Read Sidama_Qullaawa _Maxaafa ERMIYAASI 43 Bible Online

ERMIYAASI 43 - Sidama_Qullaawa _Maxaafa bible

ERMIYAASI 43

¹Maganinke Kaaliiqi hajajinoere baala insara kule gudummohu gedensaanni,

²Hoshaiya beetti Azaariyaasi Qaareha beetti Yohanaaninna boonaleeyye baalu, «Coyikki kaphoho; Maganinke Kaaliiqi, ‹Gibitse hadhoonke› yee dikulinohe.

³Baabiloonootu gadadisse, shitannonke gede, woy hasidhuro qafadde haadhe hadhannonke gede kakkayisinohehu Neeriya beetti Baarookiiti» yitusi.

⁴Kunni garinni Yohanaani, olantote hajajaanonna mannu baalu Kaaliiqira hajajame Yihudu baattora hee'ra giwi.

⁵Yohanaaninna olantote hajajaano Yihudu gobbara gatino manna baala Gibitse haadhe hadhu. Kunino, albaanni dagate mereero billaallinowiinni galagale gobbansa Yihuda higino mannaati.

⁶Baabiloonootu roorrichi Nabuzardaani Gedaaliya anga wore ha'rinore Baarooki, anenna woloota qoleno mootete seenne, meentonna ooso haadhe hadhino.

⁷Kaaliiqi yiinore macciishsha gibbe Gibitsete gobbara Xafinaasi Katami geeshsha hadhu.

⁸Hakko Xafinaasi hee'reenna Kaaliiqi,

⁹«Shiima jajjabba kinna haadhe, mootete mini xullichira albaanni shiimu Israeelete manni la"anna waante aaniido dorunni xaallali.

¹⁰Hakkunni gedensaanni, ani Israeelete Magani Olantote Mootichi Kaaliiqi, hedo'ya wonshannoha Baabilooni moote Nabukadanatsoori haa're abbeenna, tenne waamitto kinna aana ayirrinyunniha barcimasi wodhe gashshootu dukkanna qasi'rannota kulinsa.

¹¹Isino daye Gibitse amadanno; dhibbu shaanno gede hendoonnire dhibbu gudanno; qafadantanno gede hendoonniri qafadantanno; bagadu shaanno gede hendoonnire bagadu shaanno.

¹²Kaphu maganna Gibitsenniti heedhanno galmuwara giira qaseemmo. Baabilooni mooteno kaphunnita magannansa giiranno; hasi'rirono qafade haa're ha'ranno. Allaalaanchu aanaho ga'nanno faalchi aaninni xinqine hoollanni iwiiwe gede, Gibitsete maganna xinqe hoole, ittisannosihu nookkiha fule ha'ranno.

¹³Gibitsete gobbara Heliyopoliisi yinanni katamira noota kinnatenni seekkinoonni sooddiyye diiganno. Gibitsennita kaphu magannanna galmuwansa giiranno yiino» yite kulinsa.