninni aane noo coye ikkannoro hanni la'e:

¹¹Halaalaano maganna ikka hoogguro nafa, magannansa soorridhinoti wole gosa dino. Ki'ne ayirrinye'ya uddisiisoommo'neri, manni'ya kayinni ane Magano'ne agurtine, mittoreno kaa'litannokkirinni, kaphu magannanni soorritinoonnie.

¹²Kunnira ani Kaaliiqi, gordu baalu waajje, mase huxi'ranno gede hajajeemmo.

¹³Ki'ne manni'ya 2 cubbo loossinoonni; heeshshote buicho ikkoommoha ane agurtinoonnie; waa ki'annokkita foonfa balla u'mitinoonni» yii.

¹⁴Lede Kaaliiqi, «Ki'ne Israeelete manni borojjimmatenni di"ilantinoonni; diinna'ne kayinni qafadde mulqidhanno'ne.

¹⁵Diinna'ne doobbiyu gede ittantu; baatto'ne mullicho assitino; katamma'neno giirante mannu hee'rannokkita ona ikkitino.

¹⁶Memfiisinna Xafinaasi yinanni katammanni dagginori, sammo'ne cancantino.

¹⁷Kuni ikkinohuno massageemmo'neha, ane Magano'ne Kaaliiqa agurtineennaati.

¹⁸Xa Gibitse mayira addaxxitini? Abbayi Waa aga hasidhineetini? Asoori mayira addaxxitini? Efiraaxisi Waa aga hasidhineetini?

¹⁹Umi'ne bunshe qorichishshanno'ne; anera badhe wodha'ne qoricha abbitanno'ne. Ane Magano'ne Kaaliiqa agura'nenna, anera uyitinanni ayirrinye ho'la'ne, mageeshshi geeshsha qaraaronna bunshe ikkitinoro affinanni. Konne coye coyi'roommohu ani Olantote Mootichi Kaaliiqaati» yii.

²⁰Kaaliiqi qole, «Ki'ne Israeele, kuneeti lowo yannanni kayissine, qambara'ne hiiqqidhine usura'neno tidhitinoonni; soqqamanna magansi'ra gibbinoonnie. Jajjabba ilaallaranna lowiddaanna haqqe hunda, wole maganna ledo foortinoonni.

²¹Ani danchu dooraminohu woyinete kaashshi gede asse kaasoommo'ne; ki'ne kayinni soorrantine dubboho bainohu woyinete kaashshi gedeere ikkitinoonni.

²²Haraanjunninna lowo saamuninni hayishshidhinirono, sao'ne xuri ane albaanni gudisame leellanno.

²³‹Umonke dibatteessinoommo; kaphu maganira Ba"aalira horonta dikumbuulloommo› yitine mayira morontinanni? Lagichaho cubbo loossine assitinoonni batte hanni la'e; labbaa gaala hasidhanni raataabbanno gaala gede, ki'neno wole maganna magansi'rate hatto ikkitinoonni.

²⁴Dubboho hee'ra rossinoti gobba harricho, kormitara hasidhanno yannara, ittisasera dandaannohu nooni? Gobba heedhannoti xawu wodalla noowa, suuffanni martanno daafira, insa ise hasidhanni didaafurtanno.

²⁵Israeele, wole maganna ledo foorate, lekka'ne dhodhookka geeshsha doddinoonte; kokke'ne moolta geeshsha goodhinoonte yoommo. Ki'ne kayinni, ‹Dee'ni! Ninke kaphu maganna banxoommohuranna, insa hoode ha'rate murci'noommo daafira dihingeemmo› yitinoonni» yii.

²⁶Kaaliiqi, «Mooraanchu amadame saalfatannonte gede, ki'ne Israeelete manni, mootoolla'ne, gashshaano'ne, qeesooti'nenna himanaano'ne baalu saalfattinanni yanna dagganno.

²⁷Ki'ne anewa higa gibbine haqqicho, ‹Annankeeti› kinchono, ‹Amankeeti› yitinanni daafira, saalu amadanno'ne. Qarru iillanno'ne yannara kayinni, ‹Amo gatisinke› yitinannie.

²⁸«Ki'ne anga'nenni seekkidhiniti kaphu maganna hiikkituyya? Katamma'ne batidhunte gede, maganna'neno batidhino daafira gatisso'nena insa huucci'ra mayira gibbini?» yii.

²⁹Kaaliiqi lede Israeelete, «Ane ledo mayira yekkeerantini? Baalunku anera gara gibbinoonnie.

³⁰Seejjantinannikkire ikkitinoonnihura, ani ki'ne qorichisha'ya haafaho. Himanaano'ne, hanqino doobbiichi gede ikkitine shitinoonni.

³¹Ki'ne Israeelete manni yeemmo'nere macciishshe. Ani ki'ne moola baattora woy beebbu tunsichira hune agurummo'neni? Ki'ne diane mannaati? ‹Hasi'nummo gede ikkineemmo ikkinnina atewa dihingeemmo› mayira yitinanni?

³²Seemo beetto irrase, idayicho idayichimmate imaanase habbannoni? Manni'ya kayinni ane batinye hige hawinoe.

³³Ki'ne wole haaro ella hasi'rate lowo geeshsha busultinoonnireeti. Kunnira lowo geeshsha foorrete egennamino meenti nafa ki'newiinni rosanno.

³⁴Imaani'ne mulqi'nanna fultino'ne mundeenni ikkikkinni, keeraanotenna buxanete mundeenni baino.

³⁵«Konne assitine heedhine, ‹Ninke keeraanote, kunni ka'a Kaaliiqi dihanqannonke› yitinanni. Ani kayinni cubbo diloonsoommo yitinoonni daafira qorichisheemmo'ne.

³⁶Wole gobba manni maganna hoode hadhine umo'ne shollishshinoonni. Kunni albaanni Asoori manni shollishi'nente gede, xa qole Gibitsete manni shollishanno'ne.

³⁷Saalfattine anga'nenni alba diphitine Gibitsetenni higginanni; addaxxitinoonnire baala ani giwoommo daafira insawiinni mittoreno diafidhinanni» yii.