Read Sidama_Qullaawa _Maxaafa ERMIYAASI 44 Bible Online

ERMIYAASI 44 - Sidama_Qullaawa _Maxaafa bible

ERMIYAASI 44

¹Gibitsete gobbara Migidooli, Xafinaasinna Memfiisi yinanni katammara, qoleno Phatiroosi yinanniwa wodiidi gobbara noo Israeelooti baalaho,

²Ani Israeelete Magani Olantote Mootichi Kaaliiqi: «Yerusaalametenna Yihudu katamma baalate abboommo bao ki'ne umi'ne affinoonni; kune xaa geeshsha mannu hee'rannokkiha diigantinowa no.

³Kuni ikkinohuno, bunshe assatenni hanqissinoe daafiraati. Kaphu magannarano kakkaltino; insa ki'neno akaakka'neno egentinoonnikki maganna magansidhino.

⁴Ani giweemmoha hakkonne busha coye assitinannikki gede kulta'nera soqqamaano'ya himanaano marro marro hige soommo'ne.

⁵Ki'ne kayinni kultino'nere dimacciishshitinoonni; hajano diassitinoonni; bunshe'newiinnino dihigginoonni. Kaphu magannara kakkalano diagurtinoonni.

⁶Kunni daafira, Yihudu katammaranna Yerusaalamete dooggara hanqo'yanna aara'ya dirrise giirantanno gede assoommo. Kune techo la'inanninte gede diigante mulla darga ikkite gattino.

⁷«Xaano ani Israeelete Magani Olantote Mootichi Kaaliiqi mitto coye xa'meemmo'ne. Ki'neno tenne bunshe mayira loossine tenne bao umi'nera, labballu, meentu, oosotenna qaaqquullu aana abbitine mannu taraare gooffanno gede assitinanni?

⁸Heedhinara dagginoonni gobbara Gibitsete noo magannara kakkaltinanni ane mayira hanqissinannie? Togo assatenni, umo'ne rumonniha assitine, daga baalate mereero ajiiffantannire ikkitinanni.

⁹Alba annuwa'ne, mootoolla'nenna mootoolla'ne meenti, qoltineno ki'ne umi'nenna meenti'ne Yihudu katammaranna Yerusaalamete dooggara loossinoonni bunshe habbinini?

¹⁰Kune techo geeshsha umo'ne shollishshine heeshshi diyitinoonni. Ane ayirrisa gibbine ki'neranna annuwa'nera oommo woganna seera mishshinoonni.

¹¹«Kunnira, ani Israeelete Magani Olantote Mootichi Kaaliiqi, ki'nera hanqu albinni kae Yihudu baatto co'o asse hunammoraati.

¹²Gibitsete hee'ra doodhitine hadhinoonnire Yihudu taraare tayiseemmo. Aju akkali gattinikkinni baalanka Gibitsete baattora hudenna bagadu gudanno'ne. Macciishshanno manni masanno; ajiiffantannire ikkitine su'ma'neno rumonniha assidhinoonni.

¹³Yerusaalame qorichishummonte gede Gibitsete baattora heedhinoonnire bagadunni, hudetenninna dhibbunni qorichisheemmo'ne.

¹⁴Gibitsete heedhinara hadhinoonniri giddonni gatannohu dihee'ranno; galagaltine Yihudu gobba higate halchitinanniri giddonni lowo geeshsha shiimu manni callu xooqe fulanno» yii.

¹⁵Aliyyeenninna wodiidoonni noo Israeele baala Kaaliiqi kulinoere coyi'ranna macciishshitu. Meentinsa wole magannara kakkalinota afino manninna hakko uurre noohu meentinsa baalu,

¹⁶«Kaaliiqi su'minni kuloottonke coye baala dimacciishshineemmo.

¹⁷Ninke assineemmo yinoommore kayinni assineemmo; gordu mootitte yinannitera maganonkera xiniinsi'neemmo. Annuwanke, mootoollankenna gashshaanonke Yihudu katammaranna Yerusaalamete dooggara assitino garinni xaano woyinete xajje fushshaate shiqinsheemmose. Konne coye assinanni hee'ni waro lowo qiniiti noonke; jirono noonke daafira mitto qarrano diafi'noommo.

¹⁸Gordu mootittera kakkala agurrummonkunninna woyinete xajje shiqisha uurrinsummo kawa, lexxinonkeri dino; mannankeno bagadunna hude guddino» yitu.

¹⁹Meentuno lede, «Ninke gordu mootittera tima ganneemmohu, kakkalleemmohunna woyinete xajje fushshaate shiqinsheemmohu galtenke affannaati» yee coyi'ri.

²⁰Anino konne coye coyi'rie mannira meya labballi baalaho,

²¹«Ki'nenna akaakka'ne, mootoolla'nenna roorrooti'ne, qoleno baatto'nera hee'ranno manni baalu Yihudu katammaranna Yerusaalamete dooggara hixaana giirtinita Kaaliiqi diafino yitineetinso hawinoha laweenna'neeti?

²²Kaaliiqi assitinoonni bunshe baala lae sammi yaa didandiino. Isenkura baatto'ne mannu hee'rannokkita ona ikkitino. Baatto'ne shagaggi'nannitanna su'mi'neno rumonniha ikkinohu kunniraati.

²³Tini bao iillitino'nehu wole magannara kakkaltinoonnihuraatinna Kaaliiqi aana sao assitine seerasi, wogasinna wodhosi gibbinoonnihuraati» yoommonsa.

²⁴Qoleno manna baalaho roorenka meentoho, Kaaliiqi Gibitsete hee'rannohura Yihudu manni baalaho yiinore macciishshanno gede, Israeelete Magani Olantote Mootichi Kaaliiqi: «Ki'nenna meenti'ne gordu mootittera kakkalate xano xa'nitinoonni; xano'neno seekkitine agadhitinoonni; maahoyye danchatena heddinoonnire wonshidhe.

²⁶Ikkollana ki'ne Gibitsete baattora heedhinanni Israeelooti baalu giddonni ayino, ‹Kaaliiqi halaaleeti› yee su'ma'ya ganannokki gede ani Kaaliiqi jawu su'mi'yanni xaaroommo.

²⁷Kune, ani ki'ne bushu albinni ikkinnina danchummatenni dilaeemmo'ne. Gibitsete baattora heedhinoonniri giddonni mittu nafa gattinikkinni bagadunna hude guddanno'ne.

²⁸Ki'ne giddonni shiimu manni callu gate Gibitsetenni Yihuda higanno. Gibitse ha'ri manni ani yoommoti wo'mitannoronna insati ikkitannoro hakka waro afanno.

²⁹«Ani coyi'roommo coyi wo'minota tenne gobbara heedhineenna qorichisheemmo'ne woyite affinanni.

³⁰Yihudu moote Sedeqiyaasi shaannosi gede diinisira Baabilooni mootera Nabukadanatsoorira sayise uummonte gede, Gibitsete moote Hoofira shitara hassannosirira diinnasira sayise eemmo yiino» yee kuloommonsa.