Read Sidama_Qullaawa _Maxaafa HIZIQEELI 37 Bible Online

HIZIQEELI 37 - Sidama_Qullaawa _Maxaafa bible

HIZIQEELI 37

¹Kaaliiqiti jawaata wolqa anewa daggu; Ayyaanisi ane masse lowo miqqa duunantino lagichira worie.

²Miqqate mereero ka'anna kawa ha'risie; lagichaho lowo geeshsha mooltinoti lowo miqqa no.

³Isino, «Koo manchi beetto, tini miqqa galagalte lubbotenni heedhannoha lawannoheni?» yee xa'mie. Anino, «Mooticha'ya Kaaliiqa, konne afattohu ateetilla» yoommo.

⁴Isino, «Tenne miqqara, ‹Ki'ne moola miqqa, Kaaliiqi qaale macciishshe.

⁵Ani Mootichu Kaaliiqi yeemmonsare baala: Giddo'ne foole wore galagaltine lubbotenni heedhinanni gede asseemmo'ne.

⁶Diimmichonna maala ee, aanaho goga diweemmo'ne; giddo'ne foole wore, galagaltine lubbotenni heedhinanni gede asseemmo'ne. Hatte yannara, ani Kaaliiqa ikkoommota affinanni› yiino yite kulinsa» yiie.

⁷Anino hajajinoe garinni himana kuloommonsa. Coyi'ranni hee're, qaqa'eette macciishshoommo; miqqano insa insanaawa xaadde sufantu.

⁸La"anni hee'reenna miqqa, diimmichunna maalu guggushshi; qoleno gogu aanaho diwami; foole kayinni diafidhino.

⁹Kaaliiqino, «Koo manchi beetto, bubbe baalunku raginni dagge kunni reyino manni giddora e'eenna, galagalte lubbotenni heedhanno gede, ani Mootichu Kaaliiqi hajajoommota kulinsa» yiie.

¹⁰Anino hajajinoe garinni himana kuloommo; foolu giddora higeennansa, baalunku lubbo afidhe ka'e uurritu; lowo geeshsha bati'ra olanto ikkitu.

¹¹Kaaliiqi, «Koo manchi beetto, Israeelete manni tenne miqqa gedeehowe. Insa, ‹Kune miqqanke mooltino; kunni ka'ira noonke kaayyo ba'eenna hexxo nookkire ikkinoommo› yitanno.

¹²Kunnira, manni'yara Israeelete himana kulinsa: Ani Mootichu Kaaliiqi waammate giddonni fushshe, qole gobba'ne abbeemmo'ne.

¹³Ki'ne manna'ya waammate giddonni fushsheemmo yannara, ani Kaaliiqa ikkoommota affinanni.

¹⁴Foole'ya giddo woreemmo'ne; lubbotenni heedhinanni gede asseemmo'ne. Umi'ne baattora heedhinanni gede asseemmo'ne. Hatte yannara, ani Kaaliiqa ikkoommota affinanni. Konne asseemmo gede coyi'roommo; yoommoreno wonsheemmo. Ani Kaaliiqi konne coye coyi'roommo» yii.

¹⁵Kaaliiqi galagale,

¹⁶«Koo manchi beetto, mitte siqqo haadhe aanase, ‹Yihudu gashshoote› yite borreessi. Wole siqqono haadhe aanase, ‹Israeelete gashshoote› yite borreessi.

¹⁷Hakkunni gedensaanni, lamenta siqqicho umo xaadisse mitte labbanno gede assi.

¹⁸Mannikki, ‹Kuni maati?› yee xa'mannohe yannara,

¹⁹ani Mootichu Kaaliiqi Israeelete lawishsha ikkitino siqqo, Yihudu lawishsha ikkitino siqqo ledo mitteenni worate hedoommota kulinsa. Lamenta xaadise mitte siqqo asse amadeemmo.

²⁰«Borreessittore lamenta siqquwa angakkinni amadde mannu la"anno gede assi.

²¹Ani Mootichu Kaaliiqi manna'ya baala billaalle noo daga mereerinni mitteenni gamba asse, uminsa gobba qole abbammonsara hedoommota kulinsa.

²²Baattote aana Israeelete ilaallara mitto gashshoote ikkite heedhanno gede asseemmonsa. Baalanka mitteenni gashshannohu mittu moote hee'rannonsa; layinkimeeshsho 2 gosa di"ikkitanno. Gashshootinsano lamewa dibeehamanno.

²³Hakkunni gedensaanni, tiyyi'nanni maganna kaphunnitenni umonsa dibatteessitanno; cubbunnino disarraaqantanno. Ane gibbe loossino cubbi baalunku giddonni fushsheemmonsa; cubbinsawiinnino keereenseemmonsa. Insa manna'ya ikkitanno; anino Maganonsa ikkeemmo.

²⁴«Soqqamaancho'ya Daawiti lawanno moote gashshannonsa; mittu allaalaasinchiwa gamba yite seera'ya xeissukkinni agadhitanno.

²⁵Soqqamaanchi'ya Yaiqoobira oommositeranna akaakkansa heedhino baattora heedhanno; insanna oosonsa, sirchinsa baalu hatte gobbara hegere geeshsha heedhanno. Soqqamaanchi'ya Daawiti gedee moote hegere geeshsha gashshannonsa.

²⁶Keere heedhanno gede hegere gondooro e"eemmonsa; insano galagalche baattonsara xinte kiironsa batiseemmo. Qullaawu Mini'ya mereeronsa hegerera hee'ranno gede asseemmo.

²⁷Anino hakkiicho insa ledo hee'reemmo. Ani Maganonsa ikkeemmo; insano manna'ya ikkitanno.

²⁸Qullaawu Mini'ya mereeronsa hegere geeshsha hee'ranno gede asseemmo yannara, anera qullaawa manna'ya ikkitanno gede, Israeele doodhoommohu ani Kaaliiqa ikkoommota daga affanno» yee coyi'rie.