Read Sidama_Qullaawa _Maxaafa HIZIQEELI 7 Bible Online

HIZIQEELI 7 - Sidama_Qullaawa _Maxaafa bible

HIZIQEELI 7

²«Koo manchi beetto, ani Mootichu Kaaliiqi Israeelete mannira yeemmori konneeti: Baatto'ne baalate goofimarchu iillino.

³« ‹Israeele, kuneeti goofimarchi'ne iillino; assitinoonni sao baalate yoo yaammo'nera hanqi'ya aana'ne dirranno. Assitinoonnihu shagaggi'nanni coye ikkino daafira, ki'nera malino qoricha adhitinanni.

⁴Horonta dimarareemmo'ne; maarono dieemmo'ne. Assitinoonnihu saalfachishanno coye ikkino daafira, qorichisheemmo'ne. Hatte yannara ani Kaaliiqa ikkoommota buuxxinanni› yaanno» yiie.

⁵Mootichu Kaaliiqi qole, «Bao baote aana dagganno'ne.

⁶Baalunku coyi goofino; tini ki'nera jibbaataho; ki'neri kaino.

⁷Baattote aana heedhinanni manni baalunkura goofimarchu iillino. Ilaallate aana kaphu magannara seekkidhinoonni darguwa kakkalonnitera ayyaana ayirrisi'ra'ne gatteenna canco ikkanno.

⁸Xa aara'ya baala aana'ne facci asse agurammoraati; assitinoonni coyi baalaho yoo yeemmo'ne. Saalsiisanno loosi'ne daafira qorichisheemmo'ne.

⁹Horonta dimarareemmo'ne; digatiseemmo'ne. Loossinoonni loosi saalsiisannohunni kainohunni, qorichunni digattinanni. Hatte yannara, ani Kaaliiqa ikkoommotanna qorichisheemmo'nehuno ane ikkoommota affinanni.

¹⁰«Israeelete aana baote barri daa rahino; barshu, haxawarrimmanna boo'na gobba wo'mitino.

¹¹Assinanni beebba bunshe batissanno; kunni daafira jiro, gaacheenunna ayirrinyu dihee'rannonsa.

¹²Kuneeti yanna iillitino; barruno gambisino. Qorichi'ya baalunku aana daannohura, hirannohu gaabboonke; hidhannohuno hagiidhoonke.

¹³Ane hanqi baalunku aana dirranno daafira, daddalaanchu itaminoha qo'late seeda diro dihee'ranno; bushu manni qarrunni digatanno.

¹⁴Xurumbu ufuufamanno; mannu baalu qixxaawanno. Kayinnilla hanqi'ya mannu baalu aana dirrannohura, ayino olaho ha'ra didandaanno» yii.

¹⁵Kaaliiqi Israeelete mannira, «Doogo doogonte olu, mine minenko dhibbunna hude no. Katamu gobbaanni hee'rannohu baalu olunni reyanno; katamaho noohuno dhibbunninna hudetenni reyanno.

¹⁶Mitu mitu lagichu giddonni baraganno lembooli gede, ilaalla hige xooqanno; baalunku cubbinsa daafira wi'litanno.

¹⁷Mittu mittunku anga daafurtanno; guluchuno qece yaanno.

¹⁸Xiddu uddano uddidhe waajjite huxidhanno; baalunku saalfattanno; hexxo mudhite umo meexxitanno.

¹⁹Ani Kaaliiqi aara'ya aanansa dirriseemmo yannara, birrinsano ikko culkinsa baotenni digatisannonsa. Kunni daafira, birransanna culkansa baala ishinu gede dooggate huntanno; halchitinore assi'ratenna hude gargadhate horonta dikaa'lannonsa. Albano cubboho eessinonsahu hakko birraatinna hakko culkaati.

²⁰Xumu dilqu irrinni naaxxitino yanna no; ikkollana saalsiissannota kaphu maganna seekkidhino; jironsa tidhitinokkita assoommohuno kunniraati.

²¹«Allaggu mulqidhannonsa gede asseemmo; seerimalu manni jajjansa saame adhe lageessanno gede asseemmo.

²²Qullaawa Mine'ya batteessitanno; mulqidhannorino hiiqqite e'e batteessitanna gargare dihooleemmo.

²³«Mannu baalu gara hawanno; baattote aana manna shitannori wo'mitanno. Katamma baalate haxawarrimma hala'litanno.

²⁴Lowo geeshsha busha daga kawa abbe minna'ne ragidhanno gede asseemmo. Wole daga magansidhinanni darguwa batteessitanno gede asseemmo yannara, bareedda'nera goonte diheedhannonsa.

²⁵Hexxo anganni ba'annonsa; keere hasidhe hoogganno.

²⁶Bao baote aana dagganno; busha duduwo calla macciishshitanno. Mannu himanaano albillittete ikkannore kultannonsa gede huucci'ranno. Qeesootaho manna rosiissannori dihee'rannonsa; geerruno yee seejjannore hooganno.

²⁷Mootenna gashshaanonsa baala hexxo ba'eennansa wi'litanno; mannuno waajje huxi'ranno. Loossino loosi baalaho qorichisheemmonsa; wolootaho yitino garinni yoo yeemmonsa. Kunino ani Kaaliiqa ikkoommota leellishannonsa» yii.