Read Sidama_Qullaawa _Maxaafa ERMIYAASI 31 Bible Online

ERMIYAASI 31 - Sidama_Qullaawa _Maxaafa bible

ERMIYAASI 31

¹Kaaliiqi, «Israeelete ga're baalate Maganonsa ikkeemmotinna insano manna'ya ikkitanno yanna dagganno.

²Bagaduwiinni gattinore halalla heedheenna mararoommonsa. Israeele fooliishsho hasidhu yannara,

³ani Kaaliiqi insara fafe hee're leelloommonsa. «Bagamannokki baxillinni baxoommo'ne; hakko baxillinni anewa gamba assoommo'ne.

⁴Baxeemmohe Israeele! Ani galagalche dhaaweemmohe; atino dhaawamatta. Dibbe gantanni hagiirrunni kubbatta.

⁵Galagalte Samaariyu gaarrara woyinete kaashsho kaasi'ratta; kaasi'rino mannino laalose gudhanno.

⁶Ilaalaame Efireemi gobbara noo agaraasine, ‹Ka'e Tsiyoonira Maganinke Kaaliiqiwa ha'nona› yitanni lallabbanno barri daanno» yii.

⁷Kaaliiqi qole, «Daga baala roortino Israeele daafira, ilillissinanni faarse; Israeelete taraare ikkinoha mannasi gatisino.

⁸Kune aliyye gobbanni abbeemmonsa; baattote qaccennino gamba asseemmonsa. Illiweelootu, naafootu, godowinni noorinna, gamaa'manni noori baalu ledonsa higanno; lowo gosa ikkite gobbansa higganno.

⁹Gobbansa qoleemmonsa waro, wi'litanninna huuccidhanni dagganno; dancha buichowa qole haa're masseemmonsa; taalonna suwashsho doogo qole haa're ha'reemmonsa. Ani Israeelete annaho; Efireemino bayira beetto'yaati.

¹⁰Ki'ne daga! Ani coyi'reemmore macciishshe! Yeemmore qaccete fafowa noorira, ‹Manna'ya billaallisoommo; xa kayinni gamba asse, allaalaanchu gede allaaleemmonsa› yiino, yitine lallabbe.

¹¹Ani Kaaliiqi manna'ya wodeemmo; wolqatenni gashshitannonsari angannino gatiseemmonsa.

¹²Galagalte higge Tsiyooni Ilaali aana, hagiirrunni faarsitanno. Ani gide, haaro woyinete xajjenna ejersu zayite, hooffille saadanna lalo aatenni maassi'reemmonsa. Waa duuwino gati gedeere ikkitanno; yaaddannori mitturino dihee'ranno.

¹³Hatte yannara seenninsa hagiidhe kukkubbanno; labballi oosonsanna geerrinsa qeexaa'lanno. Wodana qoleemmonsa waro, wi'lansa hagiirreho, dadillensa hisanyooteho soorreemmo.

¹⁴Qeesootaho dancha sagale duushsheemmo; manni'yarano elto'ya batiseemmo. Konne coye coyi'roommohu ani Kaaliiqaati» yii.

¹⁵Kaaliiqi, «Raamaho wi'lanna didatto macciishshini; Raaheeli oososera wi'litu; oosose lubbotenni nookki daafira sheshifata hooggu.

¹⁶Wi'la'ne agurtine hindiiddo'ne fiidhe; ooso'ne diininsa gobbanni galagalte higganno waro, insara assitinoonni danchumma daafira, ani mulla diagureemmo'ne.

¹⁷Ooso'ne galagalte gobbansa higganno daafira, albillittete hexxo noo'ne. Konne coye coyi'roommohu ani Kaaliiqaati.

¹⁸«Efireemi, ‹Kaaliiqa! Ninke leenjinshoonnikki booti gedeereeti; ati kayinni hajajammeemmo gede seejjoottonke. Ati Kaaliiqi Maganonke ikkootto daafira, atewa qolinke, ninkeno hingeemmona.

¹⁹Atewiinni fanfanni hee'nenni, hingammora hasi'noommo. Dadilline gagaso ga'ninoommo; anje hee'ne loonsoommo cubbi daafira, saalfante umo heeshshi yinoommo› yitinoonni.

²⁰«Israeele! Ki'ne anera ayirrado oosooti; roorse baxeemmo'nere di"ikkitinoonni? Hanqe coyi'rummo'nero nafa, ki'ne daafira wodani'ya digoxino; godowi'yano ki'nera dikaajjino. Ani Kaaliiqi ki'ne marareemmo'ne. Konne coye coyi'roommohu ani Kaaliiqaati.

²¹Doogote malaate wodhe; doogo leellishannore kaasidhe; hadhinoonni doogo seekkitine buuxxe. Manna'ya Israeele! Galagaltine katamma'ne higge!

²²Ki'ne ammana xe'ino'neri! Raataabbinanni heedhinannihu mamooti geeshshaati? Ani Kaaliiqi baattote aana haaro coye kalaqeemmo; labbaaha meyati agartanno» yii.

²³Israeelete Magani Olantote Mootichi Kaaliiqi, «Manna'ya gobbansa qoleemmo waro Yihudahonna katammansara hee'ranno manni, ‹Kaaliiqi hee'rannohu Qullaawu Ilaali maassamo› yaanno» yii.

²⁴Yihudunna katammansa baala mannu hee'rannowa ikkitanno; baatto loosi'rannohunna saada allaa'lanno mannino ledonsa hee'ranno.

²⁵Daafurtinorira wolqa haaroonseemmonsa; hudidhinorira sagale duushsheemmonsa.

²⁶Kunni daafira mannu, «Goxanotenni baqqi yinummo yannara wolqa assi'nummo» yaanno.

²⁷Kaaliiqi, «Ani Kaaliiqi Israeeletenna Yihudaho mannunna saada wo'mitanno gede asseemmo.

²⁸Buqqisummonsa, diigummonsa, galchummonsa, hunummonsannna gudummonsante gede, galagalche kaase dhaaweemmonsa. Konne coye coyi'roommohu ani Kaaliiqaati.

²⁹Hakka waro mannu, ‹Annuwa ittinoti shiishshino laalo, oosote hinko shilli assitino› yee dimaammahanno.

³⁰Hatti gatteenna, shiishshino laalo itanno baalira, umisi hinkolla shilli yitanno; mittu mittunku umisi cubbinnilla reyanno» yii.

³¹Kaaliiqi, «Israeeletenna Yihudu mini ledo haaro gondooro e"eemmo yanna dagganno.

³²Kuni gondoori Gibitsetenni anga amade fushshummonsa waro annuwansa ledo eummohu gedeeha di"ikkino. Ani biilonsa ikke hee'reennanni insa gondooro'ya diiggino.

³³Insa ledo e"eemmohu haaru gondoori kunninni aane nooho: Seera'ya giddonsa woreemmo; wodaninsarano borreesseemmo. Ani Maganonsa ikkeemmo; insano manna'ya ikkitanno.

³⁴Ajuno akkaluno egennannoe daafira, jaalasi woy rodoosi, ‹Kaaliiqa egenni› yee rosiisannohu dihee'ranno; saonsano agureemmonsa. Hakkunni gedensaanni cubbonsa diqaageemmo. Konne coye coyi'roommohu ani Kaaliiqaati» yii.

³⁵Kaaliiqi lede, «Ani Olantote Mootichi Kaaliiqi, arrishsho barra, agananna beeddahe hashsha xabbanno gede asseemmo. Dambala kayise baara luushsheemmo.

³⁶Ani konne coye assa agureemmokkinte gede, Israeeleno umo dandiitino gosa ikkitanno gede, assa diagureemmo.

³⁷Gordo bikka dandaannohu nooni? Baattote hundi geeshsha iille buuxe afannohu nooni? Hattonni Israeele cubbo loossuro nafa, anino insa agure diafeemmo. Konne coye coyi'roommohu ani Kaaliiqaati.

³⁸«Hanaanieeli Shaenni kayise galchimaanni Huxxu Waalchi geeshsha Yerusaalame katama'ya ikkite gatamarantanno barri daanno.

³⁹Dannuno hakkiinni kae, Gaareebi yinanni gaara iille Goa yinanniwa mare gawa'lanno.

⁴⁰Manna madaarranniwanna buluulo tunganni lagichi geeshsha, soojjaatoonni Faradu Waalchi geeshsha noowi baalu, ane Kaaliiqira qullaawa ikkanno. Yerusaalame hakkunni gedensaanni horonta didiigantanno; diba'anno» yii.