Read Sidama_Qullaawa _Maxaafa HIZIQEELI 22 Bible Online

HIZIQEELI 22 - Sidama_Qullaawa _Maxaafa bible

HIZIQEELI 22

²«Koo manchi beetto, manna shitannori wo'mitino katamira, yoo yaattora qixxaawootto? Hakkawoyiteetiro, assinoha tiyyi'nanni coye baala xawisse kulisi.

³Kunni katamira ani Mootichu Kaaliiqi yeemmori konneeti: Umikkiha lowo manna shoottohuranna kaphu maganna magansi'ratenni umokki batteessoottohura baokki barri iillino.

⁴Manna shaakkinni sao assootto; seekki'rootto maganna kaphunnitenni battaawootto. Kunnira, baokki barri rahino; isinni iillino. Daga arrassitannohe gedenna gobba baala qacifattannohe gede assoommohehu kunniraati.

⁵Seeriweello ikkakkinni kainohunni, mulenna xeertote noo gobba mishshe arrassitannohe.

⁶«Giddokki noori Israeelete albisooti duuchunku, wolqansa addaxxite manna shitanno.

⁷Giddokki annunna ama shollitino; manni gobba manna xagartinanni; galte afi'rinokki meentonna buxo tootayyeessitinanni.

⁸Qullaawa uduunne'ya lageessitinoonni; Fooliishshote Barrano shotissinoonni.

⁹Ki'ne giddonni mitu mitu woloota shiishiishate kapho coyidhanno; mitu mituno kaphu magannara kakkalloonniha ittanno; mitu mitu foore disarmannoho.

¹⁰Mitu mitu layinki amasi ledo fooranno; mitu mitu godowu dayino mancho ledo wolqatenni siimu xaadooshshe assanno.

¹¹Mitu mitu olliinsa meenti ledo foortanno; wolootu oosonsa seenni ledo foortanno. Qoltineno, anni'neta woy ama'ne beetto rodoo'ne ledo foortinanni.

¹²Mannikki giddonni mitu mitu manna shaate woxe adhitanno; mitu mitu uminsa mannira Israeelete nafa qallote liqiissitanno. Insa hanaaqqe doogimale duroo'mitanno; ane horonta habbino. Konne coye coyi'reemmohu ani Mootichu Kaaliiqaati.

¹³«Hanaaqo'nenna manna shaa'ne giweemmo daafira, ki'nera wolqa'ya leellisheemmo.

¹⁴Ani qorichishummo'nehu gedensaanni wolqa heedhanno'neha lawanno'neni? Anga gotti assidhine affinanniha lawanno'neni? Konne coye coyi'roommohu ani Mootichu Kaaliiqaati; coyi'roommoreno wonsheemmo.

¹⁵Mannakki gobba baalatenna gosa baalate mereero billaalliseemmo; bushu loosikki hakko gawa'lanno.

¹⁶Wole gosa albaanni shollatto; ati kayinni, ani Kaaliiqa ikkoommota afatto» yii.

¹⁸«Koo manchi beetto, Israeelete manni anera mittore diledannoe; insa birra daashshinihu gedensaanni hundaho shaarra ikkite gattanno camo, qorqorro, siwiilinna irsaasete gedeereeti.

¹⁹Kunnira, ani Mootichu Kaaliiqi, Israeelete manni hundaho gatino shaarri gede tidhinokkiha ikkinota kuleemmonsa. Duuchanka mitteenni gamba asse Yerusaalame abbeemmo.

²⁰Ani siwiila daashshate gamba asse giirate worannohu gedeeti; kunni garinni Israeele gamba asse hanqi'yanni bushsheemmo. Insano Yerusaalamete katamira birru giirate giddo daaqannohu gede ikkite daaqqanno.

²²Hatte yannara, ani Mootichu Kaaliiqa ikkoommotanna hanqi'yanni qorichishoommonsata affanno» yiie.

²³Kaaliiqi galagale,

²⁴«Koo manchi beetto, baattonsa battaabbinohura, hanqi'yanni xeena ho'le qorichishammonsara kaoommota Israeelete kulinsa.

²⁵Albisootinsa, shiino saada gaangeesse itanno doobbiyi gedeereeti; mannano mararro nookkiha shitanno. Woxeno ikko wole jajja affure baala adhitanno; manna shaansa lowo meento galtiweelo assitino.

²⁶Qeesootu seera'ya huntanno; qullaawaricho diayirrissanno. Keeraa'minohanna keeraa'minokkiha, danchanna busha badde dikultanno. Fooliishshote Barrano diayirrissanno; kunninni kainohunni Israeelete manni ane shollishinoe.

²⁷Roorrootinsa, shitino saada bibbiddanno hiyyeeyye gedeereeti; hanaaqunni duroo'mitara yite manna shitanno.

²⁸Himanaanonsa mineho noora buuranno manchi gede, konne duuchanka cubbo dibbanno; dharu ajuuja la'anno; kaphu himana kultanno. ‹Mootichu Kaaliiqi kulinonkere coyi'neemmo› yitanno. Kayinnilla ani Kaaliiqi mittoreno dikuloommonsa.

²⁹Dureeyye wolunniha dogge gudhitanno; buxanenna qarrantinore raateessitanno. Manni gobba manni halaale beeshshite tootayyeessitanno.

³⁰Hanqi'yanni gobba hunate albaanni, kinchu huxxa huxxannohanna diigantino huxxuwa mule uurre gargarannoha hasi'reemmo; xaa geeshsha kayinni mittono diafi'roommo.

³¹Kunnira, hanqo'ya insa aana dirriseemmo; assitino bunshe baalantenni kainohunni, insa aari'ya giiranni huneemmo. Konne coye coyi'roommohu ani Mootichu Kaaliiqaati» yii.