Read Sidama_Qullaawa _Maxaafa ERMIYAASI QURTO 4 Bible Online

ERMIYAASI QURTO 4 - Sidama_Qullaawa _Maxaafa bible

ERMIYAASI QURTO 4

¹Culku xummesi hoogi; filu culki danasi bai. Qullaawa Mine minnoonni kinna, doogga baalate billaallitu.

²Tsiyooni wedelli culkunni roore ayirraddaati; xa kayinni doru uduunni gede shottino.

³ Hiyyeeyye nafa qaaqquullese qansidhe lossidhanno; manni'ya kayinni caacurresi mararannokki balgudi gedeeha ikkino.

⁴Qaaqquullensa hudenna goo'ro shitanno gede assitu; oosonsa sagale huuccidhanno; aannonsahu kayinni dino.

⁵Coommitinota dancha sagale ittannori, xa doogga baalate hudetenni reyitanni no. La'mite lophitinori, giggiltino sagale hasidhanni ishine hogooffanno.

⁶Manni'yara iillino qorichi, kaa'lote anga diriirsannohu nookkiha, hedeweelcho Kaaliiqiwiinni dirrinohu, Soddoomu qorichinni rooreho.

⁷Aja gashshaanonke danchuulleho; ci'muno diqasinoreeti; camote gede bilicci yitannoreetinna dhaabbatootaho.

⁸Xa kayinni albinsa diqillote gede kolishshi'rino; doogga baalate ubbe heedheenna, bade afannonsahu dino. Haqqu gede moolteenna, goginsa miqichu aana qa'mino.

⁹Gedensaanni sagale hoogge, hudetenni sununni reyitinorinni, bagadu shiinori woyyate.

¹⁰Manni'ya aana dayino qoomami, jawaata masille abbino: Qaaqquulle mararanno meenti, uminsa qaaqquulle gafe itino.

¹¹Kaaliiqi wo'ma hanqosi wolqa facci asse agurino; Tsiyooni baatto ittanno giira qasino.

¹²Base baalate noori allaggu gashshaano nafa, Yerusaalamete cufanna eannohu hee'rannota diammantino.

¹³Ikkollana, katamaho beebbaataammu mundee duntinori, himanaanose loossino cubbinna, qeesootise assitino bunshenni kainohunni kuni coyi ikkino.

¹⁴Insa, ballootu gede dooggate raataabbanno; mundeetenni battaabbino daafira, mannu insa kisa qorophanno.

¹⁵Kunnira mannu, «Ki'ne battaabbinoonniri! Kissinoonte! Ho'le kawiinni» yaanni cancanno. Mannu haa'ra giweennansa raataabbanni, gobbatenni gobba sa'anno.

¹⁶Insa Kaaliiqi umisi billaallisino; kunni ka'a insara yee dimitii'manno. Qeesootu ayirrinye diafidhanno; geerrano naadannohu dihee'ranno.

¹⁷Afi'neemmokki kaa'lora doogo la'nanna, ille xissitinonke. Dagge kaa'litannokki gosa agadhinoommo.

¹⁸Doogo ha'ra dandiineemmokki gede, diininke illaallisanni millo ho'linonke. Dirinke goofino; goofimarchinkeno iillino.

¹⁹Iiminni dirranno allamurchinni roore, buubbe dagge shorritinonke. Ilaallate aana shorritinonke; halallitte gobbara kushe goxxe agartinonke.

²⁰Horritannonkeri baaluwiinni gatisannoha, Kaaliiqi doorinoha, lubbonkera hexxinoommo moote qafaddino.

²¹Edoominna Uutsi gosa, dandiitinanni yannara hagiidhe! Oso'le! Maganunnihu hanqu finiinchi daanni noo'ne; aggine mullootu gaggabbinanni.

²²Tsiyooni cubbise asale baattino; Kaaliiqi kunni ka'a qafadammoommowa diagurannonke. Edoomi! Ate kayinni Kaaliiqi qorichishannohe; cubbokkino xawo fushshanno.