Read Sidama_Qullaawa _Maxaafa HIZIQEELI 11 Bible Online

HIZIQEELI 11 - Sidama_Qullaawa _Maxaafa bible

HIZIQEELI 11

¹Maganu Ayyaani uullanni iima qole kayise"e, soojjaati ragaanni noohuwa Qullaawu Mini waalchiwa abbie. Hakkiicho waalchu mule 25 manna afummo. Insa mereero mannu albisoota ikkitinori Azuuri beetti Azaaniyanna Beenaya beetti Felaaxiyi no.

²Kaaliiqi, «Koo manchi beetto, kuni manni Yerusaalamete katamira busha hedo hede, busha mala malanno.

³Qoleno, ‹Galagalle minna mi'nineemmo yanna muleeti; katamu maala ganfanni midaano gede ikkanna ninke qolle midaanote giddo noo maala ikkinoommo. Ikkirono, woliri hoogirono tini midaano giiratenni goltinonke› yitanno.

⁴Kunnira koo mancho, konne busha himana kulinsa» yiie.

⁵Hakkunni gedensaanni, Kaaliiqi Ayyaani ane aanira dirri. Kaaliiqino ane widoonni qole, «Israeelete manna, hedo'nenna coyidhinoonnire baala afoommo.

⁶Kunni katamira lowo manna shaa'nenni kainohunni doogga baalate reeshshu wo'mino.

⁷«Kunnira, ani Mootichu Kaaliiqi yeemmo'nehu konneeti: Kuni katami halaalenka maala ganfanni midaano gedeeho; hatto ikkina, ganfanni maali maatiyya? Ki'ne shitinoonni manni reeshsha di"ikkino? Ki'neno heedhinannikki gede kunni kataminni fushshe tugeemmo'ne.

⁸Waajjitinannihu bagado ikkino daafira, iso soyemmo'ne.

⁹Katami'nenni fushshe allaggaho sayise eemmo'ne; reyote yoo yeemmo'ne.

¹⁰Kunnira, umi'ne gobbara olunni reyitinanni; hatte yannara, mannu baalu ani Kaaliiqa ikkoommota afanno.

¹¹Bushshu midaano giddose noo maala giiratenni gatissannohu gede asse, kuni katami ki'ne digatisanno'ne. Israeelete baattora hiikkono martine digattinanni.

¹²Seera'yanna woga'ya diigatenni ollii'nera noo manni seeranna woga wonshitinoonnihura, qorichishoommo'nehu ani Kaaliiqa ikkoommota affinanni» yii.

¹³Ani himana coyi'ranni hee'reenna, Felaaxiya uwe reyi. Anino alba hige baattote aana diriire uwe qoonqo'ya naggi asse, «Mooticha Kaaliiqa ballo, Israeelete gattinore baala gudattoraatini?» yoommo.

¹⁵«Koo manchi beetto, Yerusaalamete heedhannori, atenna qafadante wole gobbara noori fiixikki Israeelete daafira coyi'rantanni no. Insano, ‹Qafadante noori lowo geeshsha faffe noo daafira, Kaaliiqa magansi'ra didandiitino. Kunnira, Maganu baatto ninkera uyinonke› yitanno.

¹⁶«Kunnira, qafadante wole gobbara heedhannorira fiixikkira ani yeemmohere baala kulinsa. Qafadante fafo daga giddo heedhannonna wole gobbuwara billaallitanno gede assoommohu aneeti. Kayinnilla, yannate geeshsha billaallisummonsaha ikkirono, ani martinowa ledonsa noommo.

¹⁷«Qoleno, ani Mootichu Kaaliiqi billaallisoommo'ne baatto baalatenni daware abbeemmo'ne; Israeelete baattono galagalche eemmo'ne.

¹⁸Higginanni yannara, hakkiicho affinannita saalsiissannotanna tiyyi'nannita kaphu maganna co'o assitine hunne.

¹⁹Haaro wodananna haaro surre eemmo'ne; mokkookka kinchu wodana giddo'nenni hoole, owaata wodana eemmo'ne.

²⁰Hatte yannara Seera'ya wonshitinanni; hajajo'ya baalanta ayirrissinanni. Ki'ne manna'ya ikkitinanni; anino Magano'ne ikkeemmo.

²¹Saalsiisannorenna tiyyi'nannire kaphu maganna magansi'ra baxanno manna kayinni qorichisheemmo. Assitinohura bushu coyi baalaho rabbisi'reemmonsa. Konne coye coyi'roommohu ani Mootichu Kaaliiqaati» yii.

²²Hatte yannara, kirubeeli qoollansa diriirsite buubbu. Lami-qallano ledonsa hadhu; Israeelete Magani ayirrinyino iimansa leellanni no.

²³Hakku ayirrinyino katama agure soojjaatoonni noo ilaaliwa hige ha'ri.

²⁴Ajuujatenni Maganu Ayyaani baattotenni iima qole kayise, Baabilooni qafadante nooriwa haa're massie. Hakkunni gedensaanni ajuuja maaxantue.

²⁵Anino Kaaliiqi leellishinoere baala qafadante noorira kuloommonsa.