Read Sidama_Qullaawa _Maxaafa ERMIYAASI 28 Bible Online

ERMIYAASI 28 - Sidama_Qullaawa _Maxaafa bible

ERMIYAASI 28

¹Sedeqiyaasi moohihunni shoolki diro ontikki aganira Gebaooni manchi Azuuri beetti Hanaaniya Qullaawu Mini giddo qeesootunna mannu baalu albaanni,

²«Israeelete Magani Olantote Mootichi Kaaliiqi, ‹Baabilooni moote qambara hiiqqoommo.

³Baabilooni moote Nabukadanatsoori kawiinni haa're ha'rino uduunne baala 2 diri giddo galagalche qoleemmo.

⁴Yihudu moote Iyoaaqeemi beetto Yoakiini qafadame ha'rino manni Yihudunnihu ledo qole abbeemmo. Ee! Baabilooni moote qambara hiiqqeemmo. Konne coye coyi'roommohu ani Kaaliiqaati› yaanno» yii.

⁵Ani Ermiyaasino qeesootunna Qullaawu Mini giddo uurre noo manni baalunku albaanni Hanaaniyara,

⁶«Eewanni Kaaliiqi yootto gede asso! Qullaawu Mininni ha'rino uduunnenna qafadame ha'rino manna baala galagalche qole Kaaliiqi coyi'rootto himana wonsho.

⁷Ikkollana ateranna macciishshanno manni baalaho coyi'reemmore macciishshi:

⁸Bi're ninkera albaanni heedhino himanaano lowo gosaranna jajjabba gashshaanora olu, hudenna dhibbu daannota himantino.

⁹Keerunnire himanino himanaanchiri halaale ikkannohu, coyi'rinori wo'manno woyiteeti» yoommo.

¹⁰Hatte yannara Hanaaniya qambara haxo'yanni haa're hiiqqe,

¹¹mannu baalu albaanni, « ‹Kaaliiqi 2 diri giddo Baabilooni moote Nabukadanatsoori qambara daga baalate haxonni hiiqqeemmo› yiino» yii. Anino hakkiinni kae ha'roommo.

¹²Shiima yanna gedensaanni Kaaliiqi,

¹³«Marte Hanaaniyara, ‹Kaaliiqi ati haqqu qambara hiiqqootto. Ani kayinni isi darga siwiilu qambara reqiweemmo.

¹⁴Ani Israeelete Magani Olantote Mootichi Kaaliiqi Baabilooni moote Nabukadanatsoori anga galtanno gede tenne daga baalate haxora siwiilu qambara woroommo. Insano isi anga galtanno; dubbu moyicho nafa angasira qoleemmo› yiino yite kulisi» yiie.

¹⁵Anino Hanaaniyara, «Hanaaniya, macciishshi! Ate Kaaliiqi disoyinohe. Konne manna kapho adda assi'ranno gede assitanni nootto.

¹⁶Kunnira Kaaliiqi, kune baattote aaninni shorrammoheraati. Mannu ane Kaaliiqira gara giwanno gede assoottona kunni dirinni reyatto» yoommosi.

¹⁷Hanaaniyano hakko diro lamalki aganira reyi.