Read Sidama_Qullaawa _Maxaafa ERMIYAASI 23 Bible Online

ERMIYAASI 23 - Sidama_Qullaawa _Maxaafa bible

ERMIYAASI 23

¹Kaaliiqi, «Ki'ne manni'ya albisaano! Ge'reewo shitannonna billaallissanno allaalaasine gedeereeti.

²Ani manna'ya towattinanni gede hedoommo. Ki'ne kayinni billaallissinannire ikkitinoonni. Kunnira, ani Israeelete Magani Kaaliiqi ki'ne aana noommo; assitinoonni bunshe baalate qorichisheemmo'ne.

³Gatinoha manna'ya billaallisoommowiinni aninni gamba asse gobbansa qoleemmonsa; insano lowo ooso ilanteennansa kiiro lexxitanno.

⁴Towattannonsa albisootano woreemmonsa; hakkunni gedensaanni manni'ya waajjikkinninna masikkinni hee'ranno. Anino tenne lede diganeemmonsa; giddonsanni mittuno dixeanno. Konne coye coyi'roommohu ani Kaaliiqaati» yii.

⁵«Daawiti sirchi giddonni, ammanaminoha moohiseemmo yanna dagganno; isino gobba hayyotenninna halaalunni gashshanno.

⁶Isi moohanno waro, Yihudu keere hee'ranno; Israeeleno harshammi yitanno. Su'masino, ‹Kaaliiqi keeraanchimmankeeti› yinanni.

⁷Hakka waro, ‹Israeele Gibitsete gobbanni fushshino Kaaliiqi halaaleeti› yine dixaarranni.

⁸Hatto yaa agurre, ‹Israeele aliyyenninna wole billaallisino gobbanni qole abbinonsa Kaaliiqi halaaleeti› yine xaarranni. Hakkunni gedensaanni uminsa gobbara heedhanno» yii.

⁹Himanaanonnire hedeemmo woyite, wodani'ya madi'ranno. Anino qece yee huxi'reemmo; Kaaliiqinna qullaawu qaalisi daafira yee, dimbinohu gede ikkeemmo.

¹⁰Baattote aana fooru manni wo'mino; Kaaliiqi rumonni kainohunni, baatto wi'litino. Saada hossanno gobba mooltanno; himanaano shokkashsho doogo hadhanno; uyinoonninsa wolqano garimalewa hosiissanno.

¹¹Kaaliiqi, «Himanaanonna qeesootu ane diayirrissanno; Qullaawu Mini'ya giddo nafa bunshe loossanno.

¹²Kunnira, hadhanni heedhe ubbanno gede, doogonsa shalaqonna tunso asseemmo; baote barrino daanni noonsa. Konne coye coyi'roommohu ani Kaaliiqaati.

¹³Samaariyu himanaano illete giwissinoe; Ba"aali su'minni himana coyidhanni, manna'ya Israeele so'risiissino.

¹⁴Yerusaalamete himanaano kayinni, hakkiinni sa'ino bunshe assitino; foortanno; kaphu himana kultanno. Mannano bunshete kakkayissanno; bunshe loosa agurannohuno dihee'ranno; mannu Soddoomunna Gomooru manni gedeeha ikkino.

¹⁵Ki'ne Yerusaalamete himanaano, base baalate bunshe wixxinoonni. Qaraaranno haqqa itisatenna, shaanno waa hayikkisate, hedoommohu kunni daafiraati.

¹⁶Olantote Mootichi Kaaliiqi Yerusaalamete mannira, «Himanaano yitannore macciishshitinoonte. Ikkannokki coye kultanno'ne; kultanno'nerino insa heddinoreeti ikkinnina, ani yoommore di"ikkino.

¹⁷Ani yoommore macciishshitannokkirira, ‹Keerella heedhinanni!› yitanno. Ani yoommo gede ikkitannokkirirano, ‹Qarru diamadanno'ne!› yite kultanno.

¹⁸Insa giddonni gordoho ane Kaaliiqi songora ofollinohu, woy ani coyi'ranna macciishshinohu nooni?

¹⁹Kune hanqi'yanni, hombobolattete gede ikke kae, bushuulle ganeemmo.

²⁰Hedoommore wonshammo geeshsha, hanqi'ya dihiganno; ki'neno mitto barra konne coye buuxxinanni.

²¹Tenne himanaano ani disoommo; insa uminsa hedolla haadhe doddanni no. Ani mittoreno dikuloommonsa; insa kayinni ani soommohu gede assite coyidhanno.

²²Gordoho ane ledo songo ofoltinoha ikkoommero, ki'ne Yihudu manni cubbo'ne aagintaabbinanni gedenna, anewa higginanni gede kultanno'ne.

²³«Ani muli Maganooti ikkinnina, xeertote Magano di"ikkoommo.

²⁴Mannu maaxe assinore ani diafeemmo? Gordonna baatto wo'moommohu, ani Kaaliiqa di"ikkoommo?

²⁵Ane su'minni kapho himantannori yitinore afoommo; ‹Haaqii'noommo; haaqii'noommo› yitanno.

²⁶Uminsa qalonni coyidhanno himaninni manna'ya so'risiissanni mamooti geeshsha keeshshitanno?

²⁷Akaakkansa Ba"aali magansidhanni ane habbunte gede, haaqeensa mimmitoho kultanna manni'ya ane hawannoha lawannonsa.

²⁸Haaqii'rannohu, haaqeesi kulollana; ani kuloommosire kulannohuno coyi'rolla; galawunna gumu mitto ikkinoni?

²⁹Qaali'ya giirate gedeeho; kincho maniissanno meenchooti.

³⁰Kunnira, ani mimmituwiinni haadhe, ‹Kaaliiqi togo yiino› yitanno himanaano aana noommo.

³¹Qoleno uminsa qalonni coyidhanni, ‹Kaaliiqi togo yaanno› yitannori aana noommo.

³²Halaalinta ani kaphu haaqee kultanno himanaano aana noommo; tenne haaqee kulte beebba naaxxitanni manna'ya halaaluwiinni wirri assitanno. Ani disoommonsa; hadhe"eno diyoommonsa. Mannahono kaa'litinori dino. Konne coye coyi'roommohu ani Kaaliiqaati» yii.

³³Kaaliiqi, «Ermiyaasi! Himanaanchu woy qeesichu woy manni'ya giddonni mittu, ‹Xa daankera noo duhi[4] maati?› yee xa'mihero, ‹Kaaliiqi duhi ki'neeti; kunnira, tuge huna'neraati› yite kulinsa.

³⁴Himanaanchu woy qeesichu woy manni'ya giddonni mittu, ‹Kaaliiqi duhaati› yaannoha minisi manni ledo ganeemmo.

³⁵Hatto yaantenni, ‹Kaaliiqi mayee dawari? Kaaliiqi ma coyi'ri?› yitine fiixa'nenna jaalla'ne xa'me.

³⁶Kaaliiqi duhaati yitine coyidhinoonte; togo yaannohura qaali'ya addinta duha ikkannosi gede asseemmo. Ki'ne ane heeshshote Maganihanna Olantote Mootichi qaale shokkishshinoonni.

³⁷Ermiyaasi atino himanaano, ‹Kaaliiqi ma dawari'ne? Ma coyi'ri'ne?› yite xa'mi.

³⁸Hajajo'ya macciishsha gibbe, ‹Kaaliiqi duhaati› yituro kayinni,

³⁹halaalintanni insa duhu gede aani'yanni hoole akaakkansara oommo katami ledo mitteenni fafowa masse tuge agureemmonsa.

⁴⁰Hegerera hambannikki saaliranna shollinyira tuge agureemmonsa» yiie.