Read Sidama_Qullaawa _Maxaafa ERMIYAASI 9 Bible Online

ERMIYAASI 9 - Sidama_Qullaawa _Maxaafa bible

ERMIYAASI 9

¹Shinoonnihura manni'yara hashshanna barra wi'lammora, umi'ya wayi bale, ille'yano hindiiddote buicho ikkitoommero, hiitto baxeemmohu baino.

²Manni'ya kaajjadonna ammana nookkiha ikkinohura, insawiinni fafe halallitte baatto ha're hee'rate, gallanni darga afi'roommoro tashshi yaannoe.

³Worbichu digaanu giddonni fulannonte gede, manni'ya afiinnino kaphu fulanno. Kunnira baattote aana, halaalu darga kaphu moohino. Kaaliiqi, «Manni'ya bunshete aana bunshe ledanni no; ani Maganonsa ikkammora dihasidhino.

⁴«Mittu mittunku rodii dogaancho, olliichu baalu hemaancho ikkinona, roduu rodoosi qoropho; jaalu jaalasi hexxoonke.

⁵Mannu baalu jaalasi doge balalsanno; halaale coyi'rannohu dino; arrawinsa kapho coyi'ra rosino; cubbo loosatenni mannimmansa daafursitanno.

⁶Bunshete aana bunshe, dogate aana doga leddanni heedhanno; aneno Maganonsa assidhaera dihasidhino» yii.

⁷Kunni daafira, Olantote Mootichi Kaaliiqi, «Siwiila tume daashshannohu gede, ani manna'ya hatto asse fonqoleemmo; manni'ya busha coye assino daafira, hakkiinni sae wolere asseemmori dino.

⁸Arrawinsa shaanno maxxaati; wo'mante yannara kapho coyidhanno; ku'u ko'onne goowi alinni keere haa'ranno; wodanunni kayinni woshshaadasira hedanno.

⁹Halaalintanni konne manna qorichisha dihasiissannoe? Togoo manna dirabbisi'reemmo? Konne coye coyi'roommohu ani Kaaliiqaati.

¹⁰«Ilaallate yaadeemmo; saada hossanno xawirano wi'leemmo; baalunkuri moole goofino. Hakkaanni hige sa"annohu mittuno dino; mannunna saadate hirbano dimacciishshinanni; ceanna moyichu baalu darame goofino.

¹¹«Ani hedoommore asseemmo barra, Yerusaalamenna Yihudu katamma baala, diigante duuno ikkite gattanno; yeedaala calla galtannowa asseemmo» yii.

¹²Anino Kaaliiqa, «Konne coye wodanchannohu egennaamu manchi nooni? Woleho kulanno gede xawisattosihu ayeti? Baatto mannu hee'rannokkita mullichonna ona ikkite mayira ba'u?» yee xa'moommo.

¹³Kaaliiqino, «Kuni ikkinohu oommonsaha Seera'yanna hajajo'ya agurtino daafiraati. Insa anera dihajajantino; qaale'yano macciishsha gibbino.

¹⁴Haxawarroota ikkite, annuwansa rosiissinonsaha Ba"aali magansidhino.

¹⁵Kunnira ani Israeelete Magani Olantote Mootichi Kaaliiqi, kunni mannira qaraaranno haqqa itiseemmo; shaanno waano hayikkiseemmo.

¹⁶Insanna annuwansano affinokki daga mereero billaalliseemmonsa; co'o yite gooffa geeshsha shorreemmonsa» yiie.

¹⁷Olantote Mootichi, «Hanni ikkanni noo coye wodana assitine la'e! Wi'lanno meentono gamba asse! Haarookkise kiiranno meentono woshshe» yii.

¹⁸Mannuno, «Illenke hindiiddidhanno gede, baqqaallinkera hindiiddo daaddanno gede, haarookkise kiirannore rakkine woshshe» yii.

¹⁹Tsiyooni manni, «Ninke diigammoommo; saalfantoommo daafira uurra didandiinoommo; minnanke diigantino daafira, baattonke agurre ha'neemmo» yii.

²⁰Anino, «Ki'ne meento, Kaaliiqi yaannore macciishshe! Macca'ne qaalisi widira qolle! Wi'linanni gara seenni'nera rosiisse! Haarookkise kiirranni gara jaalla'nera kulle!

²¹Reyo waalchonke iillitino; qiishonke giddora e'ino; qaaqquulle doogote, wedellano gudumaaleho shitanno» yoommo.

²²Kaaliiqi, « ‹Mannu reeshshi ishinu gede base baalate tugamanno; minde worroonniwiinni, gamba assinannikki gidi gede ikkanno› yite, mannaho kuli» yiie.

²³Kaaliiqi, «Egennaamu egennosi, wolqaataamu wolqasi, dureessuno durummasi ku'loonke.

²⁴Ku'la hasi'rihu, ane egennasi, bagamannokki baxilliha ikka'yanna, halaalenna taalo yoo yeemmohu, ani Kaaliiqa ikkoommota buuxasi ku'lo; ane hagiirsiisanno coyi konneeti» yii.

²⁵Kaaliiqi, «Ani Gibitse, Yihuda, Edoomi, Amooninna Moaabi manna qorichisheemmo barri daanno. Kuni manninna wolu halalli manni baalu barciminoho. Ikkollana ane dimagansidhanno. Insano ikkito Israeelete manni giddonni ane gondooro agadhinohu dino» yii.