Read Sidama_Qullaawa _Maxaafa HIZIQEELI 43 Bible Online

HIZIQEELI 43 - Sidama_Qullaawa _Maxaafa bible

HIZIQEELI 43

¹Hakko manchi soojjaati ragaanni noo waalchiwa haa're massie.

²Hakkiichono Israeelete Magani ayirrinye leellishanno xawaabbi soojjaatinni fulanna afummo. Macciishshummo hirbino baaru dambali gede suunannoho. Ayirrinyisi biliccinatinni baatto xabbu.

³Tini ajuujano kunni albaanni Maganu Yerusaalame hunara dayi waro afummota labbanno. Kebaari Wayi mule afummo ajuuja ledo mimmito labbanno. Hakka waro baattote aana alba hige gombisamoommo.

⁴Kaaliiqi ayirrinye leellishanno xawaabbi, soojjaati waalchi ragaanni hige sae Qullaawu Minira ei.

⁵Kaaliiqi Ayyaani iima qole gotti asse, giddoyidi nafarchira haa're eessie. Kaaliiqi ayirrinyi Qullaawa Mine wo'me nooha afummo.

⁶Hakkiichono hakku manchi mule'ya uurre hee'reenna, Kaaliiqi Qullaawu Minisi giddo hee're,

⁷«Koo manchi beetto, kuni ayirrinyu barcima'yaati. Konne Israeelete manni mereero hegerera hee'reemmo. Kunni ka'a insanna mootoollansa kaphu maganna magansi'ratenni woy konniicho mootoollansa waa'matenni qullaawa su'ma'ya dibatteessitanno.

⁸Mootoolla mootete minnansa waalchuwa Qullaawu Mini'yara gamba assite uurrissino. Anenna insa mereero mittu huxxi callu no. Assitino bunshe baalatenni Qullaawa su'ma'ya batteessitino. Kunninni kainohunni insa hanqi'yanni hunoommo.

⁹Kunni ka'a kayinni kaphu maganna magansi'ra agurate, mootoollansa reeshshano kawiinni hoola hasiissannonsa. Hatto assituro ani mereeronsa hegere geeshsha hee'reemmo» yaanna macciishshummo.

¹⁰Maganu lede, «Koo manchi beetto, Israeelete mannira Qullaawa Mine minnanni gara kulinsa; uurranno garano buuxxona. Cubbu wo'minoha loosonsa qaagge, saalfatanno gede assinsa.

¹¹Assitino sao baalate saalfatannoha ikkiro, Qullaawu Mini uurranno gara xawisinsa. E'nanninna fullanni raga, minu uurranno gara baala, woganna seerano huwattanno gede assinsa. Insano minu uurranno gara buuxxe seera baala wonshate guuttinore ikkitanno gede konne baala insa affanna borreessi.

¹²Qullaawu Mini noo dargi qullaawu ilaali'ya qoromboonniha ikka hasiissannosi. Kuni Qullaawu Minira lowo geeshsha hasiisanno seeraati» yee coyi'rie.

¹³Qullaawa Mine assini garinni kakkalote dargano aane noo garinni bikkinoonni. Kakkalote dargi hundi hojja 1 cigile, baqo 1 cigile ikkanno. Aanchine seekkinoonni gammali alillitte 1 taakkooti.

¹⁴Hundunni kayise isira aane noo dirimi geeshsha noo seendilli 2 cigile, qaccetenni kayise layinki dirimi geeshsha 1 cigile giddo hige eanno. Shiimu diriminni kayise layinkihu geeshsha noo seendilli 4 cigileeti. Qaccetenni kayise layinki dirimi hundi geeshsha 1 cigileeti.

¹⁵Kakkalo shilqinshannihu umiidi dirimi hojja 4 cigileeti; kakkallanni basera shoolente maddera luphi yitinoti 4 buudda no.

¹⁶Kakkalote dargi 4 madde afi'rino; mitte mittente madde baqo 12 cigileeti.

¹⁷Mereeri dirimino 4 madde afi'rino; mitte mittente madde baqo 14 cigileeti. Gobbaanni hige noo gammali hojja 1 taakkooti; hala'linye 1 cigileeti. Kakkalote dargira sa'nanni dirimmano soojjaati ragaanni nooreeti.

¹⁸Mootichu Kaaliiqi, «Koo manchi beetto, kuleemmohere macciishshi. Kakkalote dargi seekkame goofiro, aanaho kakkalo shilqishshe, kakkalloonni saada mundee wixxe keereensatto.

¹⁹Alba'yaanni uurrite anera soqqama dandiitannori Leewi ga're ikkitinori Saadooqi sirchinni ilantino qeesoota callaho. Ani Mootichu Kaaliiqi kuni coyi ikkanno gede hajajoommo. Cubbo agursiisate kakkaltanno gede insara 1 middicha aattonsa.

²⁰Atino shiima mundee haadhe, kakkalote darga shoolente maddera noo buuddara, kakkalote darga mereeri dirimi aana noota shoolenta maddenna kakkalote dargi qacce baala buuratto. Kunni garinni keereensite qorombannita assatto.

²¹Cubbo agursiisate kakkalora shiqino middicha haadhe, Qullaawu Minira qoqqomboonni dargira gobbaanni mitte baxxitino basera massite giiratto.

²²Layinki soodo muso afi'rinokkiha 1 meichu goco haadhe, cubbo agursiisate kakkalatto. Bootu mundeenni assittonte gede, meichu mundeennino kakkalote darga keereensatto.

²³Konne baala assittohu gedensaanni, galagalte muso afidhinokkire 1 middichanna 1 ge'rechu goco haadhe,

²⁴anewa shiqishatto. Qeesootu aanansa maxine giggishshituhu gedensaanni, anera shilqote kakkalo assitannoe.

²⁵Lamala barra wo'ma barru barrunni 1 meichu goco, 1 middichanna 1 ge'rechu goco, cubbo agursiisate kakkalatto. Kuri baalunku muso afidhinokkire ikka hasiissannonsa.

²⁶Qeesootu kakkalote ikkanno gede, 7 barri geeshsha kakkalote darga keereensitanno.

²⁷Lamalu barri wo'mihu gedensaanni, qeesootu kakkalote dargi aana shilqinshanni kakkalonna mannunnita mittimmate kakkalo shiqishshanno. Hakkunni gedensaanni, ani ki'ne baalunkunni hagiidheemmo. Ani Mootichu Kaaliiqi konne coye coyi'roommo» yiie.