Read Sidama_Qullaawa _Maxaafa HIZIQEELI 3 Bible Online

HIZIQEELI 3 - Sidama_Qullaawa _Maxaafa bible

HIZIQEELI 3

¹Maganuno, «Koo manchi beetto, konne maxaafa iti; Israeelete mannirano marte coyi'ri» yiie.

²Anino, afoo'ya fa'nummo; maxaafano chuucishie.

³Isino, «Koo manchi beetto, konne maxaafa iti; godowakkino wonshi'ri» yiie. Anino itummo; afii'yarano malawimma coommie.

⁴Hakkunni gedensaanni Maganu, «Koo manchi beetto, Israeelete manniwa marte, ani yeemmohere kulinsa.

⁵Ani Israeelootunniwa ikkinnina, wole qaalensa egennoottokki gosawa disoyemmohe.

⁶Qaalensa egennoottokkitewa jawa gosawa soommoheha ikkoommero, macciishshitannohehu baino.

⁷Israeelete manni giddo kayinni, macciishshannohehu mittu nafa dihee'ranno. Baalunku mokkookkootanna wodana xillitinore ikkitinohura, ati yaattota agurina ani yeemmota nafa dimacciishshitanno.

⁸Ani kayinni, ate insa gede kaajjadonna yinoonnita bashshi assattokkiha asseemmohe.

⁹Ate dhinqu kinchinna kaajjadu siwiili gedeeha asseemmohe. Kunnira, hakko haxawarroota waajjitooti» yiie.

¹⁰Qoleno, «Koo manchi beetto, kuleemmohere baala seekkite wodanchi.

¹¹Qafadante nooriwa gobbakki manniwa marte, macciishshituherono macciishsha gibbuherono, ani Mootichu Kaaliiqi yeemmonsare baala kulinsa» yiie.

¹²Hakkunni gedensaanni, Maganu Ayyaani iima qole gotti assie. Badhe'yaanni, «Gordoho ayirre hee'rannohu Kaaliiqi galatamo» yitannota lowo huuro macciishshoommo.

¹³Shoolunku kalaqami qoolla bubbete aana mimmitoho ga'nite luultanna macciishshummo. Lami-qale hadhanno woyiteno, banqote gede beleqanno luulo macciishshoommo.

¹⁴Kaaliiqiti jawaata wolqa anewa daggu. Ayyaanisi iima qole kayisie yannara, aarunna hanqu giddo wo'mie.

¹⁵Hakkunni gedensaanni, Kebaari Wayi mule noohuwa Abiibi Gaariwa dayummo. Kuni dargino qafadamino manni hee'rannowaati. Laoommorinna macciishshoommori baalu waajjisheennae jalli yoommo daafira, hakkiicho insa ledo 7 barra keeshshoommo.

¹⁶Lamalu barri gedensaanni Kaaliiqi,

¹⁷«Koo manchi beetto, ani Israeelete mannira agaraancho assoommohe. Kunnira, coyi'reemmore macciishshite, qorophisiisinsa.

¹⁸Bushu manchi cubbisinni kainohunni reyannota kuleemmosi yannara, reyotenni gatate bushu loosisinni higanno gede qorophisiisa hoogittosiro, isi cubbisinni reyanno. Isi reyora ate xa'meemmohe.

¹⁹Cubbaataamu qorophisiisseenna cubbisinni higa giwiro, cubbisinni kainohunni reyanno. Ati kayinni gatatto.

²⁰«Keeraanchu manchi danchummasi agure, busha looso loosa hanafeenna, ani qarru aana uwanno gede assummoro, atino qolte qorophisiisa hoogittoro, cubbisinni reyanno. Albaanni assino danchumma dikiireemmosi; isi reyorano ate xa'meemmo.

²¹Keeraanchu manchi qorophisiisseenna cubbo loosa agure danchumma assiro, lubbotenni hee'ranno; atino gatatto» yiie.

²²Hakkunni gedensaanni, jawaata Kaaliiqi wolqa ane aana heedheenna, «Ka'e hakka lagicha mari. Hakkiicho coyi'reemmohena» yaanna macciishshummo.

²³Kunnira, anino kae lagicha dirrummo. Hakkono, Kebaari Wayi mule afummo garinni Kaaliiqi ayirrinyi leellie; anino alba hige gombisamummo.

²⁴Kaaliiqi Ayyaani kayinni, giddo'yara e"e lekka'yanni uurrisie. Kaaliiqino, «Minikkira marte cufidhe ofolli.

²⁵Koo manchi beetto, siiwotenni usurtannohe daafira, fulte mannu mereero ha'rama didandaatto.

²⁶Haxawarroota ikkituro nafa rufattonsakki gede, arrawokki amade danqicha asseemmohe.

²⁷Galagale coyi'reemmohe woyitenna arrawokki tireemmohe woyite, ani Mootichu Kaaliiqi eemmohe qaale kulattonsa. Insa giddonni mitu mitu macciishshitannohe; mitu mitu kayinni, haxawarroota ikkitinohura yaattore macciishsha dihasidhanno» yiie.