Read Sidama_Qullaawa _Maxaafa HIZIQEELI 40 Bible Online

HIZIQEELI 40 - Sidama_Qullaawa _Maxaafa bible

HIZIQEELI 40

¹Qafadammummohunni lemiina ontikki diro, Yerusaalame diinu angara e'uhunni tonaa shoolki diro, haaru diri eihunni tonnikki barra, jawaata Kaaliiqi wolqa anewa daggu; isino iima qole haa're ha'rie.

²Ajuujatenni Kaaliiqi haa're masse, Israeelete gobbara mittu seedu ilaali aana worie. Wodiidi ragaanni, minnoonni katama labbannota mimmitu mule noota kinchu minna afummo.

³Mulira shiqqi assieta, camote gede xawanno dana afi'rinoha mitto mancho afoommo. Isino shaalado haarretenni gannoonni siiwonna bikkinanni daabba anga amade e'nanni waalchira uurre no.

⁴Isino «Koo manchi beetto, kawiira daatto gede assinoonnihehu, ani leellisheemmohere baala wodanchatto gedeeti. Kunnira, illekkinni lai; maccakkinnino seekkite macciishshi; la"attoha baala Israeelete mannira kulinsa» yiie.

⁵Laoommohuno Qullaawa Mineeti; minu gaangaawirano kinchu huxxi no. Manchuno hojja 6 seeddaanna cigile ikkanno daabba haa're, kinchu huxxa bikki. Huxxuno, godowa 6 cigile, du'mille 6 cigile ikki.

⁶Hakkunni gedensaanni, soojjaati ragaanni noo waalchiwa sae ha'ri. Dirima fule, e'nanni waalcho bikki; du'millisino 6 cigileeti.

⁷Agaraasinete minna, hala'linye 10 ha'rumaati;[9] minnate mereero nooti kinchu huxxuwa du'mille 5 cigileeti. Qullaawu Minira albaanni sa'nanni farora noohu giddoyidi waalchi seendille 6 cigileeti.

⁸Hakkunni gedensaanni, e'nanniwa noo faro bikkeenna,

⁹hala'linye 8 cigile, xarra du'mille 2 cigile ikkitu. E'nanniwa noo faro Qullaawu Minira albaanni no.

¹⁰Soojjaati waalchira guranna qiniiteenni ka'aanni 3, kawaanni 3 mini no. Mereeronsano luphi yite leeltannoti mittu gari du'mille afidhino huxxuwa no.

¹¹Manchuno lede sa'nanni widoonni nooha huxxu waalcho bikki; kunni hala'linyi 13 cigileeti. Lamu fa'namino waalchi kayinni 10 cigileeti.

¹²Mittu mittunku agaraasinchi uurrannohura albaanni, hojja 1 cigile[10] du'mille 1 cigile ikkinohu shiimu kinchu huxxi no; mitte mittenti kifile mittu garite; hala'linyinsano 3 qaafooti.

¹³Mittu agaraanchi kifilenni kayise, layinki agaraanchi kifile geeshsha nooha sa'nanni dargi xeertinye bikki; kunino 12 qaafonna darate ikki.

¹⁴E'nanniwa noo kifile qaccetenni kayise bikkeenna, hala'linye 10 qaafo ikkitu.

¹⁵Gobbayidi waalchinni kayise, giddora e'nanni waalchi geeshsha noo xeertinyi 25 qaafooti.

¹⁶Agaraasinete kifilera guraanninna qiniiteenni shiimmaadda masikootta no; mittu mittunku kifile masikootera umoho gafo no. Sa'nanni faro huxxira guraanninna qiniiteenni saattu haqqe misile seekkinoonni.

¹⁷Manchu waalcho sayise nafarira haa're abbie. Hakkiicho gobbaanni qolle minnoonniti 30 kifilla no; kifillate albaanni kinna karroonniti sa'nanni farra no.

¹⁸Karroonni kinchino nafara gaangeessinoho; hakku gobbayidi nafari giddoyidihuwiinni woro hige hirikki yiinoho.

¹⁹Giddoyidi nafarchira e'nannihu alira shiqqi yee seekkamino waalchi no; hakku manchino lamenta waalchuwa mereero noo xeertinye bikki; kuni 50 qaafo ikki.

²⁰Qoleno, hakku manchi aliyye ragaanni gobbayidi nafarchira sa'nanni waalcho bikki.

²¹Kuni waalchino e'nanni widoonni sase sase agaraasinete kifilla afi'rinoho. Tini kifilla, mereeronsa nooti kinchu huxxuwanna e'nanniwa noo kifilla qaccete geeshsha nooti hala'linyinsa taaloho. Aliyye waalchino seendille, 25 qaafooti. Hala'linye 12 qaafootinna darateho.

²²Masikootta, e'nanniwa noo kifilenna saattu misilla soojjaati waalchite gedeete. E'nanniwa noo kifileno Qullaawu Mini nafarchira alba higge, 7 fullanni dirima afidhinote.

²³Soojjaati waalchira noo garinni, kunni aliyye huxxi waalchi muleno, nafaru widoonni giddoyidi nafarcho sa'nannihu wolu waalchi no. Hakku manchino tenne lamenta waalchuwa mereero noo hala'linye bikki; kunino 50 qaafooti.

²⁴Qoleno hakku manchi wodiidi waalchiwa haa're massie; hakkiichono wole waalcho afummo. Waalchu du'millinna e'nanni kifile hala'linyi wolootu ledo taaloho.

²⁵Wolootaho noo garinni kunni waalchi ragaanni noo kifillarano masikootta noonsa. Waalcho e'nanni faro seendille, 25 qaafooti. Hala'linye, 12 qaafootinna darateho.

²⁶Giddine hakkiira sa'nannihu 7 dirimi no. E'nanni waalchira qaccete noo kifile, Qullaawu Minira alba higge no. Saattu misilla sa'nanni faro huxxa biifisse no.

²⁷Giddoyidi nafarchira sa'nannihu wolu waalchino no. Hakku manchi layinki waalchi geeshsha noo hala'linye bikki; kunino 50 qaafooti.

²⁸Hakku manchi wodiidi waalchi ragaanni giddoyidi nafarchira haa're massie. Isino waalcho bikkita hala'linye gobbayidihu ledo taaloho.

²⁹Agaraasinete kifillanna e'nanniwa noo kifile, giddoyidihu kinchu huxxinna wolootu waalchuwano mittu garite. Kunni waalchi kifillarano masikootta noonsa. Waalchu farono, seendille 25 qaafooti; hala'linye 12 qaafootinna darateho.

³⁰

³¹E'nanniwa noo kifile gobbaanni noo nafarira alba higge no. Sa'nanni farora noohura kinchu huxxi aana, saattu misile seekkinoonni. Hakko waalchiwa iillishannohu 8 dirimi no.

³²Hakku manchi soojjaati waalchi ragaanni giddoyidi nafarcho haa're massie. Isino tenne waalchu faro bikkita, wolootu ledo taalote.

³³Agaraasinete kifilla, mereeronsa noo huxxuwanna e'nanniwa noo kifile wolootu ledo taalote. Agaraasinete kifillaranna e'nanniwa noo kifilerano masikootta noonsa. Waalchu faro seendillino 25 qaafooti; hala'linyisino 12 qaafootinna darateho.

³⁴E'nanni kifile, gobbayidi nafarchira alba higge no. Sa'nanniwa guraanninna qiniiteenni noo huxxuwara saattu misile seekkinoonni. Waalchunniwa iillishannohuno 8 dirimi no.

³⁵Hakku manchi aliyye waalchira haa're massie. Waalchu faro bikki woyite, wolootu ledo taalote.

³⁶Agaraasinete kifilla, mereeronsa nooti kinchu huxxuwanna e'nanniwa noo kifile wolootu geeshshireeti. Tenne farorano masikootta noose. E'nanni faro seendille 25 qaafooti; hala'linye 12 qaafootinna darateho.

³⁷E'nanniwa noo kifile gobbaanni noo nafarchira alba higge no. Sa'nanni farora guraanninna qiniiteenni noohura kinchu huxxi aana saattu misile seekkinoonni. Waalchunniwa iillishannohuno 8 dirimi no.

³⁸Gobbayidi nafarchira aliyye ragaanni giddoyidi waalchi faro ledo xaaddinoti wole kifileno no. Isera nafaraho albaanni nootewa e'nanniwa noo kifile sa'nannihu wolu waalchi noose. Shilqote kakkalora shiqinshanni saada maala hayishshinannihu hakkooti.

³⁹E'nanniwa noo kifilera lame mitto ragaanni, lame wole ragaanni albaanni qolle worroonniti shoole xarapheeyye no. Gudinse giirrannita woy cubbonna sao agursiisate kakkalora saada gorrinannihu tenne xarapheeyye aanaati.

⁴⁰Kifilete gibbaanni aliyye waalcho e'nanniwa lame mitto ragaanni, lame wole ragaanni albaanni qolle worroonniti 4 mimmito labbanno xarapheeyye no.

⁴¹Kunnira, kakkalote shiqinshanni saada gorrinanniti mitteenni 8 xarapheeyyeeti. Tenne xarapheeyyeno, 4 kifilete giddo, 4 gobbaanni nafara worroonni.

⁴²Shilqote kakkalo worate lende minnoonni kifile giddo nooti 4 xarapheeyye kincho bonce seekkinoonnite. Insano hojja 1 cigileeti; seendillenna godowa mitte mitte cigileetinna darateho. Kakkalote saada gorratenna qixxeessate kaa'lanno uduunne baala, tenne xarapheeyye aana worranni.

⁴³Xarrate aana seendille angichu geeshsha ikkitanno sutaasine dirante no. Kakkalote shiqinshanni maali baalu xarapheeyyete aana no.

⁴⁴Hakkunni gedensaanni, hakku manchi ane giddoyidi nafarira haa're massie. Cufannansa giddo qolle fannanniri 2 kifilla no. Aliyyeenni nooti alba wodiidira higge no; wodiidoonni nooti kayinni alba wodiidira higge no.

⁴⁵Hakku manchi, «Alba wodiidira higge noo kifile Qullaawa Mine soqqantanno qeesooti qixxaabbannowaati.

⁴⁶Alba aliyyera higge noo kifile kayinni, kakkalote darga soqqantanno qeesooti qixxaabbannowaati. Qeesootu baalu Saadooqi sirchinni ilantino Leewaawootaati. Kaaliiqi albaanni uurrite soqqantara fajjinoonnisari insa calluwaho» yiie.

⁴⁷Hakku manchi giddoyidi nafarcho qaccetenni qaccete geeshsha bikkita, seendillisinna hala'linyisi 50 qaafo ikki. Qullaawu Mini galchimi ragaanni hee'reenna albasiinni mittu kakkalote dargi no.

⁴⁸Hakkunni gedensaanni, Qullaawu Minira e'nanniwa noo kifile haa're massie. E'nanni faro seendille, 2 qaafootinna darateho; hala'linye 7 qaafooti. Guraanninna qiniiteenni nooti kinchu huxxuwa du'mille sase sase cigileeti.

⁴⁹E'nanniwa noo kifile hala'linyi 10 qaafooti; seendille 6 qaafooti. Kaxxinanni hakkiira marranniti dirimma no. E'nanniwa guraanninna qiniiteenni uurritinoti 2 tuuqqa no.