Read Sidama_Qullaawa _Maxaafa ERMIYAASI 8 Bible Online

ERMIYAASI 8 - Sidama_Qullaawa _Maxaafa bible

ERMIYAASI 8

¹Kaaliiqi, «Hatte yannara Yihudu mootetanna ledosi gashshaanota, qeesootunnitanna himanaanonnita hattono wole Yerusaalamete hee'ranno manni miqqa baala waammate giddonni xinqine fushshinanni.

²Miqqansa gamba assine madaara agurre, ishinu gede xawoho billaallinsanni. Insa magansidhanninna amaa'litanni baxillunni soqqantanni heedhino arrishsho, aganinna beeddahe albaanni tunge agurranni.

³Gooffanni gattinoti hatti busha ilama billaallisoommowa heedhannori baalu, heeshshotenni roore reyo doodhitino. Konne coye coyi'roommohu ani Olantote Mootichi Kaaliiqaati» yii.

⁴Kaaliiqi mannaho, «Uwino manchi layinkimeeshsho dika"anno? Doogo so're baino manchi dihiganno?

⁵Ki'ne manni'ya wo'manka woyite anewa higa gibbine, mayira faffinanniyya? Kaphunnita maganna'ne huntine, anewa mayira higa gibbinanni?

⁶«Ki'ne coyidhinannire seekke macciishshoommo; coyidhinoonniri kayinni halaale di"ikkino; ki'ne giddonni bushu loosisi daafira, gaabbinohu mittunku dino. ‹Ma sao assummo ikka› yiinonku dino; Ki'ne mitti mitti'ne olaho harfiixanno farashshi gede, umi umi'ne doogo doddinanni.

⁷Rumichu, lembooli, teenni-qocenna qo'laante, hawado darante hadhe, arro galagalte higganno yanna egentino. Ki'ne manni'ya kayinni, ani oommo'ne hajajo diegentinoonni.

⁸«Ki'ne, ‹Kaaliiqi seera anfoommo daafira, ninke egennaammaho› yitinanni. Rosiisaano'ne ane qaale, kaphoho soorritinota diaffinoonni?

⁹Egennaammi'ne saalfattanno; amaddannore habbe tultaabbanno; ane qaale gibbuna, mayi egenno heedhannonsayya?

¹⁰Galte'nenna gate'ne wole gobba mannira eemmo; buxichuno dureessuno, hanaaqunninna maqqaallotenni duroo'manno; himanaano'nenna qeesooti'ne nafa manna dogganno.

¹¹Manni'ya mada mullare assite kiirtanno; xagichono digantanno; keeru nookkiha, ‹Keereholla! Keereholla!› yitanno.

¹²Manni'ya, konne tiyyi'nanniha, battete coye baala assi geeshsha, saalfate egenninoni? Saalfatannire agurina hanukki nafa diyiino; saalu maatirono diegennino. Kunnira wolootu ubbu gede insano ubbanno; qorichisheemmonsa yanna gawalonsa ikkitanno. Konne coyi'roommohu ani Kaaliiqaati» yii.

¹³Kaaliiqi, «Loosi'rinohu jajjasi gamba assi'rannonte gede, ani manna'ya gamba assi'rammora hasi'roommo. Insa kayinni laalo afidhinokki woyine, guma afidhinokkitenna daro qoortino haqqicho gedeere ikkitino. Kunni daafira oommonsa baatto, allaggu adhanno gede asseemmo» yii.

¹⁴Mannuno insa insanaawa, «Sammi yine mayira ofollineemmo? Maganinke Kaaliiqi reyote yoo yiinonke. Cubbo loonse isi aana sao assinoommohura, hunankera shaanno waa hayikkisinonkena, amme qiinshoonni katamma widira hinge xoonqe, hakkiicho reyine ba'nona.

¹⁵Ninke keerunna hurrete yanna, dagganno yine hexxine agadhinoommo; ikkollana waajjillu amadeennanke, halchonke mulla ikkite gattino.

¹⁶Diinnanke aliyye ragaanni, Daani katami geeshsha daggino; faradinsa himimmeette macciishshine, manse huxi'noommo. Insa dagginohu baattonkenna baattote aana noore, katammankenna katammate noo manna baala guddaraati» yaanno.

¹⁷Kaaliiqi, «Kune harfaamo hamasonna, buute soyemmo'neta affe; ayino hoola'nera didandaanno» yii.

¹⁸Sheshifachinshara dandiinannikkihu, lowo geeshsha bati'rino qarri amadinoe; wodani'ya lowo geeshsha daafurino.

¹⁹Hanni macciishshe! Manni'ya fafo gobbara hee're, «Kaaliiqi kataminkera Tsiyooni dihee'ranno? Mootenke hakkiicho dihee'ranno?» yaanni, raaranno raare macciishshoommo. Kaaliiqi mootensa, «Misillanna wole gobbata kaphu maganna, magansi'ratenninna kumbuulatenni, ane mayira hanqissinannie?» yee coyi'rinsa.

²⁰Mannuno, «Kuneeti gide gamba assinanni yanna sa'ino; arru goofino; ninke kayinni digantoommo» yaanni raaranno.

²¹Manni'ya madi'rita ane wodanino madi'rino; hexxo ba'eennae wi'loommo.

²²Geleaadi gobbara buudhinanni xagichi dinoni? Hakkiicho xagissannore dianfanni? Manni'ya mayira hura hoogi?