Read Sidama_Qullaawa _Maxaafa ERMIYAASI 39 Bible Online

ERMIYAASI 39 - Sidama_Qullaawa _Maxaafa bible

ERMIYAASI 39

¹Sedeqiyaasi Yihudaho moohihunni honsikki diro tonnikki aganira Baabilooni moote Nabukadanatsoori olantosi baalate ledo daye Yerusaalame doyisse amadi.

²Sedeqiyaasi moohihunni tonaa mitikki diro shoolki aganira honsikki barra Baabiloonootu katamu huxxa dhoosse e'u.

³Yerusaalame amadantuhu gedensaanni, Nabukadanatsoori roorrooti: Nergali-Sharetseri, Samigari, Nebo-Sarsekiimi Rabisarisi, qaru roorrichi Nergali-Sharetserinna wolootuno no.

⁴Moote Sedeqiyaasinna olanto baala Baabiloonoota affe xooqqu; insano hashsha mootete gateenni higge lamenka huxxa xaadisanno waalchi widoonni Yordaanoosi Lagichi widira higge xooqqu.

⁵Baabilooni olanto faana gante Iyyaarko mule noo xawira iillite Sedeqiyaasi qafaddu. Hakkunni gedensaanni Hamaati gobbara Ribila Katamira noohuwa moote Nabukadanatsooriwa haadhe massitusi. Nabukadanatsoorino Sedeqiyaasi fonqole so'rosi bade afe,

⁶Sedeqiyaasi illesinni la"anna oososi Ribila katamira shinanni gede assi; Yihudu roorroota baalankano shini.

⁷Hakkunni gedensaanni Sedeqiyaasi ille giddonni fushshite hunte, isono cagaagetenni usurte Baabilooni haadhe hadhanno gede olantosi hajaji.

⁸Baabiloonootu Yerusaalamete huxxa baala diigge, mootete minenna minna baala giirtu.

⁹Hakkunni gedensaanni, agaraasinete roorrichi Nabuzardaani katamaho gatinohanna Baabiloonootu ledo karsamino manna Baabilooni haa're ha'ri.

¹⁰Mittoreno afidhinokki buxane calla Yihudaho agure ha're woyinenna shaana kaasidhanno darga uyinsa.

¹¹Baabilooni moote Nabukadanatsoorino Nabuzardaani,

¹²«Marte Ermiyaasi danchu garinni towatisi; hasiisannore baala assisi; mittu coyinnino gadadissootisi» yee hajaji.

¹³Kunnira, Nabuzardaani Nabushazibaani, Nergali-Sharetserinna wolootu Baabilooni roorrooti ledo,

¹⁴usurame noommowa mootete mine noohunni agaraasinete mininni fuleemmo gede assinoe. Saafaani beetti Ahiqaami ilinohu Gedaaliyano mini'yara haa're harie; anino manni'ya ledo hakkiicho hee'roommo.

¹⁵Ani mootete mine noo usuri mine hee'reenna Kaaliiqi,

¹⁶«Marte Itiyophiyicha Ebedimeleki, Israeelete Magani Olantote Mootichi Kaaliiqi, coyi'roommonte gede kunni katamira bao ikkinnina ba'raa'ra diabbeemmo; kuni coyi ikkanna ati illekkinni la"atto.

¹⁷Hatte yannara ani Kaaliiqi ate agareemmohe; waajjatto manni angara dieatto.

¹⁸Ani keerunni agareemmohe daafira direyatto; ane hexxootto daafira bagadu dishaannohe. Konne coye coyi'roommohu ani Kaaliiqaati» yii.