Read Sidama_Qullaawa _Maxaafa ERMIYAASI 41 Bible Online

ERMIYAASI 41 - Sidama_Qullaawa _Maxaafa bible

ERMIYAASI 41

¹Lamalki aganira mootete ilama ikkinohu gashshaanchu Elishamai beetti Naataaniya ilinohu Ismaeeli 10 manni ledo Mitsipha gashshaanchu Gedaaliyawa dayi. Hakkiicho mitteenni ofolte sagale ittanni heedheenna,

²Ismaeelinna ledosi noori tonnunku ka'e, Baabilooni moote shoominoha Gedaaliya bisetenni gante shitu.

³Ismaeelino Gedaaliya ledo Mitsipha noo Yihudootanna hakkiicho noore Baabilooni olanto baala shee gudi.

⁴Layinki soodo Gedaaliya reyinota ayino afikkinni,

⁵settawu manni Sekeeminni, Seelonninna Samaariyunni kae dayi. Insano dadillite ereeda meexxite, uddanonsa darte, bisonsa huduuxxitino. Kaaliiqi minira shiqishshannoha gidu fushshaatenna hixaana anga haadhe no.

⁶Ismaeelino Mitsiphanni fule wi'lanni nooha lawanni insanni xaadara shiqi. Insanni xaadanni hee'renni, «Gedaaliyawa amme» yiinsa.

⁷Katamu mereerira iillituta Ismaeelinna ledosi noori konne mannano shite balete giddo tuggu.

⁸Kunni manni giddonni 10 manni, «Loosu giddo qamade, hayixe, ejersu zayitenna malawo maanxoommona ballo shitootinke» yite Ismaeeli huuccidhu. Isino shiikkinni agurinsa.

⁹Ismaeeli konne manna shee, moote Baasha Mitsipha gaangeesse manna waa dirri'ra hoolanno yee waajjino daafira, Yihudu moote Aasi waa kofate umino balera reeshsha wonshi.

¹⁰Hakkunni gedensaanni Ismaeeli Baabilooni mootera olu hajajaancho ikkinohu Nabuzardaani Gedaaliya towatanno gede worroonniha mootete seennenna gatino manna baala amade Mitsipha usuri. Hakkunni gedensaanni konne manna qafade, Amooni gobba widira qole haa're ha'ri.

¹¹Yohanaaninna ledosi noori olantote hajajaano baala Ismaeeli assino bunshe macciishshite,

¹²mannansa baala anga adhite Ismaeeli ledo olantara hadhu. Hordoffanni marte iso lowo kofo Gebaoonite mule iillitusi.

¹³Ismaeeli qafade haa're ha'rino manni baalu Yohanaaninna ledosi noore olantote hajajaano afe hagiidhe,

¹⁴dodanni mare Yohanaaniuu ledo karsami.

¹⁵Ismaeeli 8 olantosi ledo Yohanaaniwiinni xooqe Amooni gobba fule bai.

¹⁶Yohanaani ledo noori olantote hajajaano baala Ismaeeli Gedaaliya shiihu gedensaanni, Mitsiphanni qafade haa're ha'rino olanto, seenne, oosonsanna roorroota baala qoltu.

¹⁷Insano Baabilooni moote shoominoha Gedaaliya Ismaeeli shiino daafira, Baabiloonootu shitannonke yite waajjite Gibitse hadhara ka'u. Xooqqe hadhuhu gedensaanni Beetelihemete mule Geruuti Kimihaami yinanniwa ofoltu.