Read Sidama_Qullaawa _Maxaafa ERMIYAASI QURTO 1 Bible Online

ERMIYAASI QURTO 1 - Sidama_Qullaawa _Maxaafa bible

ERMIYAASI QURTO 1

¹Mannu wo'me hee'rannoti Yerusaalame, hiitto fano gattu! Gobba gosa ayirrisseenna heedhinoti, galte shiidhino mancho gede hiitto callase gattu! Katammate giddo mootitte ikkite heedhinoti, kuneeti borojjicho ikkitino.

²Hashsha wo'ma lowo geeshsha wi'litanna, baqqaallisera hindiiddo daaddanno. Albi baxillaanose baalate giddonni, sheshifachishannosehu mittu nafa dino. Halese ikkitinori baalu badhe wodhitinose; diina ikkitinose.

³Yihudu manni lowo qarrinna borojjimmate loosi gedensaanni, gobbansanni qafadame ha'rino. Hadhe wole gosa ledo heedhino; fooliishshidhannowano diafidhino. Gadadissannonsari qarru giddo heedheenna dagge, fultannokki gede assite amaddinonsa.

⁴Ayyaana ayirrisate Qullaawu Minira daannohu nookki daafira, Tsiyooni doogga ca'lamaddi yitino. Katamu waalchuwa onate; qeesootise wi'litino. Seennise yaadanno; Tsiyoonino dadillu giddo no.

⁵Cubbise batinyinni kainohunni, Kaaliiqi shetisinose daafira, diinnase isera umo ikkitino; insara baalu coyi qiniinonsa. Oososeno diinu qafadanno gede assino.

⁶Yerusaalamete gaamaarre baala sa'e hadhino. Albisootise hudi'rino geedimi gede daafurtino; shorritannonsariwiinni xooqqe fulate wolqa diafidhino.

⁷Diigante mullicho gattino Yerusaalame, xa albi xumillese heddanni no. Diinu anga ubbu yannara mittuno kaa'linosehu dino; qeeltuserino uwase la'e oso'litino.

⁸Kuneeti ayiirinyise baalu sae ha'rino; mulla ikkiteenna baalunku qacifatinose; saalisenni kainohunni gurura'anni alba diphitanno; Yerusaalame tiyyi'nanni cubbinni umose boshshitino.

⁹Battaawase reqecci yite leeltino; ise kayinni daannose coyi daafira, bashshi nafa diassitino. Uwase jaddote; sheshifachishinosehu mittuno dino. Diinna qeeltinoena, Kaaliiqa qarra'ya lai!

¹⁰Diinu angasi diriirse, jajjase baala wolqatenni adhino; ati Kaaliiqi e'annokki gede hooloottoti maganiweelo gosa, Qullaawu Minira wolqatenni e'anna la'ino.

¹¹Mannise baalu sagale hasi're qununa"anni no; lubbo gatisi'rate yite jajjinsa baalunni sagale soorridhanno. Kaaliiqa laie! Qarra'ya baala laie!

¹²Muleseenni hige sa"annohura baalaho, «Kawa higgine ane la'e! Kaaliiqi hanqi buwi yannara, anera iillino qarri geeshshihu amadinosi manchi horonta dino.

¹³Iiminni giira soyino; hatti giira raqqite miqicho iillitinoe. Woshshaado wore milli yaa hoolinoe; barra wo'ma dalagoommowa facci asse agurinoe.

¹⁴Loosoommo cubbo baala gamba asse usure, haxo'yara qambaru gede asse worino; duhuno ayirreennae daafuroommo. Kaaliiqi, gargadha dandeemmokkihura, diini'yara sayise uyinoe.

¹⁵Kaaliiqi wolqaataamma gaaddo'ya oso'lino; wedella'ya guddanno olanto soyino; manna'ya daankoonni gidi gede asse maniissino.

¹⁶Hindiiddo ille'yara wo'mite du'nantannohu kunniraati; sheshifachishaeranna jawaachishaera dandaannohu mittuno dino; diinu qeelinoe; manni'ya giddonnino gatinohu dino.

¹⁷Tsiyooni kaa'lo afi'rate anga fa'nitino; ikkollana sheshifachishannoseha diafidhino; Israeele, gaangaawisera noo gosa qassanno gede Kaaliiqi hajajino. Yerusaalameno insa giddo battete gede kiirantino.

¹⁸«Kaaliiqi halaalaanchoho; ani isira dihajajamoomma. Wo'mankawa heedhinoonni manni baalu macciishshe; anera iillino qarrano la'e. Ooso'ya seennunna labballu qafadante hadhino.

¹⁹Elo'ya woshshi'roomma; insa kayinni ane xagartinoe. Qeesootunna albisootu, lubbo gatisi'rate sagale hasidhanni heedhe, katamu dooggara reyitino.

²⁰Kaaliiqa'ya ballo, shetto'ya lai! Lubbo'ya dadillu giddo no. Cubbi'yanni kainohunni wodani'ya hiiqqamino. Doogga baalate manna shinanni; gallanni mini waalchira reyo no.

²¹Sheshifachishannoehu dinona, shete raareemmo raare macciishshie. Anera abbootto qoomama macciishshe, diini'ya baalu hagiidhino. Ane gatisate hexxo ootto barra rakke abbi; diinna'yano ane gede shettannore assi.

²²Bunshensa deerrinni yoo yiinsa; cubbi'ya baalu daafira, ane qorichishitto gede insano qorichishi. Shettotenni kainohunni uranni noommo; wodani'yano xiwamino» yoommo.