Read Sidama_Qullaawa _Maxaafa ERMIYAASI QURTO 2 Bible Online

ERMIYAASI QURTO 2 - Sidama_Qullaawa _Maxaafa bible

ERMIYAASI QURTO 2

¹Kaaliiqi hanqino daafira, Tsiyooni tunsichunni beeshshi. Israeelete gaamaarre, gordu iiminni uulla qole tugi. Hanqisi barra lekkasinni kaxxannowa, Yerusaalame nafa diqaaganno.

²Kaaliiqi Yihudu qacha baala, mararikkinni gudi; aarisinni Yihudunnita kaajjado qiisho diigi; Gashshootenna gashshaanosi shollinyeho tugi.

³Lowo geeshsha hanqe, Israeelete wolqa huni; diinu dayi yannarano, sammi yee giwinsa. Hanqisi aananke giirate gede buwe, baalanka coye giire gudino.

⁴Isi diinu gede maxxasi, ninkera alba qo'lino; hexxinoommore baala shee gudi; hanqisino Yerusaalamete aana giirate gede buwi.

⁵Kaaliiqi diinu gede ikke Israeele huni; qiishosenna mootete minnase diigi; Yihudu mannira wi'lanna didatto batidhu.

⁶Magansidhannowa Qullaawa Mineno diige huni; diru ayyaannanna Fooliishshote Barra habbanno gede assi; hanqisinni mootenna qeesoota shollishi.

⁷Kaaliiqi kakkalote dargasi giwi; Qullaawa Minesino aguri. Diinuno kinchu huxxasi diigara wore aguri; ninke hagiirrunni magansi'neemmo darga, insa qeexaalunniha assidhu.

⁸Kaaliiqi, Tsiyoonihu kinchu huxxi, diigamanno gede murci'rino; gudisame ba"annota egensiisate, siiwotenni bikkino. Shaenna kinchu huxxi baalu mitteenni diigamino.

⁹Huxxu cufanna baattote woroonni waamantino; waawannansano hiiqqaqqante ubbino. Mootenna ejjeetto xa qafadante no; kunni ka'a Maganu seera dikullanni; himanaanono Kaaliiqiwiinni ajuuja diafidhanno.

¹⁰Yerusaalamete geerri xiddu uddano uddidhe, umoho buluulo giggishshidhe, sammi yite bukote aana ofoltanno. Yerusaalamete seennino haxo heeshshi yee uulla la"anno.

¹¹Wi'late batinyinni kainohunni ille'ya jaaroortu; lubbo'yano shettote giddo no. Manni'ya ba"anni kainohunni dadillunni manii'roommo; oosonna qaaqquullu katamu dooggara dalagganno.

¹²Hudidhenna goo'riite amuuwinsawa higge raartanno; madaanote gede dalagge doogo baalate ubbanno; amansa anga heedheenna lubbonsa fultanno.

¹³Yerusaalame! Baxamootta Yerusaalame! Kunni ka'a mayeemmo? Hiitto asse sheshifachisheemmohe? Togo shetinohu horonta wolu dino; dagginohe bao lowo baari gede dannu dinoote; hexxo assi'rattari mitturino dino.

¹⁴Himanaanokki kaphonna mullicho ajuuja kultanno; qarrunni gatatta gede, cubbokki xawo difushshitino. Kultinohe sokka kaphohonna so'ronnite.

¹⁵Katamu widoonni hige sa"anno manni baalu, mishe angichunni kulannohe. «Baxamihunna gobba baala naaddu katami konneeti?» yee, umo shafanni qacifatanno.

¹⁶Diinnakki baala qacifattannohe; hinko faaccanni, «Agadhinoommo barri konneeti! Xa kune lubbotenni hee'ne la'noommo!» yitanno.

¹⁷Kaaliiqi hedinore baala assino; alba balaxe coyi'rino garinni, kune mararro nookkiha diigino. Diinu hagiidhanno gede assinohe; diinikkira wolqa ledino.

¹⁸Yerusaalame! Huxxuwakki Kaaliiqiwa higge raarto; hindiiddokkino hashshanna barra xashshimma lolakko; wi'latenna dadillunni umokki daafursi. Wi'la uurrissooti; hindiiddono illekkinni qoortoonke.

¹⁹Oosokki dooggate madde baalate, hudetenni reyitaraatina, hashsha wo'ma marro marro higge, baqqi yite Kaaliiqiwa raari. Wodanikkira noore co'o assite isira kulatenni, oosokkira maaro huucci'ri.

²⁰Kaaliiqa'ya lai! Ninke gede assite wole qorichishoottoni? Meentu ilansanna lossi'rino ooso itona? Qeesootanna himanaano Qullaawa Mine shinona?

²¹Wedellunna geerru mittu garinni reyite dooggate ubbu; wedellanna aja seenne diinu bagadi gudino; hanqikki barra mararro nookkiha gorrisiisootto.

²²Jilu barri gede diina'ya base baalatenni koyisse gamba assootto; hanqikki barra baotenni gate fulinohu mittuno dino; ile lossi'roommorenna baxeemmore ooso'ya shitino.