Read Sidama_Qullaawa _Maxaafa ERMIYAASI 27 Bible Online

ERMIYAASI 27 - Sidama_Qullaawa _Maxaafa bible

ERMIYAASI 27

¹Iyosiyaasi beetti Sedeqiyaasi Yihudaho moohanni hee'reennanni Kaaliiqi,

²«Sunchu ledo nooha haqqu qambara seekkite haxokkira wodhi.

³Hakkunni gedensaanni, lekkansa ikkite moote Sedeqiyaasiwa Yerusaalame dagginore Edoomi, Moaabi, Amooni, Xiroosinna Sidoona mootoollara ani yoommore kultannonsa gede soyi.

⁴Ani Israeelete Magani Olantote Mootichi Kaaliiqi yoommore, mootoollansara kultanno gede,

⁵‹Jawaata wolqa'yanninna wolqaataame cigile'yanni baattonna aanase noo manna qoleno saada baalanta kalaqoommo; gashshanno gede, hasi'roommohura eemmo.

⁶Xa baatto'ne gudise hedoommo gede assannohura soqqamaanchi'yara Baabilooni mootera Nabukadanatsoori angara sayise eemmo. Dubbu moyichi nafa gashshamannosi gede asseemmo.

⁷Gobbasi wolu angara sa'a geeshsha gosa: Isi, beettisinna beettisi beetti anga galtanno. Hakkunni gedensaanni gosasi wolqaataame daganna jajjabba mootoolla angara higganno.

⁸« ‹Baabilooni moote Nabukadanatsoori anga gala woy isi qambari giddora ea gibbanno gosa woy gashshooti kayinni co'o yee goofa geeshsha bagadunni, hudetenninna dhibbunni ganeemmo.

⁹Kunnira, Baabilooni mootera anga uyitinannikki gede hooltanno'neriha himanaano'ne, kiilaano'ne, haaqii'raano'ne masaalaano'nenna bitaammi'ne coye macciishshitinoonte.

¹⁰Insa kultanno'ne himani kaphoho. Insa yitannore macciishshitiniro, ani shorre huneenna'ne ba'inanni.

¹¹Baabilooni moote qambari giddora e'e isi anga galtanno gosa baattonsanni ka'ukkinni loosidhe heedhanno gede asseemmonsa. Konne coye coyi'roommohu ani Kaaliiqaati yiino› yite hajaji» yiie.

¹²Yihudu mootera Sedeqiyaasirano hakko garinni, «Baabilooni moote qambari giddora e'e, isiranna mannisira soqqamittoro lubbotenni hee'ratto.

¹³Baabilooni moote anga gala giwittoro, Kaaliiqi baalante gosa daafira coyi'rinonte gede, atinna mannikki bagadunni, hudetenninna dhibbunni gooffinanni.

¹⁴Kapho coyidhanni noona, ‹Baabilooni moote angara higginoonte› yitanno himanaanore macciishshitinoonte.

¹⁵Kaaliiqi, ‹Insa ani disoommo; ki'ne kayinni insa yitannore macciishshitiniro, ki'nenna kapho coyidhu'ne himanaano shorre huneemmo› yiino» yee kuloommosi.

¹⁶Hakkunni gedensaanni, qeesootahonna mannaho, kaphu himana kultanni, «Kaaliiqi mini uduunni muli yannara Baabilooninni higanno» yaanni himana macciishshitinoonte.

¹⁷Insa yitannore macciishsha agurtine, Baabilooni moote angara higgine lubbotenni heedhe. Kuni katami mayira diigamanno?

¹⁸Hanni insa himanaanotero, ani coyi'roommonsari nooro, Qullaawu Mini uduunninna mootete mini uduunni Baabiloonira ha'rannokki gede, hanni ane Olantote Mooticha Kaaliiqa huuccitossieyya!

¹⁹(Baabilooni moote Nabukadanatsoori Yihudu moote Iyoaaqeemi beetto Yoakiini, Yihudunna Yerusaalamete jajjabbi ledo qafade Baabilooni haa're ha'ri yannara camote tuuqqa, camotenni seekkinoonnita waa worranni gawate, siwiilunni seekkinoonni uduunne, woleno Qullaawu Mini uduunne Yerusaalamete agure ha'rino.)

²¹«Yerusaalamete, Qullaawa Minenna mootete mine gatino uduunni daafira ani Olantote Mootichi Israeelete Magani Kaaliiqi yeemmore macciishshe.

²²Ani alba higammo geeshsha kuni uduunnino haa'ne ha'neenna Baabilooni hee'ranno. Hakkunni gedensaanni galagalche kawiira abbeemmo. Konne coye coyi'roommohu ani Kaaliiqaati» yii.