Read Sidama_Qullaawa _Maxaafa ERMIYAASI 40 Bible Online

ERMIYAASI 40 - Sidama_Qullaawa _Maxaafa bible

ERMIYAASI 40

¹Agaraasinete roorrichi Nabuzardaani Raama usurame noommowiinni tiriehu gedensaanni, Kaaliiqi coyi'rie. Hakkunnira albaanni ani Yerusaalametenninna Yihudunni qafande Baabilooni haa'ne ha'ni manni ledo cagaagetenni usurreennae keeshshoommo.

²Nabuzardaani ane calli'yara, «Maganikki Kaaliiqi tenne baatto hunannota balaxe coyi'rino;

³asseemmo yiinore baala kune wonshino. Kuni coyi ikkinohuno manni'ne cubbo loosinohuranna Kaaliiqira hajajama giwino daafiraati.

⁴Xa kune ani cagaagetenni usurroonnita angakki tire aguroommohe; ane ledo Baabilooni ha'ra hasi'rittorono kai; anino atera hasiisannore asseemmohe. Ha'ra giwittoro kayinni konniicho hee'ri. Kune baatto hala'ladotena hasi'rittowa hee'ra dandaatto» yiie.

⁵Ani dawarummokkinni Nabuzardaani lede, «Baabilooni moote Yihudu katammara shoommohuwa Saafaani beetti beetti Akiqaami ilinohuwa Gedaaliyawa ha'ri. Isiwa marte hakkiicho mannikki ledo hee'ri; woy hasi'rittowa hadhe hee'ra dandaatto» yee, sinqenna afansha anga wore geegiissie.

⁶Anino Gedaaliyawa Mitsipha ha'roommo; isiwa mare qafadamikkinni gatino manni ledo hee'roommo.

⁷Qafadantukkinni gattino olantonna katamu gobbaanni hee'ranno manni baalu, Baabilooni moote Gedaaliya Yihudu gobbaranna qafadantukkinni gattino buxanera shoominota macciishshi.

⁸Kunnira, Naataaniya beetti Ismaeeli, Qaareha ooso Yohanaaninna Yoonaataani, Tanihumeeti beetti Seeraya, Nexofa yinanni gobba manchi Eefayi ooso, Maikichu Yaizaaniya manninsa baalunku ledo Gedaaliyawa Mitsipha daggu.

⁹Saafaani beetti beetti Gedaaliya insaranna manninsara, «Baabiloonootaho soqqama waajjitinoonte. Tenne baattora teessine heedhe; baalunku coyi qinaanno'ne gede Baabilooni moote anga galle.

¹⁰Anino, ki'ne afoo ikke Baabiloonootu ledo hasaawate konne Mitsipha ledo'ne hee'reemmo. Ki'ne kayinni woyinete hunduruurro, ejersu zayitenna wole laalo gamba assidhine duu'nitinanni konne amaxxitinoonni katammara heedhe» yiinsa.

¹¹Moaabi, Amooni, Edoominna wole gobbara heedhanno Israeele, Baabilooni moote Yihudu manna gatisinotanna, Gedaaliya gashshannonsa gede worroonnita macciishshite,

¹²baalunku galagalte Yihudu gobba daggu. Darante hadhinowiinni galagalte higge Mitsipha noohuwa Gedaaliyawa daggu. Hakkono woyinete hunduruurronna wole haqqe laalo gamba assidhe duu'nitu.

¹³Hakkunni gedensaanni, Yohanaaninna anga uyitukkinni gattino olanto roorrooti baalu Mitsipha noohuwa Gedaaliyawa dagge,

¹⁴«Amooni moote Bealiisi, ate shaanno gede Naataani beetto Ismaeeli soyinota diafootto?» yite xa'mitusi. Gedaaliya kayinni konne coye diammanino.

¹⁵Yohanaani Gedaaliyara, «Mittuno afannohu dihee'rannona mare Ismaeeli sheemmona aguri; isi ate sheenna atewa gamba yiinohu Yihudu manni baalu billaalle ba"annowe; wolu Yihudu gobbara hee'ranno manni baalu ba"anno» yii.

¹⁶Gedaaliya kayinni Yohanaani, «Ismaeeli beebballa bushiishoottona, konne coye isi aana assitooti» yiisi.