Read Sidama_Qullaawa _Maxaafa HIZIQEELI 23 Bible Online

HIZIQEELI 23 - Sidama_Qullaawa _Maxaafa bible

HIZIQEELI 23

²«Koo manchi beetto, mitte ama iltinori lamu seenni no.

³Insano, seennimmansa yannara Gibitsete hee're fooranno labballi guntutansa amammade macca huneennansa sholle forannore ikki.

⁴Bayiriidita Ohoola[4] yinanni; ise Samaariyaho. Maa'niidita Ohooliiba[5] yinanni; ise Yerusaalamete. Ani insa lamenta adheenna ooso ilinoe.

⁵Ohoola ani adhummosehu gedensaanni nafa foorrese diagurtino; Asoorootu ellase hoode doddino.

⁶Insano, bule uddano uddidhino olantooti; ejjeettote; qolteno lowo geeshsha gaamartino hajajaanooti. Baalunku dana xu'mitino wedellaatinna wolqaataamma faradaasineeti.

⁷Iseno Asoorootu roorrootira manninatese uyitino. Foorreseno, Asoorootunnita kaphu maganna magansi'ratenni umose nafa batteessitanno gede assitinose.

⁸Ledose fooranno labballi guntutase amammadeenna macca ba'uwa Gibitsete gobbara foorrese diagurtino. Seenninatise yannanni kayise, labballu foortannota ikkitinota affe ledose foortanno.

⁹Kunnira, lowo geeshsha hasidhannorira Asoorootu ellasera manninatese sayise oommo.

¹⁰Insano imaanase mulqite mullicho agurtinose; oososenna seennese qafaddino; iseno shitino. Meentu baalu isere hasaawino.

¹¹«Rodoose Ohooliiba konne affanni heedhenni, higa agurte roorsite foortino; Ohoolanni roore foortannota ikkitino.

¹²Iseno jajjabba Asoorootu ejjeettonna olu hajajaano, biifinoha mittu dani imaana uddidhanno olantonna roorroota faradaasine dana xu'mitino wedella baxxe hoodensa doddino.

¹³Tini maa'niiditi bayira rodoose gede yortotenni battaabbe ba'inota afoommo.

¹⁴«Foorreseno batidhanni hadhino; duumu xiillichu daninni biifinse minu aana seekkinoonni misilla labbanno Baabiloonoota halchitino. Insano hallo hiitotenni qodhite, umoho jawa xaanxoonni koffiya wodhitinoreeti; qolteno faradaasinete roorrootaati.

¹⁵

¹⁶Hattenne misilla la'anni heedhenni yortotenni giirante, insa heedhannowa Baabilooni manna soqqitino.

¹⁷Baabiloonootuno, ledose foortara daggino; deerra sa'e xaadde batteessitinosehura, tiyyidhe gibbinose.

¹⁸Xawo fulte, foorrese manna baalaho reqecci assitino; anino rodoose cee'mummo gede iseno cee'mishshinoe.

¹⁹Seennimmase yannara Gibitsete heedhe assitino foorre agurtukkinni, foorrese batissino.

²⁰Hamaandete egennantino Gibitsooti ledo foortara insawa hadhara hasidhino» yee coyi'rie.

²¹Ohooliiba, seennimmakkinni nootta yannara, labballu guntutakki amammadanna macca baitta waro assootta batte xaano ledde assattara hasi'ratta.

²²Kaaliiqi, «Ohooliiba, ani Mootichu Kaaliiqi yeemmohere macciishshi; hakkuri ellakki cee'mishshinohe. Kayinnilla, insa atera hanqitanno gede asseemmo; doyissite amaddannohe gede insa haa're kawiira abbeemmo.

²³Baabiloonootanna Keledoota baala abbeemmo; Feqoodi, Shoaaninna Qoaani labballonna Asooroota baala haa're abbeemmo. Wedella, biiffino ejjeettonna olu hajajaano, jajjabba roorrootanna lowo ayirrinye afidhinore faradaasine kawiira gamba asseemmo.

²⁴Insano lowo faradi gaare olunnitenninna sinqe hogomboonni gaarenni dukkisantinota jawa olanto adhite dagge, aliyye ragaanni bala tuggannohe. Wonqotenninna umoho wodhinanni gullee siwiilunnitenni gargadhitanni doyissite amaddannohe. Anino insara sayise eemmohe; insano seerinsa garinni yoo yitannohe.

²⁵Ani atera hanqoommo daafira, insano hanqinsanni ate aana hasidhure assitanno gede agureemmo. Sanokkinna maccuwakki murtanno; oosokkino shitanno. Gattinore oosokkinna seennekki atewiinni hawulukke haadhe giirtanno.

²⁶Imaanakki mulqite ka'a qolte tugganno; irrakkino adhitanno.

²⁷Foorrekkinna alba Gibitsete heedhe rosoottaha saalsiisanno assoote baala aguratta gede asseemmohe. Layinkimeeshsho kaphu magannawa higge dila"atta; Gibitsennireno diqaagatta» yiise.

²⁸Mootichu Kaaliiqi, «Tiyyidhe giwootta dagara sayise eemmohe.

²⁹Ate gibbanno daafira, loosi'roottaha baala adhitanno. Imaanakki mulqite foortanno mancho assinannihu gede, teedakki reqecci assitanno. Yortokkinna kassi yaa hoogakki,

³⁰qolteno foorrekki konne coye haadhe abbitinohe. Daga baalate ledo foorte kaphu magannansanni umokki batteessootta.

³¹Rodookki ha'ruma ha'runsoottahura, ise cingiishshidhinoha hanqu finiincho cingiishshi'ratta gede asseemmohe» yiise.

³²Mootichu Kaaliiqi, «Kuneeti rodookki aggino finiinchira agatta; kuni qarrino, lowohonna fullannikkiho. Mannu baalu haariimanni arrassannohe; qarrikki finiinchino wo'maho.

³³Qorichu finiinchira, waajjishannorinna bao wo'mitino. Hattenne rodookki Samaariyu qarri, dimbite xiwamatta gede assannohe.

³⁴Shiimano gatisittakkinni cingiishshi'ratta; qarra agootta finiincho hiiqqaqqite, baccunni unuunnakki daddadhatta. Ani Mootichu Kaaliiqi konne coye coyi'roommo» yii.

³⁵Xaano Mootichu Kaaliiqi, «Hawoottaehuranna alba bushshe badhe wodhoottaehura, yortokkinna foorrekki daafira qarra adhatta» yiise.

³⁶Kaaliiqi, «Koo manchi beetto, Ohoolanna Ohooliiba aana yoo yaattora qixxaawootto? Tiyyi'nanni coye assino daafira, insa yoote shiqishi.

³⁷Lamenti foorannoreetinna manna shaannoreeti; foorinohu kaphu maganna ledooti; shiinorino anera ilantino oosooti. Ooso'ya kaphu magannansara kakkalino.

³⁸Insa assino sao tenne calla di"ikkitino; hatte yannara, Qullaawa Mine'yano batteessino. Ani hirqoommoha Fooliishshonniha Barra'ya diigino.

³⁹Kaphu magannara kakkalara ooso'ya gorri barra, e"e Qullaawa Mine'ya batteessino.

⁴⁰«Xeerto gobbanni labballo abbinanninsa gede marro marro hige manna soqqino; hasi'rino labballino dayinonsa. Lamenti roduuwi bisonsa hayishshi're, illete gaarira kuula buudhe, irransano wodhino.

⁴¹Biifino daallasinsara ofollino; ani oommonsari hixaanunna ejersu zayite gattukkinni, dancha coye baala albansaanni noo xarapheezzi aana dire worino.

⁴²Halallitte gobbanni koyinseenna dayino labballi mitteenni gamba yee, cancanni agino; insano meentoho angansara gume wortino. Lamentera umoho biiffino ba'latto wortinonsa.

⁴³Anino wodani'yanni, ‹Kuni labballi foorretenni akkalino meenti ledo foorino› yee hedoommo.

⁴⁴Labballu marro marro hige fooranno meentiwa marannonte gede, hakkuri halallitte gobbanni daggino labballi foorretenni battaawinoriwa Ohoolanna Ohooliibawa marro marro hige marino.

⁴⁵Fooranna manna shaa rosinohura, keeraano fooransaranna manna shaansa daafira yoo yitannonsa» yii.

⁴⁶Mootichu Kaaliiqi, «Hembeelsannonsahanna mulqi'rannonsaha hayyeessa macciishshannokki manna haadhe abbi!

⁴⁷Kuni mannino kinnatenni ganonsa; bisetennino doddolonsa; oosonsa shoo; minnansano giiro.

⁴⁸Insa lamente roduuwi gede foora agurate, meentu baalu insanni jiilanno gede, baattote aaninni tini akkimale ba'anno gede asseemmo.

⁴⁹Ki'ne lamenti roduuwi, akkimalle'nenninna kaphu maganna magansi'ratenni loossinoonni cubbira qorichisheemmo'ne. Ani Mooticha Kaaliiqa ikkoommota hakkawoyite affinanni» yii.