Read Sidama_Qullaawa _Maxaafa HIZIQEELI 4 Bible Online

HIZIQEELI 4 - Sidama_Qullaawa _Maxaafa bible

HIZIQEELI 4

¹Kaaliiqi, «Koo manchi beetto, mitto doru bano haadhe, albakkiinni worte, aanaho Yerusaalamete katama akeeki.

²Katamu doyissama leellishanno gede qooxeessisira balla umi. Diinu kaxxe eanno gede huxxaho gamba assite bushsha duuni; urdete qiisho seekki. Huxxa dhoonsanni meenchono qixxeessi.

³Siwiilu mixashsho haadhe, atenna katamu mereero huxxu gede assite uurrisi. Alba katamu widira higge lai; katamu doyissamanno; doyissattohuno ateeti. Kunino Israeelete mannira malaate ikkanno.

⁴«Xa, gurachu midaadinni goxi. Anino Israeelete cubbo baala ate aana duuneemmo; insa saonni kainohunni qarrantanni 390 barra hakko keeshshatto. Insa mittu dirinni qorichisheemmo deerrinni, ate kayinni mitto barra qorichishate murci'roommo.

⁶Hakkonne gudittohu gedensaanni, soorridhe qiniitichu midaadikkinni goxxe, Yihudu saora 40 barra qarramatto. Kunino insa mittu dirinni qorichishate hedoommohu, atera mitto barra ikkanno yaate.

⁷«Yerusaalamete doyissama buuxxe lai. Katamu widira qolte angakki shaffanni aanase daannoha busha coye kultanni himana coyi'ri.

⁸Gaangeessinannise barri goofa geeshsha, midaado higattokki gede siiwotenni usureemmohe.

⁹«Xa, shiima qamadenna hayixe, baaqeelanna missira, bashanqanna gardaama haa'ri. Baalanka mitteenni karsite tima gani. Konne tima gurachu midaadinni 390 barra goxatto woyite itatto.

¹⁰Barru barrunkunni 230 giraame keentanno sagale calla itatto. Isono layinki barri geeshsha ikkannohe gede assite itatto.

¹¹Agatto wayino bikkinoonniha ikkino daafira, barrunni 2 kokkobbe calla agatto.

¹²Mannunnita lowiidi shuma mooshshite giidhitanni, tima gante mannu baalu afannowa heedhe iti» yiie.

¹³Qoleno Kaaliiqi, «Kuni Israeele wole gobbara billaalliseemmo yannara, seerunni hoolloonnita batte ikkitino sagale itate giddeessinanninsata leellishannoho» yiie.

¹⁴Anino, «Mooticha Kaaliiqa, konne assi yitootie ballo! Ani horonta anenee batteesse diegennoommo. Anje'yanni kayise, reyitinota woy moyichu shiino saada maala ite diegennoommo. Seerunni hoolloonnita batte ikkitino sagaleno ite diegennoommo» yee dawaroommo.

¹⁵Kaaliiqi qole, «Maahoyyena, lowiidi shuma mannunnite darga, obbi-kose haadhe giidhite tima ga'ni» yiie.

¹⁶Ledeno, «Koo manchi beetto, Yerusaalame shiqqanno sagale baala uurritanno gede asseemmo. Hakkiicho hee'ranno manna qircine uyinanni sagalenninna wayi anjenni kainohunni, dadillaammanna yaaddaameeyye asseemmo.

¹⁷Sagalenna wayi goofeenna, hexxo mudhitanno. Saonsa batinyinni kainohunni jaabbe gooffanno» yiie.