Read Sidama_Qullaawa _Maxaafa HIZIQEELI 2 Bible Online

HIZIQEELI 2 - Sidama_Qullaawa _Maxaafa bible

HIZIQEELI 2

¹Hakkunni gedensaanni Kaaliiqi, «Koo manchi beetto, hasaawisammohera hasi'roommona, ka'e lekkakkinni uurri» yiie.

²Isi coyi'ranni hee'reennaenni, Ayyaanisi giddo'yara e"e lekka'yanni uurrisie. Qoleno,

³«Koo manchi beetto, kuneeti Israeelete manniwa soyammoheraati. Insa xaa geeshsha Akaakkansa gede haxawarrootanna anewa higgannokkire ikkite no.

⁴Insa mokkookkootahonna wodana xillitinoreeti. Kunnira, ani Mootichu Kaaliiqi kuleemmonsare baala egensiisattonsa gede insawa soyemmohe.

⁵Hakko haxawarrooti macciishshituherono macciishsha gibbuherono, giddonsa himanaanchu noota affanno.

⁶«Kayinnilla koo mancho, haxawarroota ikkiturono, insa coyidhanno coyeno waajjitooti! Haxawarroota ikkitinohura utu, kokko'lunna iddu gede ikkite waajjishshuhero nafa horonta waajjitootinsa.

⁷Haxawarra manna ikkitinohura, macciishshituherono macciishsha gibbuherono, ani yeemmohere kulattonsa.

⁸«Koo manchi beetto, ani kuleemmohere macciishshi. Atino insa gede haxawarra ikkitooti; afookki fa'nite, eemmohere iti» yiie.

⁹Hakkunni gedensaanni, mitte anga anewa higge diriirte noota afummo. Tenne angara xaaxamino maxaafi no.

¹⁰Hatti anga maxaafa alba'yaanni fantu. Laummo woyite, maxaafu giddoonninna gobbaanni borreessaminoho. Borreessaminorino wi'late, dadillehonna raarete.