Read Sidama_Qullaawa _Maxaafa ERMIYAASI 25 Bible Online

ERMIYAASI 25 - Sidama_Qullaawa _Maxaafa bible

ERMIYAASI 25

¹Yihudu moote Iyosiyaasi beetti Iyoaaqeemi moohihunni shoolki diro, Baabilooni moote Nabukadanatsoori moohihunni umi diro, Kaaliiqi anera:

²Yerusaalametenna Yihudu mannira baalaho,

³«Yihudu moote Amooni beetti Iyosiyaasi moohihunni tonaa sayikki dirinni kayise techo geeshsha 23 diro Kaaliiqi anera coyi'ranni keeshshino. Anino qaalesi ki'nera coyi'ra agure diegennoommo; ki'ne kayinni dimacciishshitinoonni.

⁴Kaaliiqi marro marro hige borojjesi himanaano ki'newa soyennano, ki'ne kayinni wodana assiti'ne dimacciishshitinoonni.

⁵Himanaanono, ‹Kaaliiqi ki'neranna akaakka'nera geedote uyino'ne baattora heedhinanni gede, bunshetewiinni agurtine higge.

⁶Wole maganna hoode hadhinoonte; insarano soqqantinoonte; kumbuultinoontensa. Anga'nenni seekkidhinoonni misillanni Kaaliiqa hanqissinoonte; tenne hajajo agartiniro isi diqorichishanno'ne› yite kultino'ne.

⁷«Ki'ne kayinni Kaaliiqi yiinota gibbinoonni. Anga'nenni seekkidhinoonni misillanni Kaaliiqa hanqissine umi'nera gawajjo abbidhinoonni.

⁸«Yiinota macciishsha gibbinoonni daafira, Olantote Mootichi,

⁹‹Kune aliyye mannanna borojjicho'ya Nabukadanatsoori woshsheemmo. Insano tenne baattora noo mannanna qooxeessaho noore baala guddanno gede asseemmo; la"annohu baalu waajje afoo cu'mi'ranno gede asseemmonsa.

¹⁰Giddonsa hagiirru, qeexaalu, adhatenna adhamate ililleetteno diheedhanno; daammu luulinna xawanno caabbichi dihee'ranno.

¹¹Baatto gudisante mullichonna ona ikkitanno; ki'neno ollii'neno 70 diro Baabilooni mootera soqqantinanni.

¹²« ‹70 diri gedensaanni kayinni, Baabilooni mootenna mannasi bunshensa daafira qorichisheemmo. Baattonsano hegerera ona asse agureemmo.

¹³Kuloommo coye, kunni maxaafi giddo borreessinoonnirenna daga baalate daafira Ermiyaasi kulino himana baala tenne gobba aana abbeemmo.

¹⁴Insa uminsa lowo gobbaranna jajjabba mootoollara borojje ikkitanno. Bunshensanni loosidhinore mixxitanno gede asseemmonsa› yiino yite kulinsa» yiie.

¹⁵Israeelete Magani Kaaliiqi anera, «Hanqi'ya wo'minoha woyinete finiincho anga'yanni haadhe, soyemmohe daga agganno gede assi.

¹⁶Kunni finiinchinni agganno woyite, olunni kainohunni dimbite wodana habbanno» yee coyi'rie.

¹⁷Anino finiincho Kaaliiqi anganni haa're, agganno gede dagate mootoollara oommo.

¹⁸Yerusaalametenna Yihudu katamma manni, mootoollanna ledonsa gashshaano kunni finiinchinni agganno gede assinoonni. Kunninni kainohunni, tini gobba la"ate lowo geeshsha waajjishshannota mullicho, xononnitanna rumonnita ikkitanno. Techo geeshshano hatto yine woshshinanni.

¹⁹Layinki gobba ha'roommoti Gibitsete. Tenne gobba moote, ledosi gashshaano, wolootu loosaasinenna mannu baalu,

²⁰wole gobba manni, Uuzi mootoolla, Filisxeemete mootoolla, Asiqeloonati, Gaazati, Eqiroonitinna Ashidooditi konne finiincho cingiishshidhu.

²¹Edoomi, Moaabinna Amooni,

²²Xiroosinna Sidoona mootoolla baala, Mediteraaniyu Baari qacce gaangaawira noo gobba mootoolla,

²³Dedaani, Teemanna Buuzi Katamira umo haransidhe mudhitanno gosa mootoolla,

²⁴Arabete mootoollanna halallitte gobbara hee'rannohu wole gobba manni mootoolla,

²⁵Zimiiri, Elaaminna Medooni gobba mootoolla baala,

²⁶mulenna xeertote nooti aliyye gobba mootoolla, tare tarentenni baattote aana noo gashshootuwa baala aggu. Goofimarchohono Baabilooni moote aganno.

²⁷Hakkunni gedensaanni Kaaliiqi, «Israeelete Magani Olantote Mootichi Kaaliiqi, soyemmo'ne bagadinni kainohunni, dimbite tuffe ubbinowiinni ka"a hoogga geeshsha aggona kulinsa.

²⁸Agganno finiincho angakkinni haadhe aga gibburo kayinni, ‹Olantote Mootichi Kaaliiqi: Baxxinikkinni agge!› yiino'ne yite kulinsa.

²⁹Kune ani guda hanafeemmohu ane kataminni kayiseeti. Qorichishantinikkinni gattinanniha lawino'ne? Baattote aana noo baalira bagado kayiseemmo. Konne coye coyi'roommohu ane Kaaliiqaati» yii.

³⁰Kaaliiqi, «Kunni mannira, ‹Kaaliiqi iima hee're harqanno; qullaawa darga hee're beleqanno; baattosi aana lowo geeshsha doonqanno. Woyinete laalo huuncannohu gede jawu qaalinni coyi'ranno; baattote aana noo manni baaluno macciishshanno.

³¹Kaaliiqi manna rufanno yannara, qoonqosi gobbate qacce geeshsha iillitanno. Manna baala yoote shiqisheenna, yoo yinanninsa; bushuulle reyotenni qorichishanno› yite kulinsa» yiie.

³²Olantote Mootichi Kaaliiqi, «Kuneeti, tare tarentenni gosate bao dagganno; gobbate qaccenni wolqaataame hombobolatte ka'anno.

³³Hatte yannara Kaaliiqi shaanno manni reeshshi baatto wo'manno; wi'lannonsahunna madaarannonsahu dihee'ranno. Kunnira ishinu gede mullawa baattote ubbe gattanno.

³⁴«Ki'ne gashshaano! Ki'nera aanne'e! Uulla bukote aana gongo'me; baalunku gorrantinanni barri iillino; danchu doru uduunni uwe hiiqqaqqamannohu gede, ki'neno hiiqqaqqantine billaallitinanni.

³⁵Allaalaasineno xooqqe fultannowi dihee'ranno; hoshshate albaanni hadhannori, marte gattannowa diafidhanno.

³⁶Kaaliiqi, saada hosiisidhanno darga hunanno daafira, allaalaasine raartanno; hoshshate albaanni hadhannori wi'litanno.

³⁷Buwannohunni Kaaliiqi hanqinni kainohunni, keerunniti hoowensa giirantanno.

³⁸Kaaliiqi hanqinninna, marartannokki bagadaanonni kainohunni, baatto ona ikkitanno. Insano ga'rimmosi agure ha'ranno doobbiichi gede ikkite, fulte xooqqanno» yii.